PASCAL gro kon bigi na ini wan pôti birti na Ivoorkust. Sensi di a yongu a ben wani wan moro bun libi. A ben lobi boks èn a ben aksi ensrefi pe a kan go fu tron wan bigi sportman èn fu kon gudu. Di a ben abi sowan 25 yari, a bosroiti fu go na Europa fu meki en na ini a libi. Ma fu di a no ben abi papira fu go na tra kondre, meki a ben abi fu suku wan fasi fu boro go na ini Europa.

Na ini 1998, di Pascal ben abi 27 yari, a bigin teki pasi go na Europa. A fosi sani di a du na taki a abra go na Gana. Baka dati a pasa na ini Togo go na Benin teleki a doro a foto Birni Nkonni na ini Niger. Ma now a pisi ben o kon pe a ben kan lasi en libi. Fu go na noordsei, a ben abi fu teki wan truck fu abra Sahara-sabana go na Mindrikondre Se. Te a ben o doro drape, a ben o abi fu teki wan boto go na Europa. Na dati a ben wani du. Ma tu sani pasa na ini Niger di meki taki a no du moro san a ben abi na prakseri.

A fosi sani na taki a no ben abi moni moro. A tra sani na taki a miti Noé, wan pionier di bigin studeri Bijbel nanga en. Den sani di a leri naki en ati èn den kenki a fasi fa a ben e si a libi. Now a no ben wani kon gudu moro, ma a ben wani leri sabi Gado moro bun. Na ini december 1999, Pascal teki dopu. Fu sori taki a ben warderi san Yehovah du gi en, a bigin pionier na Niger na ini 2001, na ini a srefi foto pe a leri sabi den tru tori fu Bijbel. Fa a e prakseri fu a pionierwroko? A e taki: „Disi na a moro bun libi di mi ben kan abi!”

Neleki fa a ben de nanga Pascal, na so furu sma kon si taki te den wani de moro koloku, den musu du moro gi Yehovah. Dati meki son Kresten brada nanga sisa gowe libi Europa èn den froisi go na Afrika fu dini na kontren pe moro Kownukondre preikiman de fanowdu. Fu taki en leti, sowan 65 Kotoigi fu Europa, di abi 17 te go miti 70 yari, froisi go yepi na kondre na ini West-Afrika soleki Benin, Burkina Faso, Niger nanga Togo. * San meki den froisi go so fara èn fa sani waka gi den?

Anne-Rakel fu Deinsikondre e fruteri: „Fosi, mi papa nanga mama ben de zendeling na Senegal. Ala ten den ben e fruteri wi fayafaya o switi a zendeling wroko ben de. Na a libi dati mi ben wani tu.” Sowan 15 yari pasa, Anne-Rakel froisi go na Togo di a ben abi sowan 20 yari. Drape a e dini na wan gemeente pe den e taki Dofusma-tongo. Fa disi gi trawan deki-ati? A e taki: „Bakaten mi pikin sisa èn mi brada froisi kon na Togo tu.”

Aurele, wan brada fu 70 yari di trow èn di komoto na Fransikondre, e fruteri: „Feifi yari pasa di mi go nanga  pensyun, mi ben kan du tu sani: Libi wan switi libi na ini Fransikondre, aladi mi ben o wakti teleki Paradijs kon, noso du moro na ini a diniwroko.” Aurele bosroiti fu du moro na ini a diniwroko. Sowan dri yari pasa, en nanga en wefi Albert-Fayette froisi go na Benin. Aurele e taki: „Wi ben de klariklari fu dini Yehovah dyaso èn dati na a moro bun sani di wi du.” Nanga wan lafu fesi a e taki moro fara: „Son pisi pe wi e preiki na sesyoro e meki mi prakseri Paradijs.”

