Со значинела те поштујне те даде хем те даја?

МУКХ

Со вакерела и Библија:

Ко бут тхана ки Библија денди тани и заповед: „Поштујн те даде хем те даја“ (2. Мојсеева 20:12; 5. Мојсеева 5:16; Матеј 15:4; Ефешаните 6:2, 3). Те дикха штар начинија сар шај те кера адава.

Ов ленге благодарно. Поштујнеа те даде хем те даја кеда сиан ленге благодарно башо са со керѓе туке. Шај те сикаве кај ценинеа лен аѓаар со ка шуне ленгере советија хем поуке (Изреки 7:1, 2; 23:26). И Библија охрабринела амен те дичина амен амаре родителенцар (Изреки 17:6).
Поштујн ленгоро авторитети. Посебно кеда тано некој терно, сикавела кај поштујнела пе даде хем пе даја ако прифатинела о авторитети со денѓа лен о Девел. О Колошаните 3:20 пхенела е терненге: „Тумен чхавален, шунен тумаре родителен ко са, соске аѓаар мангела о Господари“. Чак о Исус кеда сине чхаво сине послушно пе родителенге (Лука 2:51).
Сикав кај поштујнеа лен (3. Мојсеева 19:3; Евреите 12:9). Адава бут пути шај те дикхел пе таро тле лафија хем таро начин сар вакереа лен. Точно тано адава кај несаве родителија понекогаш постапинена ко начин кова со керела е чхавенге те овел пхаро те поштујнен лен. Ама, чак тегани, о чхаве шај те сикавен кај поштујнена лен аѓаар со нане те вреџинен лен ни лафенцар ни постапкенцар (Изреки 30:17). И Библија сикавела амен кај тани бут сериозно бути ако амаре лафенцар вреџинаја амаре родителен (Матеј 15:4).
Грижин тут ленге. Кеда те родителија ка овен пхуре, шај ка ваљани ленге помош. Ка сикаве кај поштујнеа лен ако деа тутар са те овел лен са сој ленге потребно (1. Тимотеј 5:4, 8). На пример, кратко англедер те мерел, о Исус мукхља некој те грижинел пе лескере дајаке (Јован 19:25-27).

Погрешно мислибе башо адава со значинела те поштујнен пе о родителија

Погрешно мислибе: Ако поштујнеа те даде хем те даја, мора те мукхе ола те контролиринен тло брако.

Чачипа: И Библија вакерела кај о брако ваљани те овел поважно таро о јавера фамилијарна врске. Ки 1. Мојсеева 2:24 пишинела: „Адалеске о мануш ка мукхел пе даја хем пе даде хем ка спојнел пе пле ромњаја“ (Матеј 19:4, 5). Нормално, о брачна парија шај те овел лен корист таро советија со дена лен ленгере родителија (Изреки 23:22). Ама, о ром хем и ромни иси лен право те одлучинен џи ки која мера ка дозволинен е родителенге хем е јавере фамилијаке те мешинен пе ленге ко брако (Матеј 19:6).

Погрешно мислибе: Е родителен иси лен најбаро авторитети.

Чачипа: О Девел денѓа одредено авторитети е родителенге. О авторитети сој дендо е манушенге тано ограничимо хем нане побаро таро е Девлескоро. На пример, кеда е Исусескере ученикија сине англо судо хем сине ленге наредимо те на шунен е Девле, ола одговоринѓе: „Мора повише те шуна е Девле, него е манушен“ (Дела 5:27-29). Исто аѓаар, о чхаве ваљани те овен „послушна пле родителенге ко Господари“, адава значинела те овен ленге послушна ко са сој тано спрема е Девлескере заповедија (Ефешаните 6:1).

Погрешно мислибе: Ако поштујнеа те родителен, ка прифатине ленгере верувања.

Чачипа: И Библија поттикнинела амен те испитина адава со вакерена аменге о јавера те шај те дикха дали адава тано чаче (Дела 17:11; 1. Јованово 4:1). Некој со керела адава шај ка прифатинел верувања кола со разликујнена пе таро верувања лескере родителенгере. И Библија спомнинела буте верна слуген е Девлескере кола со на прифатинѓе и религија пле родителенгири, сар сој о Авраам, и Рут хем о апостол Павле (Исус Навин 24:2, 14, 15; Рут 1:15, 16; Галатите 1:14-16, 22-24).

Погрешно мислибе: Ако поштујнеа те даде хем те даја, ка икере о адетија со керена пе е муленге.

Чачипа: И Библија вакерела: „Е Јехова, те Девле, обожавин ле хем служин само леске“ (Лука 4:8). Ако некој керела адетија е муленге, тегани керела нешто со на мангела о Девел. Освен адава, ки Библија пишинела кај „о муле на џанена ништо“. Ола нане свесна со керела пе ки ленгири чест, а исто аѓаар нашти ни те поможинен или те керен штета е џивденге (Проповедник 9:5, 10; Исаија 8:19).