A ben bun gi mi fu kon krosibei na Gado
DI MI ben abi neigi yari, mi no ben e gro moro. Disi ben de sowan 34 yari pasa. Na a ten dati mi ben e libi na Ivoorkust. Te now ete mi langa wán meter nomo. Di mi papa nanga mama kon frustan san e pasa nanga mi den tan gi mi deki-ati fu wroko tranga, so taki mi no ben o broko mi ede tumusi furu nanga a fasi fa mi tan. Mi ben poti wan tafra na fesisei fu na oso fu wi fu seri froktu èn mi sorgu ala ten taki a tafra tan krin èn taki a ben seti moi. A sani dati meki taki furu sma ben e kon bai sani na mi.
A no de fu taki dati tranga wroko wawan no kenki ala sani. Mi ben syatu ete èn pikinpikin sani ben muilek gi mi fu du. Fu eksempre, te mi ben e go na wenkri, dan ala sani ben hei tumusi gi mi. A ben gersi leki ala sani ben meki gi sma di langa tu tron moro mi. Mi ben e sari misrefi, ma dati kenki di mi ben abi 14 yari.
Wan dei tu frow di ben de Yehovah Kotoigi kon bai froktu na mi. Den frow disi bigin studeri Bijbel nanga mi. Fosi yu denki mi kon si taki a ben moro prenspari fu kon sabi Yehovah nanga den prakseri fu en, leki fu broko mi ede nanga a gosontu fu mi. Den sani di mi leri yepi mi furu. Mi ben kon lobi Psalm 73:28. A fosi pisi fu a tekst dati e taki: „A bun gi mi fu kon krosibei na Gado.”
Ne a famiri fu mi froisi go na Burkina Faso wantronso. A sani dati kenki mi heri libi. Di wi ben e libi na Ivoorkust, sma ben gwenti si mi te den ben e kon bai froktu na mi. Ma na ini a kontren pe wi froisi go tan sma no ben sabi mi. Furu sma no ben gwenti si sma di syatu leki mi. Dati meki den ben e tanapu e luku mi. A sani dati ben meki taki omeni wiki mi no ben e go na strati. Ne mi memre fa mi ben e firi di mi ben e kon krosibei na Yehovah. Dati meki mi skrifi wan brifi go na a bijkantoro fu Yehovah Kotoigi èn den seni a yoisti sma kon na mi. Dati ben de sisa Nani, wan zendeling di ben e rèi wan bromfiets.
Na ini a kontren pe wi ben e libi yu ben kan fadon makriki na den santi pasi èn na ini alen ten den pasi ben tokotoko. Omeni leisi Nani fadon komoto na a bromfiets fu en te a ben e kon studeri nanga mi. Ma a tan kon. Ne a aksi mi efu a kan kon teki mi fu go na den konmakandra. Mi ben sabi taki efu mi ben o du dati, mi ben o abi fu go na strati pe sma ben o tanapu luku mi baka. Boiti dati, mi ben prakseri tu taki te mi ben o go sidon baka a bromfiets a ben o moro muilek srefi gi a sisa fu rèi en. Ma toku mi go fu di mi prakseri a di fu tu pisi fu a tekst di mi lobi: „Na a Moro Hei Masra Yehovah mi e si leki mi kibripe.”
Ten na ten mi nanga Nani ben e fadon na ini a tokotoko, ma toku mi ben breiti fu kan go na den konmakandra. Na ini a Kownukondre zaal sani ben de heri tra fasi leki na strati. Na a konmakandra sma ben lafu nanga mi na presi taki den tanapu e luku mi nomo. Neigi mun baka dati mi dopu.
A di fu dri pisi fu a tekst di mi lobi e taki: „Dati meki mi o fruteri sma ala san yu du.” Mi ben sabi taki a ben o hebi gi mi trutru fu go na ini a preikiwroko. Mi e memre a fosi leisi ete di mi go preiki oso-fu-oso. Pikin-nengre nanga bigisma ben e tanapu e luku mi, dan den ben e waka na mi baka èn den ben e suku fu waka neleki mi. A sani dati hati mi trutru, ma ala yuru mi ben e memre misrefi taki neleki mi den abi a Paradijs fanowdu tu. Dati meki mi horidoro.
Fu meki en moro makriki gi misrefi mi bai wan baisigri nanga dri wiel di yu e rèi nanga yu anu. Te wi ben musu kren wan bergi, dan a sma di ben e wroko nanga mi ben e pusu a baisigri fu mi go na loktu sei èn te wi ben musu saka a bergi a ben e dyompo sidon tapu a baisigri èn wi ben e lolo go na ondrosei. A preikiwroko di ben tranga gi mi na a bigin ben kon tron wan sani di ben e gi mi so furu prisiri taki mi tron wan gewoon pionier na ini 1998.
Mi ben kon abi furu Bijbelstudie. Fo fu den teki dopu. Boiti dati, wan pikin sisa fu mi bigin dini Yehovah tu! Te mi ben e yere fa tra sma e go na fesi, dan furu tron dati ben e gi mi a deki-ati di mi ben abi fanowdu. Wan leisi di mi ben kisi malaria mi kisi wan brifi fu wan sma na Ivoorkust. Mi ben bigin wan Bijbelstudie nanga wan studenti fu na universiteit na Burkina Faso. Wi ben e studeri leti na en mofodoro. Mi ben gi wan brada a studie dati. Bakaten a studenti froisi go na Ivoorkust. Mi ben breiti srefisrefi fu leisi na ini a brifi taki a ben tron wan preikiman di no dopu ete!
Fa mi e sorgu misrefi? Wan organisâsi di e yepi sma di malengri bigin leri mi nai krosi. Wan fu den sma di ben e gi les, si taki mi ben e wroko tranga. Dati meki a taki: „Wi musu sori yu fa fu meki sopo.” Na dati den du tu. Na oso mi bigin meki sopo fu wasi krosi èn sopo fu wasi yu anu. Sma di lobi a sopo fu mi e fruteri trawan taki den kan bai en na mi. Misrefi e tyari en go gi den sma tapu a bromfiets fu mi di abi dri wiel.
Na ini 2004 mi baka ben kon hati mi srefisrefi fu di mi bakabonyo no gro bun. Mi ben kon abi so furu pen taki mi ben abi fu stop nanga a pionierwroko. Toku mi e wroko tranga ete na ini a preikiwroko.
Sma sabi mi leki wan uma di lobi lafu. Ma mi man prisiri fu di mi kon krosibei na Gado èn dati e meki mi firi bun.