Clodomir nanga en wefi Lysiane gowe libi Fransikondre fu go na Benin 16 yari pasa. Na ini a bigin den ben misi den famiri nanga mati fu den na Fransikondre trutru èn den ben frede taki den no ben o man nanga a nyun libi fu den. Ma den no ben abi fu frede fu di den kisi furu prisiri bakaten. Clodomir e taki: „Na ini den 16 yari di pasa, wi kisi a grani fu yepi wán sma ibri yari fu leri sabi den tru tori fu Bijbel.”

Sébastien nanga Johanna, wan trowpaar fu Fransikondre froisi go na Benin na ini 2010. Sébastien e taki: „Someni wroko de fu du na ini a gemeente. Fu dini dyaso de leki wan skoro pe yu kan leri furu sani fu a preikiwroko na ini wan syatu pisi ten.” San sma e du te den e yere a Kownukondre boskopu? Johanna e taki: „Sma e angri fu yere den tru tori fu Bijbel. Srefi te wi no e preiki, sma e stop wi na strati fu aksi wi sani fu Bijbel èn den wani den buku fu wi tu.” Di a trowpaar disi froisi, dan sortu krakti dati ben abi na tapu den trowlibi? Sébastien e taki: „A meki wi trowlibi kon moro tranga. Mi e prisiri fu de heri dei na ini a preikiwroko nanga mi wefi.”

Eric nanga en wefi Katy e dini leki pionier na noordsei fu Benin na ini kontren pe furu sma no e libi. Sowan tin yari pasa, di den ben de na Fransikondre ete, den bigin leisi artikel di ben e taki fu sma di go dini na presi pe moro preikiman de fanowdu. Dati meki den go taki nanga sma di de na ini a furuten diniwroko. Disi gi den deki-ati fu froisi go na wan tra kondre èn na dati den du na ini 2005. Sensi a ten dati, den si fa a wroko drape go na fesi. Eric e taki: „Tu yari pasa, a grupu fu wi na ini a foto Tanguiéta, ben abi 9 preikiman. Now a grupu abi 30 preikiman. Sonde sowan 50 te go miti 80 sma e kon na den konmakandra. A e gi wi bigi prisiri fu si fa so furu sma e kon na ini a tru anbegi.”

Sortu problema miti sonwan fu den Kotoigi di go dini na kontren pe moro preikiman de fanowdu?  Benjamin di abi 33 yari na a brada fu Anne-Rakel. Na ini a yari 2000 a miti wan zendeling na Deinsikondre di ben e dini na Togo. Benjamin e taki: „Di mi taigi a zendeling taki mi wani pionier, a taigi mi: ’Yu sabi, yu kan go pionier na Togo.’” Benjamin go prakseri a tori. A taki: „Na a ten dati mi no ben abi 20 yari ete. Ma den tu sisa fu mi ben de na Togo kaba. Dati meki a ben de moro makriki gi mi fu go drape.” Sobun, a bosroiti fu froisi. Toku a ben abi wan problema ete. Benjamin e fruteri: „Mi no ben sabi nowan wortu Fransitongo. Den fosi siksi mun ben hebi gi mi fu di mi no ben man taki nanga sma.” Ma baka wan pisi ten a ben e go moro bun. Now Benjamin e dini na Betel na Benin. Drape a e yepi tyari buku go na den gemeente èn a e wroko na a Computerafdeling.

Eric nanga Katy, di wi ben kari kaba, ben e dini kaba na ini wan kontren pe sma e taki wan tra tongo, fosi den froisi fu Fransikondre go na Benin. Ma West-Afrika ben de tra fasi. Fa so? Katy e taki: „A no ben de makriki fu feni wan bun presi fu tan. Omeni mun langa wi ben tan na ini wan oso di no ben abi faya nanga watra.” Eric e taki moro fara: „Den sma na ini a birti ben e plèi poku bun tranga te latilati neti. Yu musu abi pasensi te den sortu sani dati e pasa èn yu musu de klariklari fu fiti yusrefi.” Den ala tu e taki: „Awinsi problema de, toku yu kan kisi furu prisiri te yu e dini na ini wan kontren pe sma no preiki furu ete.”

