1-3. San a profeiti fu Yuda no ben du, èn san ben de a bakapisi? (Luku a prenki na a bigin fu na artikel.)

DI KOWNU Yerobeyam ben e tiri leki kownu fu Israel, dan Yehovah seni wan profeiti komoto fu Yuda, fu tyari wan seryusu krutuboskopu gi a trangayesi kownu dati. A profeiti di ben abi sakafasi tyari a boskopu fu Gado èn Yehovah kibri a futuboi fu en so taki Yerobeyam no ben kan du ogri nanga en.—1 Kow. 13:1-10.

² Di a profeiti ben e drai go baka na oso, dan a miti nanga wan owru man fu a foto Betel di ben de krosibei. A man taigi en taki a ben de wan profeiti fu Yehovah. A kori a yongu profeiti fu trangayesi den krinkrin rai di Yehovah ben gi en fu ’no nyan brede noso dringi watra na ini Israel’ èn fu ’no teki a srefi pasi di a teki fu go drape’ te a ben o drai gowe baka. Yehovah no ben feni en bun taki a du dati. Bakaten di Yehovah en profeiti ben de na pasi fu go na oso, wan lew kiri en.—1 Kow. 13:11-24.

³ Fu san ede a profeiti disi di ben abi sakafasi fosi, du den sani di na owru man taigi en fu du, aladi a no ben mag du dati? Bijbel no e taki fu san ede. Ma a kan taki a ben frigiti taki a ben musu ’abi sakafasi aladi a e waka nanga Gado’. (Leisi Mika  6:8.) Bijbel e sori taki wan sma di e waka nanga Gado e frutrow tapu Gado, a e horibaka gi en leki a Moro Hei Tiriman èn a e teki a tiri fu en. Wan sma di abi sakafasi sabi heri bun san a man èn a musu begi en lobi Tata doronomo fu tiri en. A profeiti ben kan aksi Yehovah fu taigi en krin san a ben musu du, ma Bijbel no e taki dati a aksi Yehovah dati. Son leisi, wi musu teki muilek bosroiti tu èn kande wi no sabi soifri san fu du. Te wi e sori sakafasi èn te wi e suku a tiri fu Yehovah, dan dati o yepi wi fu no meki seryusu fowtu.

4. San wi o leri na ini na artikel disi?

⁴ Na ini na artikel na fesi wi si fu san ede a prenspari te now ete taki Kresten e sori sakafasi èn san a wani taki fu sori a fasi disi. Ma sortu situwâsi ben kan meki en muilek gi wi fu sori sakafasi? Fa wi kan tan sori sakafasi awansi dati no makriki? Fu man piki den aksi disi, wi o luku dri situwâsi di kan meki en muilek gi wi fu sori sakafasi. Wi o luku fa wi kan du san bun na ini ibriwan fu den situwâsi dati.—Odo 11:2.

5, 6. Fa Barsilai sori taki a abi sakafasi?

⁵ Te kenki e kon na ini wi libi noso te wi e kisi tra frantwortu, dan dati kan meki en muilek gi wi fu sori sakafasi. Di David aksi Barsilai di ben abi 80 yari, fu kon libi na ini a kownu-oso, dan a ben musu de so taki Barsilai ben e si a sani dati leki wan grani. Efu a ben teki a kari fu David, dan a ben o man tan abi demakandra nanga a kownu. Toku Barsilai no teki a kari. Fu san ede? Barsilai ben owru kaba èn fu dati ede a taigi Kownu David taki a no ben wani tron wan hebi gi en. Dati meki Barsilai taigi David fu gi Kimham a grani disi. A kan taki a man disi ben de wan fu den manpikin fu en.—2 Sam. 19:31-37.

⁶ Fu di Barsilai ben abi sakafasi, meki a ben man teki wan bun bosroiti. A no ben denki taki a no ben bun nofo fu tyari den frantwortu di a ben o kisi èn a no de so tu taki a no ben wani wroko tranga moro tapu en owrudei. A no teki a kari fu David fu di a ben sabi taki a situwâsi fu en ben kenki èn taki a no ben man du so furu moro. Barsilai no ben wani teki tumusi furu frantwortu na en tapu. (Leisi Galasiasma 6:4, 5.) Efu wi e suku nomo fu kisi posisi, biginen, noso grani, dan wi o bigin denki wisrefi nomo, wi o strei nanga trawan èn te fu kaba wi no o firi koloku (Gal. 5:26). Ma sakafasi e yepi wi alamala fu luku san wi kan du fu sorgu taki Gado e kisi glori. A e yepi wi tu fu du bun gi trawan.—1 Kor. 10:31.

