СТРАЖАРСКО КУЛА Бр. 1, 2023 | Сар те грижине тут башо тло емоционално састипе
Милиоња мануша ко цело свето, бизи разлика кобор берш иси лен, саво економско статус иси лен, саво образование, сави националност или ки сави религија тане, боринена пе пхаре симптоменцар кола сој тане поврзиме е емоционално састипаја. Сој тано о емоционално насвалипе хем сар влијајнела упро мануша? Ко акава списание ка дикха кобор тано важно те родел пе медицинско помош хем сар шај и Библија ко практично начин те поможинел околенге со иси лен асавко проблеми.
Емоционално састипе — проблеми ко цело свето
О емоционално насвалипе на биринела е манушескере берша хем котар авела. Дикх сар е Библијакере советија шај те поможинен туке башо тло емоционално састипе.
О Девел грижинела пе туке
Соске шај те ова увериме кај о Јехова о Девел хаљола амаре мисле хем сар осетинаја амен, пошукар таро било кој јавер?
1 | Молитва — „Са тумаре гриже фрден леске“
Дали шај чаче те молине тут е Девлеске башо секова пхарипе или мисла со вознемиринела тут? Сар и молитва поможинела околенге со иси лен анксиозност?
2 | Утеха таро е Девлескоро Лафи
И библиско порака дела амен чачутни надеж кај панда хари ко негативна чувствија нане те сетина амен.
3 | Сар шај те поможинен амен о примерија тари Библија
О извештаија тари Библија таро мурша хем џувља кола со сине лен иста чувствија сар амаре, шај те поможинен аменге те на осетина амен коркори кеда боринаја амен чувствонцар кола со вознемиринена амен.
4 | И Библија дела практична советија
Дикх сар адава со ка читине библиска стихија хем ка чхиве туке разумна целија кола со шај те исполнине лен шај те поможинен туке те икљове ко крајо тле емоционална проблеменцар.
Сар те поможина околенге со иси лен емоционално насвалипе
Адава со ка поможине несаве тле амалеске со иси ле емоционално проблеми шај те керел те осетинел пе пошукар.
