O ai Ieova?

PLAY

O ai Ieova?

Le tali a le Tusi Paia

I le Tusi Paia, o Ieova o le Atua moni ma o Lē na foafoaina mea uma. (Faaaliga 4:11) Na tapuaʻi perofeta o Aperaamo ma Mose iā te ia, e pei ona faia e Iesu. (Kenese 24:27; Esoto 15:1, 2; Ioane 20:17) O ia o le Atua o “le lalolagi atoa” ae e lē mo na o se tagata e toʻatasi.—Salamo 47:2.

O Ieova o le suafa tutasi lea o le Atua e pei ona faailoa mai i le Tusi Paia. (Esoto 3:15; Salamo 83:18) O lena suafa na maua mai i le veape Eperu o lona uiga “e gaoioi,” ma o le toʻatele o tagata atamamai e manatu o le uiga o lena suafa, “E Gaoioi o Ia e Tusa ai ma Tulaga Manaʻomia.” E fetaui lelei ma le matafaioi a Ieova i le avea ai o ia ma Lē na foafoaina mea ma o Lē na te faataunuuina ana folafolaga. (Isaia 55:10, 11) Ua fesoasoani le Tusi Paia iā i tatou e iloa le ituaiga Atua e iai Ieova, aemaise lona uiga autū o le alofa.—Esoto 34:5-7; Luka 6:35; 1 Ioane 4:8.

O le igoa Ieova o le faaliliuga faa-Peretania lea o le upu Eperu mo le suafa o le Atua, lea e taʻua o le Tetakalamatone (YHWH). I Eperu anamua, e leʻi iloa le faaleoga saʻo o le suafa o le Atua. Peitaʻi, ua leva ona iai le suafa o “Ieova” i le gagana Peretania, ma o le uluaʻi taimi na aliaʻe mai ai, o le faaliliuga a Viliamu Tiniteli o le Tusi Paia i le 1530. a

Aiseā e leʻi iloa ai le faaleoga o le suafa o le Atua i Eperu anamua?

Na tusia le gagana Eperu anamua e aunoa ma ni vaueli, ae na o konesane. Na faigofie ona maua e tagata faitau e tautatala i le gagana Eperu, vaueli e fetaui lelei. Peitaʻi, ina ua uma ona tusia le Tusitusiga Paia Eperu (“Feagaiga Tuai”), e toʻatele tagata Iutaia na talia talitonuga e lē faavaea, lea e natia ai le suafa totino o le Atua. Pe a latou faitau leotele se mau o loo taʻua ai le suafa o le Atua, e latou te suia i le taʻu “Alii” po o le “Atua.” Ina ua mavae le tele o senituri, na salalau atu nei talitonuga ma leiloa ai le faaleoga o le suafa o le Atua i aso anamua. b

Na manatu nisi o le faaleoga o le suafa o le Atua o le “Yahweh,” ae e ese foʻi manatu o nisi. I le Tusi Tāʻai mai i le Sami Mate, o loo iai se vaega o le tusi o Levitiko i le gagana Eleni o loo faaliliuina ai lenei igoa i le Iao. Na manatu tusitala Eleni o le faaleoina o lenei igoa, o le Iae, I·a·beʹ, ma le I·a·ou·eʹ, ae e leai ma se faamaoniga e iloa ai o nei faaleoga na faaaogā i Eperu anamua. c

Manatu sesē e faatatau i le suafa o le Atua i le Tusi Paia

Manatu sesē: O faaliliuga na latou faaaogāina le igoa “Ieova,” na latou faaopoopo i ai lena suafa.

Le mea moni: E tusa ma le 7,000 taimi o loo taʻua ai i le Tusi Paia le upu Eperu mo le suafa o le Atua, lea o loo tusia i le Tetakalamatone. d O le tele o faaliliuga e leai ni faamaoniga, ua latou aveesea le suafa o le Atua ma suia i le taʻu e pei o le “Alii.”

Manatu sesē: E lē manaʻomia e le Atua o Lē e ona le malosi uma lava se suafa tutasi.

