Den Kotoigi no ben e sori switifasi gi sma wawan, ma gi den dagu fu mi tu. Wan dei, Elaine, di ben gwenti tanapu nanga a bukuwagi, gi den pikin dagu fu mi wan tu switisani fu nyan. Ibri leisi te mi ben e go waka nanga den dagu èn den ben si a bukuwagi, den ben e wani go na den Kotoigi fu kisi den switisani fu den.

Na so den mun ben e pasa. Den dagu ben lobi den switisani fu den Kotoigi èn mi ben lobi taki syatu nanga den. Ma mi no ben wani taki tumusi furu nanga den. Mi ben pasa 70 yari kaba èn mi no ben sabi tumusi furu fu a bribi fu den Kotoigi. Fu di mi ben kon si taki furu Kresten kerki no e leri san Bijbel e taki, meki mi ben feni en moro bun fu studeri Bijbel mi srefi.

Na a ten dati, mi ben si tra Kotoigi tu nanga den bukuwagi na tra presi fu a foto. Den Kotoigi disi ben abi switifasi tu. Ala ten den ben e gebroiki Bijbel fu piki den aksi fu mi èn dati meki mi ben e frutrow den moro.

Wan dei, Elaine aksi mi: ’Yu e bribi taki meti na wan kado fu Gado?’ Mi taigi en taki mi e bribi dati! Dan Elaine leisi Yesaya 11:6-9 gi mi. Sensi a dei dati mi ben wani leri moro fu Bijbel, ma toku mi no ben wani teki den buku fu den Kotoigi.

Den dei baka dati mi ben abi wan tu moi takimakandra nanga Elaine nanga en masra, Brent. Den taigi mi taki a ben o bun fu leisi Mateyus te go miti Tori fu den Apostel fu kan frustan san a wani taki fu de wan trutru Kresten. Na dati mi du tu. Syatu baka dati mi ben wani studeri Bijbel nanga Brent nanga Elaine. Dati ben de na mindri fu a yari 2016.

Ibri wiki mi ben breiti taki mi ben man studeri Bijbel èn go na den konmakandra na a Kownukondre zaal. Mi breiti srefisrefi taki mi kon sabi san Bijbel e leri trutru. Moro leki wán yari baka dati mi tron wan dopu Kotoigi. Now mi abi 79 yari èn mi de nanga tangi taki mi feni a tru bribi. Yehovah blesi mi trutru, fu di a tyari mi kon na ini a famiri fu en di de na heri grontapu.”