Bijamo sium ki diz Siudad Obregon, ko severno Meksiko. Sium sine pandžto taro enja čhave. Živinaja sine avri tari diz, kote so me dade sine le tikni farma. Sine amenge adathe but šukar, hem amari familija sine bahtali hem ko jekhipe. Ama keda sine man samo pandž berš o uragani uništingja amari farma hem mora sine te selina amen ki javer diz.

 Mo dad počmingja te zarabotinel šukar, ama ko isto vreme ulo alkoholičari. Adava lošno vlijajngja upro leskoro brako hem upri amende o čhave. Počmingjem te pušina, a o cigare čoraja sine taro mo dad. Keda sine man šov berš, prvo puti matiljum. Sigate palo adava me roditelija odvojngje pe hem man počmingje te oven man lošna navike.

 Mi daj lelja amen pea hem geli te živinel javere manušea. Ov na dela sine ple pare lake, hem amen našti sine te živina taro adava so mi daj zarabotinela sine. Agjaar amen o čhave počmingjem te kera buti bilo so ka arakha, hem edvaj ikljovaja sine ko krajo. Me čistinava sine kundre, bikinava sine maro, novine, mastike hem javera bukja. Isto agjaar hajbaske rodava sine ko kante gjubreske ko barvale naselbe.

 Keda sine man deš berš, jekh manuš vikingja ma te kerav leske buti ki e dizjakiri deponija. Prifatingjum i ponuda, mukhljum i škola hem geljum mange kheral. Platinela sine mange pohari taro jekh dolari ko dive, a hajbaske dela man sine adava so ka kheda taro gjubre. Živinava sine ki šupa koja so kergjum la taro bukja so arakhaja len sine ko gjubre. O manuša okolu mande koristinena sine bezobrazna lafija hem živinena sine nemoralno. But lendar drogirinena pe sine hem sine alkoholičarija. Adava sine najpharo periodi ko mo životo, rovava sine sekoja rat hem tresinava sine tari dar. Ladžava sine but adaleske so sium sine čorolo hem bizi škola. Živinava sine ko gjubre okolu trin berš sa džikote na selingjum man ko javer than ko Meksiko. Adari kergjum buti ko pole, khedava sine lulugja hem pamuko, khedava sine kompirija hem šekjerno trska.

 Palo štar berš irangjum man ko Siudad Obregon. Jekh mli tetka, koja so sine bajačka, dengja man jekh soba ko plo kher. Počmingje te oven man lošna sune hem uljum depresivno so čak razmislinava sine te mudarav man. Jekh rat molingjum man e Devleske: „Devla, ako postojneja, mangava te pendžarav tut hem te služinav tuke sekogaš. Ako isi čačutni religija, mangava te arakhav la“.

 Sekogaš mangava sine te džanav nešto poviše bašo Devel. Čak keda sium sine tikno, džava sine ko razna crkve, ama sa o religie razočaringje man. Nijekh lendar na kerela sine but lafi baši Biblija hem na pomožingje mange te džanav poviše bašo Devel. Nesave mangena sine poviše o pare, a taro nesave crkve o vernikija živinena sine nemoralno.

 Keda sine man 19 berš, jekh mlo džamutro vakergja mange kaj e Jehovaskere svedokija sikavgje leske so vakerela i Biblija bašo koristibe religiozna slike hem idolija. Čitingja mange o stihija tari 2. Mojseeva 20:4, 5. Adathe pišinela kaj na smejnaja te kera amenge rezbime idolija. Ko 5 stiho vakerela: „Na valjani te klanjine tut ili te služine lenge, soske me, o Jehova tlo Devel, sium Devel so rodela samo leske te služine“. Tegani mo džamutro pučlja man: „Ako o Devel koristinela slike hem idolija te šaj te kerel čudija ili ako mangela amen te koristina len keda obožavinaja le, tegani soske zabraninela len?“ Adava pottikningja man te razmislinav. Palo adava panda nekobor puti kergjem lafi baši Biblija. Doborom but uživinava sine ko adala razgovorija, so o vreme letinela sine mange.

 Pokasno, mo džamutro ingargja man ko sostanokija e Jehovaskere svedokongere. Sium sine vooduševimo taro adava so dikhljum hem so šungjum adari. Čak o tikne čhave učestvujngje ki programa hem šukar kergje lafi tari bina. Mislingjum mange: „Savo obrazovanie dobinena o manuša akate!“ Iako sine man bare bala hem na sine haravde, e Jehovaskere svedokija sine but ljubezna mancar. Jekh familija čak vikingja man ki večera palo sostanok.

 Taro proučibe i Biblija e Jehovaskere svedokoncar, sikliljum kaj o Jehova, o Devel, tano amaro Dad kova soj pherdo mangipe hem grižinela pe amenge bizi razlika savi tani amari finansisko sostojba, opštestveno status, koja rasa siem ili savo obrazovanie isi amen. Ov tano čače nepristrasno (Dela 10:34, 35). Konečno, doznajngjum poviše bašo Devel! Više na osetinava sine kaj mo životo tano čučo.

 Mlo životo celosno meningja pe, hem adava ko šukar. Čhinavgjum te pušinav, te pijav hem te koristinav bezobrazna lafija. I bari holi so sine man taro tiknipe našavdili zaedno mle lošno sunencar so mučinena man sine. Poviše na osetinava sine kaj na vredinava ništo, a adava mislinava sine taro tiknipe soske but cidingjum hem čhinavgjum e školaja.

 Akana isi man but šukar romni koja mangela e Jehova hem dela man bari poddrška. Akana služinava sar pokrainsko nadgledniko e Jehovaskere svedokongoro, ili javere lafencar, posetinava o sobranija te šaj te ohrabrinav hem te poučinav mle duhovno phralen hem phenjen. I Biblija, koja so sine sar iljači me dušake, hem o šukar obrazovanie taro Jehova promeningje man hem akana me na ladžava više korkori mandar.