ТЕМА ПА ОБЛОЖКА | САР И БИБЛИЯ ДОЖЫЛЯ ЖЫ КАЙ АМАРИ ВРЕМЯ?
И Библия дожыля жы каринг амари время
И БИБЛИЯ МОӶЛА ТЭ РИМОЙПЭ. Андэ дэлмутни время и Библия пэрэпистронас по папирусо и по перӷаменто (2 Тимофею 4:13) *. Со анда када моӷло бы тэ вижал?
О папирусо ӥто римойпэ, шындёлпэ, и ӥто ашэл тэмно. И учони-египтологоря Ричард Паркинсон и Стивен Куирки ԥэнэн, кай о папирусо, сар прожал долӷо время, во можэт тэ роспэрэлпэ и андар лэстэ ашэлпэ ек о пыло. Пэр лэстэ лэлпэ плесень и во лэл тэ тернёл сыростятар. И шуюмакоря, и крысы, и парнэ тиря лэн моӷли тэ схан. Дэсавэ папирусоря, савэ виарақлэ, линэ тэ гаравэн андо сыро ҭан, по свето. Через када вонэ май быстро линэ тэ римонпэ.
О перӷаменто сас май лашо, чем о папирусо, но во всаек римояспэ. Инке во римояспэ через кода, кай пала лэстэ на диқэнас, кай сас разно температура, сырость или марэлас о свето *. Кадяжэ лэс моӷли тэ поӷрызын и насекоми. Андэ ек книӷа ԥэнэнпэ пала дэлмутнэ рукописи: «Када ридко, кала вонэ ашэнпэ цыли» (Everyday Writing in the Graeco-Roman East). Если бы и библейски рукописи тэ тернён, тоди кода, со запистромэ адес андэ Библия, амэндэ на авелоп.
САР И БИБЛИЯ ДОЖЫЛЯ ЖЫ КАРИНГ АМАРИ ВРЕМЯ? Па иудейско законо кажно царё трэбуй сас «тэ стерэл пэсти копия па законо», када пэрви панч книӷи (Второзаконие 17:18). И переписчикоря, савэ драго терэнас пэстири дила, стердэ кадя бут копии па Свынто Писания, кай андо пэрво вико лэ Иисусостар, лэн можно сас тэ арақэс андэ любо синагога. Тэ арақэн най кати андо Израилё, но и дажэ андэ со май дурутнэ ҭана, андэ Македония! (Луки 4:16, 17; Деяния 17:11). Сар дэсавэ анда дэлмутнэ рукописи дожылэ жы каринг амарэ деса?
И свиткоря, савэ арақлэ паша Мёртво моря ашэлэпэ цыли через кода, кай вонэ сас андэ шукэ ҭана. Ай инке вонэ сас загарадэ андэ пещера, андэ глиняни сосудоря.
Ек спецыалисто па Нэво Завето, о Филиппо Камфорто ԥэнэн: «И иудеёря, кай тэ фэрин и свиткоря анда Свынто Писания, гаравэнас лэн андэ кувшыноря или андэ авэр сосуды». И христианоря кадяжэ терэнас. Важ када дэсавэ библейски рукописи арақлэ андэ глиняни сосудоря андэ кладовки, андэ пещеры, ай кадяжэ андэ месности, кай май шуко.
СО АНДА КАДА ВИЖЫЛЯ? Бут библейски рукописи, савэнди ужэ май бут, чем 2 000 бэрш, ашэлэпэ и андэ амарэ деса. Ни па ек дэлмутно тексто нинай кадя дэ бут копии, сар па библейски рукописи.
