KOTA MAMA-TENE NI
A-Témoin ti Jéhovah ayeke azo wa?
“Mbi hinga Mike depuis. Lo yeke Témoin ti Jéhovah. Me, mbi hinga li ti mbi na eglize ti lo ni so ape. Jéhovah ni so ayeke zo wa? A-Témoin ti Jéhovah ayeke sara ka fête ape ngbanga ti nyen? Secte la Mike ayeke na yâ ni so ape?”—Becky, Californie, États-Unis.
“Na ngoi so aTémoin ti Jéhovah akomanse ti manda Bible na avoizin ti mbi, mbi hunda tere ti mbi, mbi tene: ‘Iri Témoin ti Jéhovah ni so aye ti tene nyen la? So bizarre iri ape!’”—Zenon, Ontario, Canada.
“Mbi na wali ti mbi e pensé so aTémoin ti Jéhovah aga ka ti bâ e gi ti joué na ndo ti e, ndali ti so e yeke gue ka na eglize ape. Asingana akota eglize so awara lege pëpe ti mû na e ye so e yeke gi, si mara ti bizarre secte tongaso la apeut ti mû na e ni?”—Kent, Washington, États-Unis.
“Ti vrai ni, mbi hinga ala nzoni ape nga mbi hinga aye so ala mä na bê na ni ape.”—Cecilie, Esbjerg, Danemark.
Peut-être mo bâ ala awe na fango tënë da na da wala na ando so azo ayeke dä mingi, na ngoi so ala yeke kangbi ambeti ti Nzapa nga ala yeke manda Bible na azo. Wala ala la amû na mo mbeti so na tïtî mo so. Me, peut-être mo ngbâ ti hunda tere ti mo wala aTémoin ti Jéhovah ayeke azo wa biani. Wala mo kue mo yeke na oko pensé ti ambeni zo so a fa ni na nduzu ge so.
Tongana mo kue mo yeke hunda tere ti mo tongaso, na ndo wa la mo peut ti wara akiringo tënë ni? Mo yeke sara tongana nyen ti hinga aye so aTémoin ti Jéhovah amä na bê na ni, ndo so ala yeke wara ka nginza dä ti sara na kua ti ala ti fango tënë nga ti leke na ada ti Nzapa ti ala? Nga, ndali ti nyen la ala yeke ga ka na yanga-da ti mo wala ala yeke ga na mbage ti mo na ando so azo ayeke dä mingi?
Cecilie, so e sara fade tënë ti lo, atene: “Mbi diko gbâ ti ambeti na ndo ti aTémoin ti Jéhovah na ndo ti Internet. Mbi mä ambeni tënë ni na yanga ti azo, nga mbi mä gbâ ti asioni tënë so azo atene na ndo ti ala. Ye so asara si mbi yeke na mbeni sioni bango ndo na ndo ti aTémoin ti Jéhovah.” Me na pekoni, Cecilie asara lisoro na aTémoin ti Jéhovah ni wani, na lo wara avrai kiringo tënë na ahunda ti lo.
Mo ye ti wara avrai kiringo tënë na ahunda ti mo na ndo ti aTémoin ti Jéhovah? E wa mo ti gi ti sara lisoro na avrai zo so apeut ti mû na mo atâ kiringo tënë ni, so ti tene aTémoin ti Jéhovah ni wani; ala la asigigi na mbeti so (aProverbe 14:15). E pensé so atanga ti atënë ti yâ mbeti so ayeke aidé ande mo ti hinga e nzoni, ti hinga aye so e mä na bê na ni nga na nda ti kua so e yeke sara ka.