7, 8. Fa sakafasi kan yepi wi fu no frutrow tumusi furu tapu wisrefi?

⁷ Nofo tron te wan sma e kisi wan moro hei posisi, a e kisi moro frantwortu tu. A sani dati kan tron wan tesi gi en fu di a no o makriki fu sori sakafasi ala ten. Di Nehemia yere fu den problema di a pipel na ini Yerusalem ben abi, dan a begi Yehovah fayafaya (Neh. 1:4, 11). Yehovah blesi Nehemia di Kownu Artakserkses gi Nehemia a grani fu tron tiriman fu a kontren. A tan waka nanga Gado. A tan suku rai na ini a Wet fu Gado fu kon sabi san Yehovah ben aksi fu en (Neh. 8:1, 8, 9). Nehemia no ben e basi trawan, ma a tan dini trawan sondro fu fruwakti taki den sorgu gi en.—Neh. 5:14-19.

⁸ Na eksempre fu Nehemia e sori fa sakafasi kan yepi wi fu no frutrow tumusi tapu wisrefi te wi e kisi wan tra frantwortu noso te wi e kisi moro frantwortu. Wan owruman di e frutrow tumusi furu tapu ensrefi fu di a abi ondrofeni, kan bigin teki bosroiti gi a gemeente sondro taki a e begi Yehovah fosi. Tra sma kande  e teki wan bosroiti fosi, èn baka dati den e begi Yehovah fu blesi a bosroiti fu den. Wi kan taki dati a sma dati abi sakafasi? Wan sma di abi sakafasi o hori na prakseri ala ten taki Gado bigi moro en èn a e frustan tu fa Gado e gebroiki en na ini na anbegi fu en. Awansi sortu koni wi abi, wi musu luku bun taki wi no e frutrow tapu wisrefi, spesrutu te wi musu du sani di wi gwenti du kaba. (Leisi Odo 3:5, 6.) Leki memre fu na osofamiri fu Gado wi musu du muiti fu tyari den frantwortu di wi abi na ini wi osofamiri èn na ini wi gemeente. Wi no musu feti fu kisi posisi noso biginen.—1 Tim. 3:15.

9, 10. Fa sakafasi kan yepi wi te sma e krutu wi sondro taki wi du wan ogri?

⁹ Son leisi a kan hati wi te sma e krutu wi sondro taki wi du wan ogri. Hana ben gwenti krei fu di Penina, a tra wefi fu en masra, ben e tanteri en doronomo. Hana en masra ben lobi en, ma a no ben man kisi pikin. Bakaten, di a ben e begi na ini a tabernakel, dan a granpriester Eli krutu en taki a ben drungu, aladi dati no ben de so. Denki a tori! Ma aladi den sani disi miti Hana, toku a hori ensrefi èn a piki Eli na wan lespeki fasi. A begi fu en di e naki wi ati, de fu feni na ini Bijbel. Na ini a begi disi a e taki furu sani di e sori taki a abi bribi, taki a e prèise Gado, èn taki a abi warderi gi en.—1 Sam. 1:5-7, 12-16; 2:1-10.

¹⁰ Sakafasi kan yepi wi tu fu „tan du bun fu kan wini na ogri” (Rom. 12:21). Nofo tron libi na ini a grontapu fu Satan no e waka na wan leti fasi èn wi musu du tranga muiti fu no kisi atibron nanga den ogrisma (Ps. 37:1). Ma te wi e kisi problema nanga wi brada nanga sisa, dan dati kan hati wi moro srefi. Wan sma di abi sakafasi o du leki Yesus. Bijbel e taki: „Te sma ben e kosi en fu gi en syen, dan a no ben e kosi den baka. . . . Ma a ben tan saka ensrefi na ondro a sma di e krutu sani na wan reti fasi” (1 Petr. 2:23). Yesus ben sabi taki na Yehovah o pai sma baka gi den ogri di den du (Rom. 12:19). Kresten e kisi a rai tu fu sori sakafasi èn  fu no „pai ogri nanga ogri”.—1 Petr. 3:8, 9.

