Nôno. Bijbel no e taki dati moni na wan ogri sani èn a no e taki tu dati na moni e meki taki ala sortu ogri e pasa. Te sma e taki dati „moni na a rutu fu ala ogri”, dan na wan pisi nomo fu wan Bijbeltekst den e kari dya. Den no e kari a heri Bijbeltekst. San Bijbel e taki trutru na taki „a lobi di sma abi gi moni na a rutu fu ala ogri”. a​—1 Timoteyus 6:10, King James Version. Na wi skrifi a wortu „lobi” nanga fatu letter.

•  San Bijbel e taki fu moni?

•  Fu san ede Bijbel e warskow wi fu no lobi moni?

•  Sortu wini wi kan kisi te wi e teki a Bijbel rai di abi fu du nanga moni?

•  Bijbel vers di e taki fu moni

 Bijbel e sori taki moni kan de wan bun sani te sma e gebroiki en na wan koni fasi èn taki moni kan „kibri” sma srefi (Preikiman 7:12). Boiti dati, Bijbel e prèise den wan di lobi gi tra sma sani, soleki moni.​—Odo 11:25.

 Ma Bijbel e warskow tu fu no meki moni tron a moro prenspari sani na ini wi libi. Bijbel e taki: „No meki a fasi fa unu e libi sori taki unu lobi moni. Ma un musu breiti nanga den sani di unu abi now” (Hebrewsma 13:5). San wi kan leri fu disi na taki wi musu poti moni na a yoisti presi èn taki wi no musu feti fu kon gudu nomonomo. Na presi fu dati, wi musu breiti nanga den sani di wi abi fanowdu trutru soleki nyanyan, krosi nanga wan tanpresi.​—1 Timoteyus 6:8.

 Sma di abi bigi-ai no o kisi têgo libi (Efeisesma 5:5). Te wan sma abi bigi-ai, dan na a srefi leki te a ben o du afkodrei, noso anbegi falsi gado (Kolosesma 3:5). Wan tra sani na taki te wan sma di abi bigi-ai e feti fu kisi nomonomo san a wani, dan furu tron a e frigiti ala den bun sani di a leri. Odo 28:20 e taki dati ’sma di e hasti densrefi fu kon gudu o meki fowtu’. A kan taki den o go du wan lo ogri sani srefi. Kande den e pruberi fu tapu skreki gi sma soso fu kisi moni, noso kande den e bedrigi trawan, den e fufuru sma tyari gowe gi moni noso den e kiri trawan.

 Srefi efu a lobi gi moni no e meki taki wan sma go du ogri, toku a kan abi tra takru bakapisi gi a sma. Bijbel e taki dati „den sma di wani kon gudu nomonomo e kisi tesi èn den e fadon go na ini wan trapu. Den wani go du ala sortu dondon sani èn den e kisi ala sortu takru lostu.”​—1 Timoteyus 6:9.

 Na presi fu poti na wi ede nomonomo taki wi wani moni, wi musu tan du den bun sani di Gado leri wi. Te wi e du dati dan wi no o lasi lespeki gi wisrefi, Gado o breiti nanga wi èn a o yepi wi. Gado e pramisi den sma di e meki muiti fu plisi en: „Mi no o libi yu kwetikweti èn noiti mi o gowe fu yu” (Hebrewsma 13:5, 6). Gado e gi wi a dyaranti tu taki „wan man di e du san reti o kisi furu blesi”.​—Odo 28:20.