O Masi mo Aʻu Taʻifau
NA TUSI mai Nick e nofo i Oregon i le Iunaite Setete, “I le tau e totogo ai mea i le tausaga 2014, na amata ai ona ou alu e faasavali aʻu tamaʻi maile e lua i le taulaga i le aai ou te nofo ai. E masani ona faatutū fata tusi a Molimau a Ieova i le ogatotonu o le taulaga. E onomea le auala e latou te laʻei ai ma e faamālō ma mata ʻataʻata i so o se tasi.”
“Na agalelei Molimau i tagata ma e faapena foʻi i aʻu maile. I se tasi aso a o tū Elaine i autafa o le fata tusi, na ia tuu ai i aʻu maile ni masi. Na amata ai i ina ona fai ma masani a aʻu maile le ō i le ʻmea e maua mai ai masi,’ i taimi uma e matou te savavali ai.
“Ua faitau masina talu ona fiafia aʻu maile i a latou masi, ae na ou fiafia foʻi i a matou talanoaga pupuu ma Molimau. Peitaʻi, ou te leʻi manaʻo e faamasani tele i nei Molimau. I le taimi lenā ua silia ma le 70 oʻu tausaga, ae ou te lē o mautinoa po o ā talitonuga o Molimau a Ieova. Na ou lē fiafia foʻi i lenā taimi i le lotu Porotesano, ma na ou manatu ai e sili loʻu suʻesuʻe e aʻu lava ia o le Tusi Paia.
“I lenā taimi na ou vaaia foʻi isi Molimau o tutū i autafa o a latou fata tusi i vaega eseese o le taulaga. E faaleuō foʻi o latou uiga. E latou te taliina i taimi uma mai i le Tusi Paia aʻu fesili, o le māfuaaga lenā na atili ai ona ou maufaatuatuaina i latou.
“I se tasi aso na fesili mai ai Elaine, ʻPe e te talitonu o meaola o se tasi o meaalofa mai i le Atua?’ Na ou tali atu, ʻIoe ou te matuā talitonu lava i ai!’ Na faitau mai loa e Elaine le Isaia 11:6-9. I lenā taimi na ou manaʻo ai e fia iloa atili le Tusi Paia e ui na ou faatalatū e talia ni lomiga mai i Molimau.
“A o faagasolo aso na faafiafiaina aʻu i a matou talanoaga pupuu ma uigā ma Elaine ma lana tane o Brent. Na la faalaeiauina aʻu e faitau le Mataio e oo i le Galuega, ina ia malamalama ai i le uiga o le avea ma Kerisiano moni. O le mea lenā na ou faia. E leʻi umi ae ou talia loa se suʻesuʻega faale-Tusi Paia mai iā Brent ma Elaine. O le taimi lenā o le tau māfanafana i le 2016.
“Ou te tulimataʻia taimi o a matou suʻesuʻega faale-Tusi Paia i vaiaso taʻitasi, ma sauniga i le Maota mo Sauniga. Ou te lagona le faamanuiaina ma le fiafia i le aʻoaʻoina o mea moni o loo taʻua i le Tusi Paia. E sili laʻitiiti atu ma le tausaga talu ona ou suʻesuʻe, ae ou papatiso loa o se Molimau. Ua 79 nei oʻu tausaga, ma ou te matuā lotofaafetai ina ua ou maua le tapuaʻiga moni. Ua faamanuia mai Ieova i le avea o aʻu ma vaega o lona ʻauaiga i le lalolagi aoao.”
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