11, 12. (a) Fa sakafasi kan yepi wi te sma e prèise wi tumusi furu? (b) Fa sakafasi kan yepi wi fu weri krosi di fiti èn fu tyari wisrefi na wan lespeki fasi?

¹¹ Te sma e prèise wi tumusi furu, dan dati kan meki en muilek tu gi wi fu sori sakafasi. Luku a moi fasi fa Ester tyari ensrefi di en libi kon kenki sondro taki a ben fruwakti dati. Ester ben moi srefisrefi èn wan heri yari langa sma ben e sreka en skin nanga ala sortu diri oli. Ibri dei a ben abi demakandra nanga furu yongu uma fu a heri Gran Kownukondre Persia, di ben e suku fu hari a prakseri fu a kownu. Toku a tan tyari ensrefi na wan lespeki fasi. A no kisi bigifasi srefi baka di a kownu teki en fu tron en wefi.—Ester 2:9, 12, 15, 17.

¹² Te wi abi sakafasi, dan wi o weri krosi di fiti, wi o sorgu wisrefi na wan fasi di fiti èn wi o tyari wisrefi na wan lespeki fasi. Wi sabi taki sma o lobi wi te wi abi wan „tiri èn safri fasi”. Den no o lobi wi te wi e dyaf noso te wi e du ala sortu sani fu meki sma poti prakseri na wi. (Leisi 1 Petrus 3:3, 4; Yer. 9:23, 24.) Te wi e denki tumusi furu fu wisrefi na ini wi ati, dan te fu kaba dati o de fu si na den sani di wi e du. Kande wi e taki sani fu meki sma sabi taki wi abi spesrutu grani, taki wi sabi sani di trawan no sabi, noso taki wi na bun mati fu brada di abi bigi frantwortu. Noso kande yu e du leki na yu wawan du wan wroko aladi trawan yepi yu. Wi kan leri wan moi sani baka fu Yesus. Furu fu den sani di a ben e taki ben de sani di a ben teki puru langalanga fu den Hebrew Buku fu Bijbel, noso sani di ben abi fu du nanga den buku disi. A ben e du dati so taki den arkiman ben o sabi taki a no en ben kon nanga den leri dati, ma taki ala den sani disi ben e komoto fu Yehovah.—Yoh. 8:28.

13, 14. Fa sakafasi kan yepi wi fu teki moro bun bosroiti?

¹³ Wan tra sani di kan meki en muilek gi wi fu sori sakafasi, na te wi musu teki bosroiti noso te trawan e teki bosroiti di abi krakti na wi tapu. Di na apostel Paulus ben e tan na ini Sesareya, a profeiti Agabus taigi en taki efu a ben o go na Yerusalem, den ben o grabu en. Kande den ben o kiri en srefi. Fu di den brada ben e frede san sma ben kan du nanga Paulus, meki den begi en fu no go. Ma Paulus no ben wani arki den. Disi no wani taki dati a ben e frutrow tumusi furu tapu ensrefi noso taki a no ben e frede. A ben e frutrow dorodoro tapu Yehovah èn a ben de klariklari fu du a wroko fu en, awansi pe Yehovah ben wani en fu go. Di den brada yere disi, den sori sakafasi èn den tapu fu dwengi Paulus fu no go na Yerusalem.—Tori 21:10-14.

¹⁴ Sakafasi kan yepi wi tu fu teki bun bosroiti srefi te wi no sabi fa sani o waka, èn te wi no man du noti fu meki sani waka soleki fa wi wani. Fu eksempre, te wi e bigin du a furuten diniwroko, dan san o pasa nanga wi te wi e siki? San o pasa efu wi papa nanga mama di kon owru kaba abi wi yepi fanowdu? Fa wi o sorgu wisrefi te wi kon owru? Awansi fa wi e begi noso studeri, wi no o kisi wan krin piki tapu den aksi disi (Preik. 8:16, 17). Te wi e frutrow tapu Yehovah, dan wi o hori na prakseri taki wi no man du ala sani. Baka te wi ondrosuku sani moro fini, te wi suku rai na trawan èn te wi begi Yehovah fu sori wi san fu du, dan wi musu meki a yeye fu Gado tiri wi fu teki a yoisti bosroiti. (Leisi Preikiman 11:4-6.) Na so  Yehovah o man blesi wi, noso a kan yepi wi fu teki wan tra bosroiti.—Odo 16:3, 9.