Le mea moni: Na faagaeeina e le Atua tusitala o le Tusi Paia e faaaogā lona suafa i le faitau afe o taimi, ma na ia faatonuina i latou na tapuaʻi iā te ia ina ia faaaogā lona suafa. (Isaia 42:8; Ioelu 2:32; Malaki 3:16; Roma 10:13) O le mea moni, na taʻusalaina e le Atua perofeta pepelo o ē na taumafai e faagalo e tagata lona suafa.—Ieremia 23:27.

Manatu sesē: Ina ia mulimuli i tū faa-Iutaia, e tatau ona aveese le suafa o le Atua mai i le Tusi Paia.

Le mea moni: E moni na mumusu nisi ʻautusiupu Iutaia e faaleo le suafa o le Atua. Peitaʻi, e latou te leʻi aveesea ai le suafa o le Atua mai i a latou kopi o le Tusi Paia. E tusa po o le ā le tulaga, e lē finagalo le Atua ia tatou mulimuli i tū masani a tagata, lea e lē ōgatusa ma ana poloaʻiga.—Mataio 15:1-3.

Manatu sesē: E lē tatau ona faaaogā le suafa o le Atua i le Tusi Paia, ona e leʻi iloa le auala saʻo na faaleo ai i le faa-Eperu.

Le mea moni: Ua faailoa mai i lena manatu, e faatalitalia e le Atua tagata e tautatala i gagana eseese e faaleo lona suafa, i le auala saʻo e tatau ona iai. Peitaʻi, ua faailoa mai i le Tusi Paia, e eseese le auala na faaleo ai igoa e i latou e tautatala i gagana eseese na tapuaʻi i le Atua i le taimi ua teʻa.

Seʻi iloilo le faaaʻoaʻoga a Iosua o se faamasino i Isaraelu. Na faaleoina e Kerisiano i le uluaʻi senituri na tautatala i le gagana Eperu le igoa o Iosua o Yehoh·shuʹaʽ, a o i latou na tautatala i le gagana Eleni na latou faaleo o I·e·sousʹ. O loo faamauina i le Tusi Paia le faaliliuga faa-Eleni o le igoa Eperu o Iosua. Ua faailoa mai ai na faaaogā e Kerisiano igoa na taatele i la latou gagana.—Galuega 7:45; Eperu 4:8.

O le taʻiala lava lea e tasi e faaaogā pe a faaliliuina le suafa o le Atua. Peitaʻi, o le mea e sili atu ona tāua nai lo o le faaleoina o lena igoa, o le tuu lea o le suafa o le Atua i le Tusi Paia.

a I faaliliuga a Tiniteli i tusi muamua e lima o le Tusi Paia, na ia faaaogā ai le taʻu “Iehouah.” Na suia le gagana Peretania a o faagasolo taimi ma na toe teuteuina ai le sipelaina o le suafa o le Atua. O se faataʻitaʻiga i le 1612, na faaaogā e Henry Ainsworth le taʻu “Iehovah” i lana faaliliuga o le tusi o Salamo. I le 1639 ina ua toe teuteuina lana faaliliuga, na ia faaaogā ai le taʻu “Ieova.” Na faaaogā foʻi e le ʻaufaaliliu o le Tusi Paia o le American Standard Version lea na lomia i le 1901 le taʻu “Ieova”, i mea o loo iai le suafa o le Atua i tusitusiga Eperu.

b O loo taʻua i le Lomiga Lona Lua o le New Catholic Encyclopedia Tusi 14, itulau 883-884 e faapea: “Ina ua uma ona faaaunuua tagata Iutaia, na amata ona manatu e lē tatau ona toe faaleoina le igoa Yahweh ona e paia, ae ua mananaʻo e sui i taʻu e pei o le ADONAI po o le ELOHIM.”

c Mo nisi faamatalaga, tagaʻi i le Faaliliuga a le Lalolagi Fou i le Faaopoopoga 1 “Ua Tusia le Suafa o le Atua i Tusitusiga Paia Eperu ma Tusitusiga Paia Eleni.”

d Tagaʻi i le Theological Lexicon of the Old Testament, Tusi 2, itulau 523-524.