E leai. E lē o faapea mai le Tusi Paia e leaga tupe, pe faapea mai foʻi o le pogai lea o mea leaga uma. O le faaupuga taatele, “o tupe o le pogai o mea leaga uma,” o se faaupuga e lē o uma ona sii mai i se mau o le Tusi Paia, ma ua faasesēina ai tagata. O loo faapea mai le Tusi Paia “o le manaʻo tele i tupe o le pogai lea o mea leaga uma.” a—1 Timoteo 6:10, King James Version.

•  O le ā le manatu o le Tusi Paia e faatatau i tupe?

•  Aiseā ua lapataʻi mai ai le Tusi Paia e faatatau i le manaʻo tele i tupe?

•  E faapefea ona tatou maua aogā mai fautuaga a le Tusi Paia e faatatau i tupe?

•  Mau o le Tusi Paia e faatatau i tupe

 Ua taʻua i le Tusi Paia le aogā o tupe pe a faaaogā ma le atamai. E mafai ona avea “ma puipuiga.” (Failauga 7:12) E lē gata i lea, o loo taʻuleleia foʻi e le Tusi Paia i latou e faaalia le limafoaʻi i isi, e aofia ai ma meaalofa tupe.—Faataoto 11:25.

 Ae i le taimi e tasi, ua lapataʻi mai le Tusi Paia e faatatau i le faamuamua o le saʻilia o tupe i o tatou olaga. Ua faapea mai: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou.” (Eperu 13:5) O le manatu tāua, e tatau ona faaaogā ma le atamai tupe ma ʻalofia le tuliloaina o le tamaoaiga. Nai lo o lea, e tatau ona tatou lotomalilie i mea e tatou te manaʻomia moni e pei o meaʻai, lavalava, ma fale.—1 Timoteo 6:8.

 E lē maua e i latou e mananaʻo tele le ola e faavavau. (Efeso 5:5) O se tasi o māfuaaga, ona o le manaʻo tele o le ifo i tupua lava lea po o tapuaʻiga sesē. (Kolose 3:5) E lē gata i lea, o lo latou naunau e faamalie lo latou manaʻo tele, e iʻu ai i le lē amanaʻia o tapulaa talafeagai. O loo taʻua i le Faataoto 28:20, o i latou e “faataalise ona saʻili i ʻoa e lē tumau ona mamā.” E ono faaosoosoina foʻi i latou e faia soligatulafono e pei o le taufaamataʻu, faiga taufaavalea, ave faamalosi o tagata, po o le fasioti tagata.

 E tusa foʻi pe e lē faia e nisi amioga leaga ona o le manaʻo tele i tupe, ae e iai isi aafiaga lē lelei. Ua faapea mai le Tusi Paia, “o ē fia mauʻoa, e paʻuʻū i latou i le faaosoosoga ma le mailei, ma le tele o tuʻinanauga valea ma le tigā.”—1 Timoteo 6:9.

 Pe afai e tatou te lē lafoaʻia tapulaa tau amio ma le itu faaleagaga ina ia saʻilia ai tupe, o le a lelei o tatou faalogona, ma maua ai le finagalo malie ma le lagolagosua a le Atua. Ua folafola mai e le Atua iā i latou e taumafai e faafiafia o ia e faapea: “Ou te lē tuua lava oe, ma ou te lē tuulafoaʻia lava oe.” (Eperu 13:5, 6) Ua ia faamautinoa mai foʻi, “o le tagata e faamaoni e tele ona faamanuiaga.”—Faataoto 28:20.