Ndi Ipi Dzina ya Mulungu? Mulungu alonga ekhene: ‘Ine ndine Yahova. Ineyi ndi dzina yanga.’ (Izaiya 42:8, Tradução do Novo Mundo) Dzina ya Mulungu isagumanika maulendo akupiringana 7.000 m’Bhibhlya. Mbwenye athumburuzi azinji asabulusa dzina ineyi mbaikha cidzo cakuti “Mbuya.” Yahova asafuna kuti imwe mukhale xamwali wace, natenepa asakuphembani toera ‘mubvekese dzina yace.’—Masalmo 105:1.

Pidzo Pya Yahova. Bhibhlya isalonga Yahova na pidzo ninga “Mulungu,” “Wamphambvu Zonsene,” “Nciti,” “Baba,” “Mbuya,” peno “Ntongi Wankulu.” Maphembero mazinji anagumanika m’Bhibhlya, anthu aphatisira kakamwe pidzo pyenepi mwacilemedzo, pontho aphatisirambo dzina ya Yahova.—Danyele 9:4.

 Mulungu Akhala Tani? Mulungu ndi nzimu wakukhonda kuoneka. (Juwau 4:24) Bhibhlya isalonga kuti “Cipo munthu aona kale Mulungu.” (Juwau 1:18) Bhibhlya isalonga mabvero a Mulungu. Anthu anakwanisa kuntsukwalisa, peno ‘kuntsandzayisa.’—Misangani 11:20; Masalmo 78:40, 41.

Makhaliro Akupambulika a Mulungu. Mulungu ndi wakusowa sankhulo, iye asatawira anthu a madzindza onsene na a mitundu yonsene. (Mabasa 10:34, 35) Pontho iye ndi ‘wantsisi, wakukoma ntima, wakupirira, waufuni kakamwe na waundimomwene.’ (Eksodo 34:6, 7, NM) Mbwenye, Mulungu ali na makhaliro manai akupambulika.

Mphambvu. Iye ndi ‘Mulungu Wamphambvu Zonsene,’ iye ali na mphambvu zakukhonda landanisika toera kukwanirisa mapikiro ace.—Genesi 17:1.

Udziwisi. Udziwisi wa Mulungu ndi wapadzulu kupiringana onsene. Natenepa Bhibhlya isalonga kuti iye “ndiye basi waudziwisi kakamwe.”—Aroma 16:27.

Ulungami. Ndzidzi onsene Mulungu asacita pinthu pyadidi. pinacita iye ndi ‘pyakulungama,’ pontho iye ‘cipo asacita pinthu pyakukhonda kulungama.’—Deuteronomyo 32:4.

Ufuni. Bhibhlya isalonga kuti “Mulungu ndi ufuni.” (1 Juwau 4:8) Mulungu nee asapangiza basi ufuni, mbwenye iye ndi ufuni. Pyonsene pinacita iye pisatsogolerwa na ufuni, pontho pisatiphedza munjira zizinji.

Uxamwali wa Mulungu na Anthu. Mulungu ndi Babathu waufuni wa kudzulu. (Mateu 6:9) Tingan’khulupira tinakwanisa kukhala axamwali ace. (Masalmo 25:14) Mulungu asakuphembani toera munfendedzere cifupi kubulukira mu phembero, pontho ‘mupereke kuna iye pinthu pyonsene pinakudzudzumisani, thangwi iye asakutsalakanani.’—1 Pedhru 5:7; Tiyago 4:8.

Yezu Nee Ndi Mulungu. Yezu ndiye adatoma kucitwa na Mulungu. Ndi thangwi yace Bhibhlya isancemera Mwana wa Mulungu. (Juwau 1:14) Pidamala kucitwa Yezu, Yahova aphatisira mwanace unoyu wautombo ninga ‘mesiri waluso’ toera kucita pinthu pyonsene na anthu onsene.—Misangani 8:30, 31; Akolose 1:15, 16.

 Yezu Kristu Cipo Alonga Kuti Iye Ndi Mulungu. Mbwenye iye alonga: ‘Ndine muimiriri wa Mulungu, Iye ndiye adandituma.’ (Juwau 7:29) Ntsiku ibodzi, pikhacedza iye na m’bodzi mwa anyakupfundzace, Yezu alonga kuti Yahova ndi “Babanga, wakuti ndi Babanumbo” na “Mulungu wanga, wakuti ndi Mulungu wanumbo.” (Juwau 20:17) Pidafa Yezu, Yahova amulamusa muli akufa mbaenda kudzulu, pontho ampasa mphambvu mbamuikha ku nkono Wace wamadyo.—Mateu 28:18; Mabasa 2:32, 33.

Yezu Kristu Anakwanisa Kukuphedzani Toera Mukhale Xamwali wa Mulungu

Yezu abwera pa dziko yapantsi toera kutipfundzisa thangwi ya Babace. Yahova alonga tenepa thangwi ya Yezu: “Uyu ndi Mwananga wakufunika, mbvereni.” (Marko 9:7) Nkhabepo munthu unango anadziwa mwadidi Mulungu kusiyapo Yezu. Iye alonga: “Nkhabe munthu anadziwa Baba kupiringana Mwana na munthu onsene anafuna kupfundziswa na Mwana thangwi ya iye.”—Luka 10:22.

Yezu asapangiza mwadidi makhaliro a Mulungu. Yezu atowezera makhaliro a Babace, natenepa pyenepi pyancitisa kulonga: “Ule anandiona akuonambo Baba.” (Juwau 14:9) Yezu aphedza anthu toera akhale axamwali a Mulungu thangwi iye akhatowezera ufuni wa Babace mu pyonsene pikhacita iye na pikhalonga iye. Iye alonga: “Ine ndine njira, undimomwene na umaso. Nkhabe munthu anaenda kuna Baba mbakhonda kupita na pana ine.” (Juwau 14:6) Pontho iye alonga: “Alambiri andimomwene anadzalambira Baba mukutsogolerwa na nzimu na undimomwene, thangwi mwandimomwene Baba asasaka anthu ninga anewa toera kumulambira.” (Juwau 4:23) Mwanyerezera kale pyenepi? Yahova asasaka anthu ninga imwe akuti asafuna kudziwa undimomwene unalonga pya iye..