Michel nanga Marie-Agnès, wan trowpaar fu Fransikondre di no doro 60 yari ete, froisi go na Benin sowan feifi yari pasa. Ma na ini a bigin den ben broko den ede nanga wan tu sani. Michel taki dati son sma no ben feni taki a bun fu froisi. A taki: „Te sma no sabi taki Yehovah e yepi den, dan den kan frede. Sobun, di wi froisi, wi du dati gi Yehovah èn a yepi wi.”

Brada nanga sisa di sabi san a wani taki fu go dini na wan presi pe moro preikiman de fanowdu, e sori san yu musu du fosi yu froisi. Den e taki: Sreka sani bun. Leri fu fiti yusrefi. No gebroiki moro moni leki san yu ben abi na prakseri. Frutrow na tapu Yehovah.—Luk. 14:28-30.

Sébastien, di wi ben kari kaba, e taki: „Fosi wi froisi, mi nanga Johanna sorgu taki wi no ben e gebroiki tumusi furu moni fu du prisiri sani èn wi no ben e bai sani di wi no ben abi fanowdu. Na so wi ben kan poti moni na wan sei gi tu yari.” Fu tan pionier na ini Benin, den e go na Europa ibri yari fu wroko wan tu mun. Na so den kan pionier na Benin den tra mun fu a yari.

 Sowan 20 sisa di no trow, froisi go na West-Afrika fu dini na ini kontren pe moro preikiman de fanowdu. Marie-Thérèse na wan fu den sisa disi. Na Fransikondre, a ben abi a wroko fu rèi bus. Ma na ini 2006 a stop wroko gi wán yari fu go pionier na Niger. Baka wan syatu pisi ten, a ben sabi taki disi na a libi di a ben wani. Marie-Thérèse e taki: „Di mi drai go baka na Fransikondre, mi go taki nanga mi basi èn mi taigi en taki mi wani kenki den wroko-yuru fu mi. Mi basi ben feni dati bun. Te mi de na Fransikondre mi e rèi bus fu mei te go miti augustus, èn fu september te go miti april mi e pionier na Niger.”

Den sma di e „suku fosi a Kownukondre” kan de seiker taki Yehovah o sorgu taki den kisi „ala den tra sani” di den abi fanowdu (Mat. 6:33). Fu eksempre, luku san pasa nanga Saphira, wan sisa fu Fransikondre di no doro 30 yari ete èn di e pionier na Benin. Na ini 2011, a drai go baka na Fransikondre fu wroko moni, so taki a ben kan tan ete wan yari na Afrika. Disi ben o de a di fu siksi yari taki a e pionier na ini Benin. Saphira e fruteri: „Freida ben de mi lasti wrokodei, ma mi ben o abi fu wroko ete tin dei fu abi nofo moni gi a tra yari. Mi ben abi tu wiki ete na ini Fransikondre. Dati meki mi begi Yehovah èn mi fruteri en taki mi ben e broko mi ede nanga a sani disi. Syatu baka dati, sma fu wan wrokope bel mi èn den aksi mi fu teki presi gi wan wrokoman di no ben o de tu wiki.” Munde Saphira go na a wrokope so taki a sma di no ben o de, ben kan sori en san a musu du. A e taki: „Mi fruwondru di mi si taki a sma disi ben de wan Kresten sisa di ben abi tin dei fanowdu fu go na a Pionierskoro. En basi no ben wani gi en fakansi efu a no ben man feni wan sma fu teki en presi. Neleki mi, en srefi begi Yehovah tu fu yepi en.”

Wan tu brada nanga sisa e dini furu yari kaba na West-Afrika èn den kon lobi a presi. Trawan ben man tan drape wan tu yari èn baka dati den drai go baka na den kondre. Ma te now ete den brada nanga sisa disi e kisi wini fu a ten di den ben e dini na Afrika. Den kon si taki te wan sma e dini Yehovah, dan dati kan meki a de koloku trutru.