Po. Kur Jezui ishte në tokë, tek ai u përmbushën profeci të shumta për ‘Mesinë, Udhëheqësin’ i cili do të bëhej ‘Shpëtimtar i botës’. (Danieli 9:25; 1 Gjonit 4:14) Madje, tek ai u përmbushën profeci mesianike edhe pas vdekjes.​—Psalmi 110:1; Veprat 2:34-36.

•  Cili është kuptimi i fjalës «Mesia»?

•  A mund të përmbusheshin te disa persona profecitë mesianike?

•  A mund të shfaqet në të ardhmen Mesia?

•  Sa profeci mesianike ka në Bibël?

•  Disa profeci mesianike që u përmbushën te Jezui

 Si fjala hebraike Mashíah (Mesia), edhe ekuivalenti i saj në greqisht, Kristós (Krisht), kanë kuptimin «i Mirosur». Kështu që «Jezu Krisht» do të thotë «Jezui, i Mirosuri» ose «Jezui, Mesia».

 Në kohët biblike, kur dikush emërohej në një pozitë të veçantë autoriteti, shpesh mirosej duke i hedhur vaj në kokë. (Levitiku 8:12; 1 Samuelit 16:13) Perëndia e caktoi Jezuin si Mesia, një pozitë me shumë autoritet. (Veprat 2:36) Megjithatë, Ai nuk e mirosi me vaj, por me frymë të shenjtë.​—Mateu 3:16.

 Jo. Ashtu si shenjat e gishtave identifikojnë vetëm një person, profecitë biblike të përmbushura tregojnë se ka vetëm një Mesi, ose Krisht. Gjithsesi, Bibla paralajmëron se «do të dalin Krishtër të rremë dhe profetë të rremë e do të bëjnë shenja të mëdha dhe çudira, që të mashtrojnë mundësisht edhe të zgjedhurit».​—Mateu 24:24.

 Jo. Bibla paratha se Mesia do të ishte pasardhës i Davidit, mbretit të Izraelit. (Psalmi 89:3, 4) Megjithatë, regjistrimet gjenealogjike judaike deri te Davidi, kanë humbur. Me sa duket u shkatërruan kur romakët pushtuan Jerusalemin në vitin 70 të e.s. a Që prej asaj kohe askush nuk mund të vërtetojë se vjen nga familja mbretërore e Davidit. Ndryshe nga kjo, në kohën e Jezuit këto regjistrime gjenealogjike ekzistonin, e megjithatë as armiqtë e tij nuk e mohuan dot se ai ishte pasardhës i Davidit.​—Mateu 22:41-46.

 Është e pamundur të themi një numër fiks të profecive mesianike. Për shembull, edhe në fragmentet që flasin qartë për Mesinë, numri i profecive mund të ndryshojë në varësi të metodës së numërimit. Tek Isaia 53:2-7 përmenden disa aspekte profetike për Mesinë. Disa mund ta konsiderojnë këtë fragment si një profeci të vetme, kurse të tjerë mund të konsiderojnë secilin prej aspekteve si profeci më vete.