O PUSI o ni meaola e tele ina feoaʻi i le pō. E aogā a latou ʻava pe a oo ina pogisa, ona e fesoasoani e iloa ai mea o loo latalata ane, ma suʻe ai manu ia e fai ma a latou meaʻai.

Ia Mātau: O le ʻava a le pusi e fesootaʻi atu i neula ia e tele ona pito. E faigofie ona lagona mea e nei neula, e oo lava i sina gaoioi o le ʻea. O lea, e aogā le ʻava a le pusi pe a pogisa, auā e mafai ai ona ia iloa mea loo latalata ane e aunoa ma le vaai atu i ai.

Talu ai e faigofie ona lagona e le ʻava a le pusi le gaoioi o le ʻea, o lea e faaaogā ai e le pusi lana ʻava ina ia iloa ai le tulaga ma le gaoioi a se mea po o se manu e na te ʻaina. E fesoasoani foʻi i le pusi e fua ai le telē o se va, a o leʻi taumafai e ui atu i ai. Ua taʻua i le Encyclopædia Britannica, “ua na o ni nai aogā o le ʻava (vibrissae) a le pusi o loo iloa e tagata: peitaʻi, ua iloa e faapea, pe afai e ʻoti ese, o le a lē atoatoa le malosi o le pusi e fai ai se mea.”

Ua faia e saienitisi ni masini (robots) e iai ni faailoilo ua faataʻitaʻi i le ʻava a le pusi, ina ia mafai ai e nei masini ona feoaʻi solo e aunoa ma le lavevea. Ua taʻua e Ali Javey, o se saienitisi mai le Iunivesite o Kalifonia, i Berkeley, o nei faailoilo ua taʻua o e-whiskers, e tatau ona tele ona aogā i masini, i tagata e faaaogāina nei masini, ma isi auala e faaaogā ai.

O le ā sou manatu? Pe na teʻi lava ua iai le ʻava a le pusi ma ona aogā? Pe na foafoaina?