“Ia olioli i le faamoemoe. Ia tutumau i puapuaga. Ia finafinau i le tatalo.”—Roma 12:12, Faaliliuga a le Lalolagi Fou.

 “Ia olioli i le faamoemoe, ia onosai i le puapuaga, ia finafinau i le tatalo.”—Roma 12:12, Tusi Paia Samoa—Lomiga 1969.

 I lenei mau, na faalaeiauina ai e le aposetolo o Paulo Kerisiano i Roma, e faia ni mea se tolu e fesoasoani iā i latou e faamaoni ai pea e ui i sauāga ma isi tulaga faigatā.

 “Ia olioli i le faamoemoe.” Ua maua e Kerisiano le faamoemoe matagofie o le ola e faavavau. O nisi e ola i le lagi ae o le toʻatele e ola i le lalolagi parataiso. (Salamo 37:29; Ioane 3:16; Faaaliga 14:1-4; 21:3, 4) E aofia i lenei faamoemoe le aveesea e le Malo o le Atua a o faafitauli uma o loo pagatia ai tagata. (Tanielu 2:44; Mataio 6:10) E mafai e tagata tapuaʻi o le Atua ona olioli pea a o onosaia faigatā, ona e latou te mautinoa e moni lo latou faamoemoe, ma o lo latou tutumau e faafiafiaina ai le finagalo o le Atua.—Mataio 5:11, 12; Roma 5:3-5.

 “Ia tutumau i puapuaga.” I le Tusi Paia o le veape Eleni ua faaliliuina “tutumau,” e masani ona faasino atu i le “tauivi pea nai lo o le sola ese; finafinau; tūmausalī.” “E lē o ni tagata o le lalolagi” b soo o Keriso, o lea e latou te faatalitalia ai sauāga ma e manaʻomia ai ona latou tutumau. (Ioane 15:18-20; 2 Timoteo 3:12) Pe a maumauaʻi se Kerisiano e auauna pea i le Atua e ui lava o le a ia feagai ai ma faigatā, o le a faamalosia ai lona faatuatua e tauia o ia e le Atua. (Mataio 24:13) O le iʻuga, o le a mafai ai ona ia tumau ma le onosaʻi ma le olioli e ui i tulaga faigatā.—Kolose 1:11.

 “Ia finafinau i le tatalo.” Ina ia tumau ma le faamaoni i le Atua, ua faalaeiauina pea Kerisiano e tatalo e lē aunoa. (Luka 11:9; 18:1) E latou te saʻili pea mo le taʻitaʻiga a le Atua, ma faalagolago iā te ia i vala uma o le olaga. (Kolose 4:2; 1 Tesalonia 5:17) E latou te talitonu e talia e le Atua a latou talosaga ona e latou te usitaʻia ana poloaʻiga, ma faia le mea e sili e faafiafiaina ai o ia. (1 Ioane 3:22; 5:14) E latou te iloa foʻi pe afai e latou te finafinau i le tatalo, e foaʻi mai e le Atua le malosi e latou te manaʻomia e tumau ai ma le faamaoni e ui i faafitauli.—Filipi 4:13.

 Pe ā o le 56 T.A., na tusi atu ai Paulo i Kerisiano sa nonofo i Roma. I le mataupu e 12 o lana tusi, na ia avatu ai fautuaga aogā i le auala e faaalia ai uiga faa-Kerisiano, le auala e feutagaʻi ai ma isi uso faapea tagata lautele, ma le auala e tali atu ai ma le filemu pe a sauāina. (Roma 12:9-21) Na talafeagai lelei na fautuaga mo Kerisiano na nonofo i Roma, ona e lē o toe umi ae latou feagai ma sauāga ogaoga.

 I ni nai tausaga mulimuli ane ai i le 64 T.A., na matuā faatamaʻia ai le aai o Roma i se afi. Na salalau solo le tala o le emeperoa o Nero na faapogaia le afi. Ae e tusa ai ma le faamatalaga a Tacitus o se tusitala o le talafaasolopito o le malo o Roma, na taumafai Nero e puipuia o ia e ala i le tuuaʻi o Kerisiano. O le iʻuga na feagai Kerisiano ma sauāga ogaoga. O le fautuaga a Paulo i le auala e tutumau ai i sauāga, na fesoasoani iā i latou e toʻafilemu ma faamaoni pea i lenā taimi faigatā. (1 Tesalonia 5:15; 1 Peteru 3:9) Maʻeu se faaaʻoaʻoga lelei mo tagata tapuaʻi o le Atua i aso nei!

 Ia matamata i lenei vitiō puupuu o loo aumaia ai se aotelega o le tusi o Roma.