KANDE yu ben firi leki den sma disi tu di wan lobiwan fu yu dede. A kan taki yu ben e firi sari, kande yu ben e firi leki yu de yu wawan, noso kande yu no ben sabi san fu du. A kan taki yu ben ati bron, noso taki yu ben e frede. Kande a hati yu taki yu no du sani tra fasi. A kan taki yu aksi yusrefi fu san ede yu de na libi ete.

Te yu e tan firi sari baka te wan lobiwan fu yu dede, dan dati no fowtu. Disi e sori o furu yu ben lobi a sma dati. Ma yu denki taki wan fasi de fa yu kan firi moro bun?

Aladi a kan gersi leki a sari no e gwe, toku a kan de wan trowstu gi yu te yu e du den sani disi:

NO FREDE FU SORI TAKI YU E SARI

A no ala sma e sari na a srefi fasi èn son sma e sari fu wan syatu pisi ten aladi trawan e sari moro langa. Ma toku yu kan firi moro bun te yu e krei. Vanessa di wi ben kari kaba e taki: „Soso krei mi ben e krei. Mi no ben man moro nanga a pen.” Sofía di sisa dede wantronso, e taki: „Te mi e prakseri san pasa, dan a e hati mi srefisrefi. A de neleki mi e diki wan owru soro opo fu krin en. Aladi a pen hebi tumusi, toku mi sabi taki te fu kaba mi o firi moro bun.”

TAKI FA YU E DENKI ÈN FA YU E FIRI

A no de fu taki dati son leisi yu wani de yu wawan. Ma efu yu no e suku yepi te yu e sari, dan a  de neleki yu e pruberi fu tyari wan lai di yu wawan no man tyari. Jared di abi 17 yari, lasi en papa. A e taki: „Mi fruteri trawan fa mi ben e firi. Kande den no ben e frustan srefi san mi ben wani taigi den, ma mi breiti taki mi ben man fruteri den fa mi e firi.” Janice di kari na ini a fosi artikel, e taki tu fa a sani disi yepi en: „Mi feni furu trowstu di mi taki nanga trawan. Mi ben firi taki den ben e frustan mi èn mi no ben e firi leki mi de mi wawan.”

MEKI TRAWAN YEPI YU

Wan datra e taki: „Sma di e sari fu di wan lobiwan fu den dede o man pasa a muilek ten dati moro makriki te den e meki mati nanga famiriman yepi den.” Meki den mati fu yu kon sabi fa den kan yepi yu. Kande den wani yepi yu, ma den no sabi fa.​—Odo 17:17.

KON MORO KROSIBEI NA GADO

Tina e taki: „Di mi masra dede wantronso fu di a ben abi kanker, dan mi no ben man taki nanga en moro fu den problema fu mi. Dati meki mi ben e fruteri Gado ala sani! Ibri mamanten mi ben e aksi Gado fu yepi mi pasa a dei. Gado yepi mi na someni difrenti fasi.” Tarsha di ben abi 22 yari di en mama dede, e taki: „Mi ben e leisi Bijbel ibri dei èn dati ben e trowstu mi.”

PRAKSERI A TEN TE A SMA DI YU LOBI O KISI WAN OPOBAKA

Tina e taki moro fara: „Na a bigin, na opobaka howpu no ben e trowstu mi fu di mi ben abi mi masra fanowdu na den momenti dati èn den boi fu mi ben abi den papa fanowdu. Ma now, baka fo yari, mi e bribi tranga na ini a howpu disi. Na dati e yepi mi fu go doro. Mi e prakseri fa mi o si mi masra baka. A sani dati e trowstu mi èn a e meki mi firi prisiri!”

A tru taki a no ala ten a sari e gwe wantewante. Toku a sani di miti Vanessa kan de wan trowstu gi yu. A e taki: „Kande yu e denki taki a firi noiti no o gwe, ma yu o si taki sani o go moro bun.”

Hori na prakseri taki aladi yu o tan misi a sma, toku dati no abi fu tapu yu fu go doro nanga yu libi. Gado lobi yu. A kan yepi yu fu feni trowstu na den mati fu yu èn a kan yepi yu fu de koloku baka. Heri esi Gado o gi den dedewan wan opobaka. Na a ten dati yu o man brasa a lobiwan fu yu baka èn yu no o sari noiti moro!