Kudziwa munthu nee kusabveka basi ene kudziwa dzina yace na maonekero ace. Kudziwika kusaphataniza makhaliro a munthu, pinakhulupira iye na pinthu pinacita iye. Pinthu pyonsene pinancitisa kukhala ninga muna iye cincino, ndipyo pinancitisa kuti adziwike.

Kutowezera pinthu pinakhulupira imwe, kunatsidzikiza njira inakudziwirani anthu, pontho nee munatawirisa axamwali anu kukucitirani pisankhulo.

“Anthu azinji lero ndi ninga mabhoneka a mu loja akuti nkhabe sankhula okhene nguwo toera kubvala, mbwenye asacita kusankhulirwa na anthu.”—Adrian.

“Ine ndapfundza kucita pinthu pyadidi ngakhale m’makhaliro akunentsa. Ndisakwanisa kudziwa axamwali anga andimomwene thangwi ya pinacita iwo, pontho thangwi ya pinacita ine ndingakhala pabodzi na iwo.”—Courtney.

PINALONGA BHIBHLYA: “Lekani kupitiriza kutowezera anthu a dziko, mbwenye cinjani manyerezero anu.”—Aroma 12:2.

Musafunika kudziwa kuti ndimwe ntundu wanji wa munthu cincino, pontho musafuna kukhala ntundu wanji wa munthu. Imwe munakwanisa kucita pyenepi mungadzindikira pinthu pinakwanisa imwe kucita, pinacimwana imwe kucita na pinthu pinakhulupira imwe. Mibvundzo inatowera inakuphedzani toera kucita pyenepi.

Pinakwanisa Imwe Kucita Mwadidi: Ndi maluso api ali na ine? Ndi pinthu pipi pinakwanisa ine kucita mwadidi? (Mwacitsandzo: Ndisakoya mwadidi ndzidzi? Ndisakwanisa kudzitonga? Ndisaphata basa mwaphinga? Ndine wakupasa mwakudzala manja?) Ndi pinthu pipi pyadidi pinacita ine?

PINTHU PINAFUNA KUKUPHEDZANI: Kodi imwe musacimwana kudzindikira pinthu pyadidi pinakwanisa imwe kucita peno pinalonga imwe? Bvundzani anyakubala anu peno xamwali wanu wapantima toera akupangeni kuti ndi pinthu pipi pinakwanisa imwe kucita mwadidi, pontho thangwi yanji.

PINALONGA BHIBHLYA: “M’bodzi na m’bodzi asafunika kudinga mabasace, natenepa iye anadzakhala na thangwi toera kutsandzaya na pinacita iye, tayu mukulandanisa na pinacita munthu unango.”—Agalata 6:4.

Pinacimwana Imwe Kucita: Ndi makhundu api a makhaliro anga anafunika ine kuwangisira toera kusasanyira? Ndi ndzidzi upi unayeserwa ine toera kucita pyakuipa? Ndisafunika kudzitonga kakamwe mu pinthu pipi?

PINALONGA BHIBHLYA: “Tingalonga kuti: ‘Ife nkhabe madawo,’ tikunyengezeka tekhene.”—1 Juwau 1:8.

Pinthu Pinakhulupira Imwe: Ndi makhaliro api anatowezera ine, pontho thangwi yanji? Kodi ine ndisakhulupira Mulungu? Ndi cinthu cipi cinandipasa cinyindiro cakuti Mulungu alipodi? Ndi pinthu pipi pinaona ine kuti ndi pyakusowa ulungami, pontho thangwi yanji? Ndi pinthu pipi pinakhulupira ine kuti pinadzacitika kutsogolo?

PINALONGA BHIBHLYA: “Luso yakunyerezera inakukoya, pontho luso yakubvesesa inakutsidzikiza.”—Misangani 2:11.