Те шај некој те овел е Јеховаскоро сведоко ваљани те керел адава со вакерѓа о Исус, а тано пишимо ко Матеј 28:19, 20. Спрема е Исусескере лафија, окова со мангела те овел лескоро ученико ваљани те керел лафи, или те сведочинел башо Јехова.

 Прво бути: Ваљани те џане со сикавела и Библија. Пле следбениконге, о Исус вакерѓа: „Џан хем керен ученикија... сикавен лен“ (Матеј 28:19, 20). Ки Библија, а посебно ко дело коте со пишинела башо адава со сикавела сине о Исус Христос, пишиме тане корисна советија башо бахтало хем исполнимо живото (2. Тимотеј 3:16, 17). Ако мангеа те џане со сикавела и Библија, ка овел аменге мило те поможина туке ко адава преку бесплатно библиско курси (Матеј 10:7, 8; 1. Солуњаните 2:13).

 Дујто бути: Ваљани те икере тут ко адава со сикљовеа. О Исус вакерѓа кај окола со мангена те овен лескере ученикија мора те икерен са со заповединѓа ов (Матеј 28:20). Адава значинела кај на ваљани само те џане информацие тари Библија него те овел туке најважно те кере промене ко тло начин сар размислинеа хем сар понашинеа тут (Дела 10:42; Ефешаните 4:22-29; Евреите 10:24, 25). Пало адава, адала со шунена е Исусескере заповедија одлучинена те џан пали лесте аѓаар со дена лафи кај ка служинен цело живото е Девлеске, е Јеховаске (Матеј 16:24).

 Трито бути: Ваљани те крстин тут (Матеј 28:19). Ки Библија, о крстибе тано споредимо парујбаја. (Споредин Римјаните 6:2-4.) Откеда некој ка крстинела пе, парунела о пурано начин сар живинела сине хем почминела нево живото. Спрема адава, тле крстибаја, јавно сикавеа кај керѓан о прва дуј буќа коленге керела лафи о Исус хем родеа таро Девел те дел тут чисто совест (Евреите 9:14; 1. Петрово 3:21).

 Башо адава кер лафи е старешиненцар таро собрание. Ола ка керен туја лафи те шај те уверинен пе кај шукар хаљовеа адава сој тано вклучимо ки тли одлука те ове е Јеховаскоро сведоко, кај икереа тут ко адава со сиклиљан хем кај ту коркори одлучинѓан те ветине кај ка служине е Девлеске цело живото (Дела 20:28; 1. Петрово 5:1-3).

 Оја. Амен воспитинаја амаре чхавен спрема „о опомене е Јеховаскере“, сар сој аменге заповедимо ки Библија (Ефешаните 6:4). Ама, сар со бајрона, о чхаве ваљани коркори те одлучинен дали ка проучинен, ка прифатинен хем ка икерен пе ко адава со сиклиле тари Библија те шај пало адава те крстинен пе (Римјаните 12:2). Секој ваљани коркори те одлучинел баши пли вера ко Девел (Римјаните 14:12; Галатите 6:5).