Disa pinë më shumë alkool kur ndihen të stresuar, të vetmuar ose thjesht kur janë të mërzitur. A po pi më tepër se më parë? Nëse po, si mund të jesh i sigurt se konsumimi i alkoolit nuk po të del jashtë kontrollit dhe se nuk po krijon varësi? Shqyrto disa informacione praktike që mund të të ndihmojnë.

•  Çfarë do të thotë të pish me karar?

•  Shenja që tregojnë se po abuzon me alkoolin

•  Pesë sugjerime që të ndihmojnë ta mbash nën kontroll konsumimin e alkoolit

 Bibla thotë: «Mos ji ndër ata që pinë verë me tepri.»—Proverbat 23:20.

 Mendo pak: Bibla nuk e dënon pirjen e alkoolit me karar. (Eklisiastiu 9:7) Megjithatë bën dallimin midis pirjes me karar, pirjes me tepri dhe dehjes. (Luka 21:34; Efesianëve 5:18; Titit 2:3) Edhe pse mund të mos dehesh, kur e tepron me alkoolin, mund të dëmtosh aftësinë për të marrë vendime, shëndetin ose marrëdhëniet me të tjerët.—Proverbat 23:29, 30.

 Shumë autoritete bëjnë dallimin mes pirjes me risk të lartë dhe pirjes me risk më të ulët. Shpesh këtë e përcaktojnë nga sasia që një person pi në ditë dhe nga sa ditë në javë pi. a Gjithsesi, çdo njeri reagon ndryshe ndaj alkoolit, madje, ndonjëherë është më mirë të mos pish fare. Sipas Organizatës Botërore të Shëndetësisë:

 «Edhe një ose dy pije mund të jenë shumë—për shembull:

•   kur je në timon ose kur drejton një makineri.

•   kur je shtatzënë ose kur ushqen foshnjën me gji.

•   kur merr një mjekim të caktuar.

•   kur ke ndonjë sëmundje të caktuar.

•   kur nuk e kontrollon dot pirjen.»

 Bibla thotë: «Le t’i shqyrtojmë e t’i hetojmë udhët tona.»—Vajtimet 3:40.

 Mendo pak: Mund ta mbrosh veten nga efektet e dëmshme të alkoolit, nëse i shqyrton rregullisht zakonet e tua të pirjes dhe nëse bën ndryshimet e nevojshme. Shiko nëse ndonjë nga shenjat më poshtë të tregon se konsumimi i alkoolit po të del jashtë kontrollit.

•   Pi alkool që të ngresh humorin. Mendon se duhet të pish që të relaksohesh, të rrish me të tjerët ose të bësh qejf. Pi që të përballosh problemet.

•   Pi më shumë se më parë. Pi më shpesh. Pijet e tua përmbajnë përqindje më të lartë alkooli dhe duhet të pish më shumë që të ndjesh të njëjtin efekt si dikur.

•   Pija të ka sjellë probleme në shtëpi dhe në punë. Për shembull, shpenzon më shumë nga ç’ta mban xhepi për alkoolin.

•   Merr vendime të rrezikshme pasi pi, si për shembull, t’i japësh makinës, të notosh ose të drejtosh një makineri.

•   Të tjerët shqetësohen për sasinë e alkoolit që pi. Kur ta thonë këtë, ti vihesh në mbrojtje. Përpiqesh t’ua fshehësh të tjerëve kur pi ose gënjen për sasinë që pi.

•   Nuk heq dot dorë. Je përpjekur ta pakësosh disi alkoolin ose ta ndërpresësh fare, por më kot.

 1. Bëj një plan.

 Bibla thotë: «Planet e atij që ngulmon, sjellin me siguri sukses.»—Proverbat 21:5.

 Provo këtë: Përcakto në cilat ditë të javës do të pish. Vër një kufi të arsyeshëm për sasinë e alkoolit që mund të pish gjatë këtyre ditëve. Dhe çdo javë veço dy ditë kur nuk do të vësh alkool në gojë.

 Një organizatë bamirëse e Mbretërisë së Bashkuar për përdorimin me maturi të alkoolit, komenton: «Shkëputja e herëpashershme nga alkooli është mënyra më e mirë për të mos krijuar varësi.»

 2. Zbatoje planin.

 Bibla thotë: «Përfundojeni atë që nisët.»—2 Korintasve 8:11.

 Provo këtë: Mëso sa alkool përmban një pije standarde, që të llogaritësh sa pi ti. Gjej pije të shëndetshme joalkoolike që të shijojnë dhe lëri diku që t’i marrësh kollaj.

 «Ndryshimet e vogla të ndihmojnë jashtë mase që të ulësh shanset për të pasur probleme me alkoolin.»—Instituti Kombëtar për Abuzimin me Alkoolin dhe Alkoolizmin në SHBA.

 3. Përmbaju vendimeve.

 Bibla thotë: «‘Po-ja’ juaj të jetë ‘po’ dhe ‘jo-ja’ juaj, ‘jo’.»—Jakovi 5:12.

 Provo këtë: Ji i përgatitur të thuash «jo» me mirësjellje por me vendosmëri, nëse të ofrojnë ndonjë pije që nuk e kishe në plan.

 Instituti Kombëtar për Abuzimin me Alkoolin dhe Alkoolizmin në SHBA, pohon: «Sa më shpejt t’u thuash jo këtyre ofertave, aq më pak shanse ka të dorëzohesh.»

 4. Përqendrohu te dobitë që sjellin vendimet e tua.

 Bibla thotë: «Më mirë se fillimi i një pune është fundi i saj.»—Eklisiastiu 7:8.

 Provo këtë: Rendit arsyet pse dëshiron që ta mbash nën kontroll konsumimin e alkoolit. Përfshi gjëra, si përmirësimi i gjumit, i shëndetit, i ekonomisë dhe i marrëdhënieve me të tjerët. Nëse flet me të tjerët për vendimet e tua, përqendrohu te dobitë, jo te vështirësitë.

 5. Lutju Perëndisë për mbështetje.

 Bibla thotë: «Për çdo gjë kam forcë falë atij që më jep fuqi.»—Filipianëve 4:13.

 Provo këtë: Nëse je në merak për zakonet e tua të pirjes, lutju Perëndisë për ndihmë. Kërkoji forcë dhe vetëkontroll. b Dhe gjej sugjerime praktike nga Bibla, Fjala e tij, që mund të të ndihmojnë. Kur ke Perëndinë pranë, mund ta mbash nën kontroll konsumimin e alkoolit.