LESONA 2
O Ai le Atua?
1. Aiseā e tatau ai ona tatou tapuaʻi i le Atua?
O le Atua moni, o ia lea o Lē na foafoaina mea uma. E leai sona amataga, e leai lava sona gataaga. (Salamo 90:2) O ia o le Puna o le tala lelei o loo i le Tusi Paia. (1 Timoteo 1:11) Talu ai o le Atua na foaʻiina mai iā i tatou le ola, e tatau la ona tatou tapuaʻi atu tau lava o ia.—Faitau le Faaaliga 4:11.
2. E faapeʻī uiga o le Atua?
E leai se tasi ua vaai i le Atua auā o ia o le Agaga, o lona uiga, e sili atu ona maualuga o ia i foafoaga faitino o loo ola i le lalolagi. (Ioane 1:18; 4:24) Peitaʻi, ua tatou vaaia uiga o le Atua i mea na ia faia. O se faaaʻoaʻoga, pe a tatou mātauina le matalasi o fua o laau ma fugālaau eseese, ua tatou iloa ai le alofa ma le atamai o le Atua. O le telē o le vateatea, ua taʻu mai ai lona mana.—Faitau le Roma 1:20.
O le faitauina o le Tusi Paia ua tatou aʻoaʻoina ai le tele o isi mea e faatatau i uiga o le Atua. O se faaaʻoaʻoga, ua taʻua ai mea e fiafia i ai le Atua ma mea e lē fiafia i ai, le auala e feagai ai o ia ma tagata, ma le auala e na te taulima ai tulaga eseese.—Faitau le Salamo 103:7-10.
3. Pe e iai se suafa o le Atua?
Na fetalai Iesu: “Lo matou Tamā e o i le lagi, ia faapaiaina lou suafa.” (Mataio 6:9) E ui e tele faalupega o le Atua, ae e tasi lava lona suafa. E tofu le gagana ma le auala e faaleo ai. I le gagana Samoa, e masani ona faaleo o “Ieova.”—Faitau le Salamo 83:18.
Ua aveesea le suafa o le Atua mai i le tele o Tusi Paia, ae suia i le faalupega Alii po o le Atua. Ae i le taimi na tusia ai le Tusi Paia, sa iai le suafa o le Atua e tusa ma le 7,000 taimi. Sa faalauiloa e Iesu le suafa o le Atua ina ua ia aʻoaʻoina tagata e uiga i le Atua.—Faitau le Ioane 17:26.
Maimoa i le vitiō Pe e Iai se Suafa o le Atua?
4. Po o manatu mamafa mai Ieova iā i tatou?
E pei o lenei tamā alofa, e gaoioi Ieova mo lo tatou lelei tumau
Talu ai ua tele mafatiaga, po o lona uiga, e lē o manatu mamafa mai le Atua iā i tatou? Ua fai mai nisi, o mafatiaga ua tofotofo ai i tatou e le Atua, peitaʻi e lē saʻo lenā manatu.—Faitau le Iakopo 1:13.
Ua faamamaluina e le Atua le tagata i le tuuina i ai o le filifiliga saʻoloto. Pe e tatou te lē talisapaia ea lo tatou saʻolotoga e filifili ai e auauna i le Atua? (Iosua 24:15) Peitaʻi, ua tele mafatiaga ona e toʻatele ua filifili e faia mea leaga i isi. E tigā le finagalo o Ieova i le silasila mai i na faiga lē tonu.—Faitau le Kenese 6:5, 6.
O Ieova o se Atua e manatu mamafa mai iā i tatou, ma e finagalo ina ia tatou maua se olaga fiafia. Ua toeitiiti ona soloiesea lea e Ieova mafatiaga ma ē o faapogaia. Ae i le taimi e tasi, e iai se māfuaaga lelei ua lē taofia ai e Ieova mafatiaga mo sina taimi. O le a tatou iloiloina lenā māfuaaga i le Lesona e 8.—Faitau le 2 Peteru 2:9; 3:7, 13.
5. E faapefea ona tatou mafuta vavalalata atu i le Atua?
Ua valaaulia i tatou e Ieova ina ia mafuta vavalalata atu iā te ia, e ala i le talanoa atu i le tatalo. E naunau mai o ia iā i tatou taʻitoʻatasi. (Salamo 65:2; 145:18) E nofosauni e faamagalo. E na te silafia a tatou taumafaiga ina ia faafiafia o Ia, e ui lava e tatou te lē taulau i nisi o taimi. O lea, e mafai lava ona tatou maua se mafutaga vavalalata ma le Atua, e ui i lo tatou tulaga lē lelei atoatoa.—Faitau le Salamo 103:12-14; Iakopo 4:8.
Ona o Ieova na foaʻi maia le ola, e tatau la ona sili atu lo tatou alolofa iā te ia nai lo o se isi. (Mareko 12:30) A o faaalia atu lou alofa i le Atua e ala i le aʻoaʻoina o mea e uiga iā te ia ma faia lona finagalo, o le a atili ai ona e vavalalata atu iā te ia.—Faitau le 1 Timoteo 2:4; 1 Ioane 5:3.
