2 LEKCIJA
Savo hino o Del?
1) Soske te služinel le Devleske?
Džido Del kerdžas savoro, nane les začatkos, dživelas furt a šoha na merla. (Žalmy 90:2) Ov diňas o lačho hiros te zapisinel andre Biblija. (1. Timotejovi 1:11) Amaro dživipen hino daros le Devlestar, vašoda kamas te služinel ča leske. Pregenen Zjavenie 4:11.
2) Sar dičhol avri o Del?
Ňiko le manušendar le Devles na dikhľas, ov hino duchos. Hino bareder, zoraleder, godžaveder sar o manuša a o džviri. (Ján 1:18; 4:24) Olestar, so kerdžas, šaj sprindžaras, savo hino. Napriklad všelijaka ovocije the kvitki sikaven leskri godži the oda, sar amen kamel cale jilestar. O ňebos, e phuv the o čercheňa, so kerdžas, hine igen bare. Andre ada dikhas leskri zor. Pregenen Rimanom 1:20.
Nekfeder sprindžaraha le Devles andal e Biblija. Sikavel, so le Devleske pre dzeka a so na, sar kerel le nipenca the sar dikhel pro nalačhe the lačhe veci, so keren o nipi. Pregenen Žalmy 103:7–10.
3) Sar pes o Del vičinel?
O Ježiš phendžas: Dado amaro, so sal andro ňebos, mi el barardo tiro nav! (Matúš 6:9, Le Devleskero Lav le Romenge) Le Devles hin but tituli, ale ča jekh nav. Andre savore čhiba pes ada nav genel sikra inakšeder. Andre romaňi čhib pes phenel Jehovas. Varesave Bibliji šaj pisinen thiš Jahve. Pregenen Žalmy 83:18.
O manuša, sar prethoven o Bibliji andre peskre čhiba, na kamen te pisinel le Devleskro nav andre Biblija a pisinen: Raj, Hospoďin vaj Del. Akor, sar sas e Biblija dopisimen, Devleskro nav sas pro 7000 thana andre Biblija. Ježiš pal kada nav vakerlas, sar sikavlas le nipen pal o Del. Pregenen Ján 17:26.
Dikh o videjo Sar pes o Del vičinel?
4) Starinel pes o Del pal amende?
Sar kada jileskro dad the o Del kerel sa prekal amaro lačhipen.
Hino o Jehovas ajso Del, saveske hin jekh, hoj pre phuv hin ajci pharipen? O nipi phenen, hoj o Del amen mukhel andre ada pharipen, hoj amen te skušinel. Ale ada nane čačipen. Pregenen Jakub 1:13.
O Del amenge presikavel bari pačiv, bo domukhľas, hoj peske korkore te kidas avri dživipen, savo kamas a andre ňisoste amen na ispidel. Sam bachtale, hoj peske šaj kidas avri te služinel le Devleske! (Jozua 24:15) But nipi peske kidle avri te kerel nalačhipen. Vašoda hin adadžives ajci but pharipena. Le Jehovas dukhal o jilo te dikhel savoro nalačhipen. Pregenen 1. Mojžišova 6:5, 6.
Le Jehovaske nane jekh, sar dživas. Kamel, hoj amare jile te radisaľon. So neksigeder odčhivla o pharipen the olen, so ada keren. Le Devles hin godžaver dvovodi, soske ada mek primukhel. Buter pes dodžanaha andre 8 lekcija. Pregenen 2. Petra 2:9; 3:7, 13.
5) Sar šaj avas pašeder kijo Del?
O Jehovas kamel, hoj pes te modľinas kije leste. Prindžarel dojekhe manušes. (Žalmy 65:2; 145:18) Dojekh amendar kerel chibi, ale the avka kamas te kerel leske radišagos. O Del ada achaľol a jilestar odmukhel. The te sam ňedokonala, šaj avas pašes kijo Del, sar paš peskro dad. Pregenen Žalmy 103:12–14; Jakub 4:8.
O dživipen hino daros le Jehovastar, majinahas bi les jilestar te kamel, sar ňikas avres. (Marek 12:30) Sikhľuvas pal leste the keras ada, so rado dikhel. Avka šaj avas pašeder ke leste. Pregenen 1. Timotejovi 2:4; 1. Jána 5:3.
