“O le manaʻo tele i tupe o le pogai lea o mea leaga eseese uma.”​—1 Timoteo 6:10.

TALA A TAGATA

O tupe o le pogai o mea leaga uma.

LE MANATU O LE TUSI PAIA

E lē leaga tupe, a o le “manaʻo tele i tupe o le pogai lea o mea leaga.” I le Tusi Paia, o loo taʻua ai e le tupu o Solomona mea leaga po o iʻuga leaga e tolu e oo i se tasi e manaʻo tele i tupe. Popole: “O le tele o mea a le tagata mauʻoa e lē mafai ai ona moe o ia.” (Failauga 5:12) Lē faamalieina: “O lē e fiafia i siliva, e lē faamalieina i siliva, o lē e fiafia i le ʻoa e lē faamalieina i ana tupe maua.” (Failauga 5:10) Faaosoosoina ai e solia le tulafono: “O lē e faataalise ona saʻili i ʻoa e lē tumau ona mamā o ia.”​—Faataoto 28:20.

“Ua fai foʻi tupe ma puipuiga.”​—Failauga 7:12.

TALA A TAGATA

E te maua le fiafia ma le puipuiga pe a tele au tupe.

LE MANATU O LE TUSI PAIA

O le manatu e faapea e te maua le fiafia ma le puipuiga pe a tele au tupe, o se tasi lenā o vala o “le malosi taufaasesē o le ʻoa.” (Mareko 4:19) Peitaʻi, ʻe aogā tupe i mea uma.’ (Failauga 10:19) O se faataʻitaʻiga, e tatou te faaaogā tupe e faatau ai mea e tatou te manaʻomia e pei o meaʻai, ma totogi ai togafitiga faafomaʻi.​—2 Tesalonia 3:12.

E fesoasoani foʻi iā te oe e tausia ai lou aiga, auā o loo taʻua i le Tusi Paia: “Afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili lona leaga i lo le tagata e lē faatuatua.”​—1 Timoteo 5:8.

ʻE muamua nofo i lalo ma faitau tupe o le a faaalu.’​—Luka 14:28.

LE MANATU O LE TUSI PAIA

Ia faaaogā tupe i se auala e finagalo malie i ai le Atua. (Luka 16:9) E tāua foʻi le faaaogā ma le faautauta ma le faamaoni. (Eperu 13:18) Ina ia ʻalofia le saisaitia o i tatou i le tele o aitalafu, e tatau ona ʻaunoa o tatou olaga ma le manaʻo tele i tupe.’​—Eperu 13:5.

E ui e lē o taʻusalaina i le Tusi Paia aitalafu, ae o loo lapataʻi mai e faapea: “E fai ma auauna le tagata aitalafu i le tagata na nonō mai ai.” (Faataoto 22:7) Ia ʻalofia le vave faatau o so o se mea e te manaʻonaʻo i ai, auā o i “latou e faataalise ona faia mea e iʻu ai i le mativa.” (Faataoto 21:5) Nai lo lea, ia ʻtuu ese se mea e tusa ma mea ua e maua,’ ma teu au tupe mo mea e sili ona tāua iā te oe.​—1 Korinito16:2

O loo faalaeiauina i tatou e le Tusi Paia ina ia “foaʻi atu pea.” (Luka 6:38) E ao iā i latou e mananaʻo e faafiafia le Atua ona limafoaʻi, auā “e alofa le Atua i lē e foaʻi ma le lotofiafia.” (2 Korinito 9:7) O lea la, “aua neʻi galo le faia o mea lelei, ma le tufa atu o mea i isi, auā o taulaga faapena e matuā fiafia i ai le Atua.”​—Eperu 13:16.