Duj putija ko kurko, e Jehovase svedokija ićerena sastankija ko pe objektija kola vićinena pe Dvorane ando Kraljevstvo. Sar on izgledinena hem so šaj te sikljove ko odola sastankija?

•  Sar izgledinena o sastankija ki amari dvorana?

•  Sose bi ovela šukar te ave?

•  So phenena te vrsnikija?

 I Dvorana ando Kraljevstvo tani than kaj sikljovaja sar te ićera amen ko odova so čitinaja andi Biblija. O sastankija šaj te pomožinen tut:

•   te sikljove o ćaćipe kotar Devel.

•   te haljove so značini odova so ovela ko sveto.

•   te ove pošukar manuš.

•   te arakhe najšukar amalen.

 Da li đanđan? O than kaj ćedena pe e Jehovase svedokija vićini pe Dvorana ando Kraljevstvo odolese soj tano e Devleso Kraljevstvo tema andi koja najviše vaćeri pe odothe (Matej 6:9, 10; 24:14; Luka 4:43).

 Odova so ka šune odothe šaj but te pomožini tut. E biblijake načelija ando kola vaćeri pe ko Jehovase svedokonenge sastankija ka pomožinen tut te ove mudro (Poslovice 4:5). Odova značini so i Biblija šaj te pomožini tut te ane šukar odluke ko to životi. Isto ađahar, koro late šaj te arakhe o odgovorija ko pućiba, sar soj tane:

•   Sose živinaja?

•   Da li tano o Devel krivo sose o manuša patinena?

•   So ovela e manušencar ked merena?

 Akala tane samo disave teme ando javna govorija kola ićerena pe sastankija ko vikend:

•   Sose valjani te mukha i Biblija te utičini ko amaro životi?

•   Ko šaj te pomožini tuće ked isi tut pharipa?

•   So e Devleso Kraljevstvo već avdije ćerela amenđe?

 „Jekh mo amal andi škola alo ko sastanko. Bešlja me porodicaja hem amen dinđam le amare knjige te šaj te pratini o program. Palo sastanko, phenđa maje so posebno oduševinđe le o komentarija kola dinđe amare phralja hem phenja. Phenđa maje hem so on ki pi crkva nane len publikacije sar amen“ (Brenda).

 Da li đanđan? Ki amari dvorana šaj te khuve besplatno hem na ćedela pe prilog.

 Ka arakhe amalen kola ka ohrabrinen tut. I Biblija phenela so valjani te ćeda amen te šaj „te ohrabrina jekh jekhe“ (Jevrejima 10:24, 25). O manuša ko akava lošno sveto dikhena samo pes. Odolese osetinaja amen šukar maškaro manuša kola tane averćhane olendar, kola mangena e Devle hem averen.

 „Podijekh puti hijum tužno hem umorno. Ama, ked hijum maškaro sa odola manuša ki dvorana uvek osetinava man pošukar. Odolese, ked irinava man ćhere hijum bahtali hem spremno aso nevo dive“ (Eliza).

 Da li đanđan? Ko celo sveto isi pobuter ando 120 000 skupštine kotar Jehovase svedokija kola pe sastankija ićerena ko pobuter ando 60 000 dvorane. Odolese so sa pobuter hem pobuter manuša avena ko amare sastankija, svako berš gradinena pe oko 1 500 neve dvorane. a