Тугу барытын Айбыт Айааччынан дьиҥнээх Таҥара буолар. Кини саҕаланыыта да, бүтэр уһуга да суох (Саалтыыр 89:2). Биибилийэҕэ суруллубут үчүгэй сонуннары кини тиэрдибитэ (1 Тимофейга 1:11). Таҥара биһиэхэ олоҕу бэлэхтээбитэ, ол иһин биһиги киниэхэ эрэ сүгүрүйүөхтээхпит. (Арыллыы 4:11 ааҕыҥ.)

 Таҥараны дьоннортон ким да хаһан да көрбөтөҕө, тоҕо диэтэххэ кини халлааҥҥа олорор. Кини биһигиттэн быдан үрдүк уонна күүстээх (Иоанн 1:18; 4:24). Биһиги Таҥараны көрөр кыахпыт суох эрээри тугу айбытын көрөммүт, кини туһунан билиэхпитин сөп. Холобур, сир аһын арааһа уонна сибэкки эгэлгэтэ кини тапталын уонна дириҥ өйүн туоһулууллар. Оттон сир-халлаан муҥура суох киэҥэ кини күүһүн көрдөрөр. (Римляннарга 1:20 ааҕыҥ.)

 Таҥара туһунан өссө элбэҕи Биибилийэни ааҕан билиэххэ сөп. Онно Таҥара тугу сөбүлүүрүн, тугу сөбүлээбэтин туһунан этиллэр, итиэннэ кини дьоҥҥо хайдах сыһыаннаһарын уонна араас түбэлтэлэргэ хайдах быһыыланарын туһунан суруллар. (Саалтыыр 102:7—10 ааҕыҥ.)

 Иисус эппитэ: «Халлааҥҥа баар Аҕабыт! Эн аатыҥ айхалланыахтын» (Матфей 6:9). Таҥараны арааһынайдык ааттыыллар, ол эрээри кини биир эрэ ааттаах. Кини аата араас тылларга атын-атыннык суруллар. Сахалыы ол аат «Иегова» эбэтэр «Яхве» диэн буолар. (Саалтыыр 82:19 ааҕыҥ.)

 Биибилийэ үгүс тылбаастарыттан Таҥара аатын сотон баран, Айыы Тойон уонна Таҥара диэн суруйбуттара. Оттон маҥнайгы Биибилийэҕэ Таҥара аата 7 000 төгүл кэриҥэ суруллубута.  Иисус дьоҥҥо Таҥара туһунан кэпсииригэр мэлдьитин Таҥараны аатынан ааттыыр этэ. (Иоанн 17:26 ааҕыҥ.)

 Видеоролигы көрүҥ «Таҥара ааттаах дуо?»

 Билигин аан дойдуга олус элбэх эрэйдэнии баар. Ити Таҥара биһигини таптаабатын уонна биһиэхэ кыһаллыбатын көрдөрөрө буолуо дуо? Сорохтор Таҥара тургутан көрөөрү биһигини эрэйдиир дииллэр. Оннук этэр сыыһа буолар. (Иаков 1:13 ааҕыҥ.)

 Иегова киһиэхэ талар көҥүлү биэрбитэ. Итинник көҥүл иһин биһиги киниэхэ махтаныахпыт суоҕа дуо? Биһиги ол көҥүлү туһанан киниэхэ сулууспалыахпытын сөп (1 Петр 2:16). Ол эрээри үгүстэр атын суолу талаллар. Кинилэр атыттарга куһаҕаны оҥороллор. Ол иһин аан дойдуга олус элбэх эрэйдэнии баар. Оннук быһыыны көрөн Иегова олус хомойор. (Айыллыы 6:5, 6 ааҕыҥ.)

 Иегова биһигини таптыыр. Кини биһиги үөрэ-көтө, дьоллоох олохтонорбутун баҕарар. Кини сотору кэминэн куһаҕаны оҥорор дьону уонна эрэйи-муҥу суох оҥоруоҕа. Иегова билигин кылгас кэмҥэ эрэйдэниини көҥүллүүрүгэр улахан биричиинэ баар. Ханнык? Ол туһунан биһиги 8-с уруоктан билиэхпит. (2 Петр 2:9; 3:7, 13 ааҕыҥ.)

 Иегова биһиги киниэхэ чугаһыырбытын баҕарар. Ол иһин биһиги Таҥараҕа үҥэн кинини кытта кэпсэтиэхпитин наада. Кини хас биирдии киһини кытта билсиһиэн баҕарар (Саалтыыр 64:3; 144:18). Иегова бырастыы гынарга мэлдьи бэлэм. Сороҕор биһиги төһө да сыыһаны оҥордорбут иһин, кини кыһалларбытын көрөн олус үөрэр. Ити барыта биһиги төһө да аньыылаахпытын үрдүнэн, Таҥараны кытта чугас сыһыаны олохтуохха сөбүн көрдөрөр. (Саалтыыр 102:12—14; Иаков 4:8 ааҕыҥ.)

 Иегова биһиэхэ олоҕу бэлэхтээбитэ, ол иһин биһиги кинини кимнээҕэр да ордук таптыахтаахпыт (Марк 12:30). Таҥараны таптыырбытын кини туһунан билии ыламмыт уонна кини сокуоннарын тутуһаммыт көрдөрөбүт. Оннук гынан эһиги Иеговаҕа чугаһыаххытын сөп. (1 Тимофейга 2:4; 1 Иоанн 5:3 ааҕыҥ.)