SOVETIJA BAŠO FAMILIE
Sar te pomožine tle čhaveske te popravinel ple ocenke
Tle čhave izgleda na interesirinela le but i škola hem izbeginela te pišinel domašno hem te učinel. Adaleske leskere ocenke tane slaba hem na ponašinela pe baš šukar. Sar šaj te pomožine tle čhaveske te popravinel ple ocenke?
So valjani te džane
O pritisok bajrarela o problemi. Ako kerea e čhaveske pritisok, tegani ka ovel le stres ki škola, ama khere da. Te šaj te oslobodinel pe taro stres, šaj ka počminel te hovavel, te garavel o lošna ocenke, te falsifikujnel tlo potpis ili te našel taro časija. O problemi ovela samo pobaro.
O nagradibe šaj te ovel le kontra efekti. O Endru vakerela: „Te šaj te motivirina amare čhaja, počmingjem te nagradina la bašo šukar ocenke so ka anel. Ama adaleske mislinela sine samo ki nagrada. Keda dobinela sine lošno ocenka, poviše sine voznemirimi soske na dobinela sine nagrada nego baši ocenka.“
Nane rešenie te krivine e nastavnikon. Ako kerea akava, o čhavo šaj te mislinel kaj bašo šukar ocenke na valjani but te trudinel pe. Šaj te sikljol te kerel krivo e javeren bašo ple greške hem te adžikerel o javera te rešinen leskere problemija. Javere lafencar ov šaj te mukhel i prilika te sikljol nešto so ka ovel leske but važno ko životo — te prifatinel i odgovornost bašo ple postapke.
So šaj te kere
Kontrolirin tle čuvstvija. Ako sien holjame, odma ma keren lafi bašo ocenke e čhavea. „Me hem mi romni najšukar rezultatija isi amen keda siem smirime hem keda sikavaja sočuvstvo“, vakerela o Bret.
Biblisko načelo: „Sekova manuš valjani te ovel spremno te šunel, a pohari te kerel lafi, hem sigate te na holjanel“ (Jakov 1:19).
Dikh soj tano čače o problemi. Najčesta pričine soske e čhaven isi len lošna ocenke tane adava so isi len pritisok taro vrsnikija, meninena i škola, isi len trema, isi len familijarna problemija, na sovena dovolno, nane organizirime ili isi len slabo koncentracija. Ma anen odma zaklučok kaj o čhavo tano mrzalo.
Biblisko načelo: „Koj dikhela ispravno ko bukja, arakhela šukaripe“ (Izreki 16:20).
Ker than kote so o čhavo šaj pošukar te učinel. Ker raspored bašo domašna zadače hem bašo učibe. Ker than kote šaj o čhavo ko mir te pišinel plo domašno (bizi televizija hem mobilno). Te šaj pošukar o čhavo te koncentririnel pe, delin o domašno ko potikne delija, a na taro jekh puti. Jekh dad, o Hektor, kova so živinela ki Germanija, vakerela: „Ako džanaja kaj ka ovel le testi, sekova dive spreminaja amen pohari taro materijali, na mukhaja sa ko posledno momenti“.
Biblisko načelo: „Sa isi le plo vreme“ (Propovednik 3:1).
Pottiknin e čhave te učinel. So pošukar o čhavo haljola kobor valjani leske i škola akana, doborom poviše volja ka ovel le te sikljol. Na primer, i matematika ka pomožinel leske mudro te trošinel o pare.
Biblisko načelo: „Neka ovel tut mudrost, neka ovel tut sposobnost haljojbaske... Cenin la but“ (Izreki 4:5, 8).
Sovet: Pomožin tle čhaveske džikote kerela plo domašno, ama ma ker le namesto leste. O Endru vakerela: „Amari čhaj mislinela sine kaj amen ka završina lake o domašno hem čhinavgja te trudinel pe“. Sikav e čhave sar korkori te kerel plo domašno.