15. Te wi e prakseri fu Yehovah, dan fa dati e yepi wi fu sori sakafasi?

¹⁵ A tru taki sakafasi kan tyari furu wini kon gi wi, ma san wi kan du fu sori moro sakafasi? Meki wi go luku fo sani di wi kan du. A fosi sani, na taki wi musu leri fu abi warderi gi den fasi fu Gado èn gi a posisi fu en di hei moro leki iniwan trawan. Na so wi o kisi moro sakafasi èn wi o kon abi moro lespeki gi Gado (Yes. 8:13). Hori na prakseri taki wi e waka nanga na Almakti Gado, wi no e waka nanga wan engel noso wan libisma. Te wi e frustan dati, dan disi o yepi wi fu „saka unsrefi na ondro a bigi èn makti Gado”.—1 Petr. 5:6.

16. Te wi e prakseri o furu Gado lobi wi, dan fa dati e yepi wi fu abi sakafasi?

¹⁶ A di fu tu sani di kan yepi wi fu kweki sakafasi, na te wi e prakseri o furu Yehovah lobi wi. Na apostel Paulus ben skrifi taki Yehovah e gi „moro grani” na den pisi fu a skin di sma e si leki den wan di no de so prenspari (1 Kor. 12:23, 24). Na so Yehovah e sorgu tu gi ibriwan fu wi, awansi wi abi swakifasi. A no e teki wi gersi nanga trawan èn a e tan lobi wi awansi wi e meki fowtu. Fu di Yehovah lobi wi, meki wi kan de seiker taki Yehovah e warderi wi awansi fa a e gebroiki wi na ini na anbegi fu en.

17. Sortu krakti a abi na wi tapu te wi e suku a bun na ini trawan?

¹⁷ A di fu dri sani di o yepi wi fu sori sakafasi, na te wi e suku a bun na ini trawan, neleki fa Gado e du dati. Na so wi o kisi moro warderi gi a fasi fa Yehovah e gebroiki wi na ini na anbegi fu en. Wi no o suku nomo taki trawan e poti prakseri na wi èn wi no o abi a gwenti tu fu taigi trawan san den musu du. Na presi fu dati, wi no o si en leki wan problema fu suku rai na trawan èn wi o de klariklari fu du san den e taigi wi (Odo 13:10). Wi o breiti gi den te den e kisi grani. Boiti dati, wi o prèise Yehovah te wi e si fa a e blesi ’ala den brada fu wi na heri grontapu’.—1 Petr. 5:9.

18. San wi musu du fu meki a konsensi fu wi wroko moro bun?

¹⁸ A di fu fo sani di o yepi wi fu sori sakafasi, na te wi e meki den leri fu Bijbel tiri a konsensi fu wi. Disi o yepi wi fu kon sabi moro krin fa wi musu sorgu wisrefi na wan fasi di fiti èn fa wi kan tyari wisrefi na wan lespeki fasi. Wi o man teki bun bosroiti te wi e leri fu si sani soleki fa Yehovah e si sani. Te wi gwenti studeri, te wi gwenti begi èn te wi e du san wi e leri, dan safrisafri a konsensi fu wi o wroko moro bun (1 Tim. 1:5). Wi o leri fu si trawan moro prenspari leki fa wi e si wisrefi. Efu wi e du san wi musu du, dan Yehovah e pramisi taki a o ’gi wi leri dorodoro’ èn taki a o yepi wi fu kon abi sakafasi nanga tra moi fasi fu en.—1 Petr. 5:10.

19. San o yepi wi fu tan sori sakafasi fu ala ten?

¹⁹ Di a profeiti fu Yuda prefuru fu du wan sani di a no ben mag du, dan a wan-enkri sani dati meki taki Gado no ben feni en bun moro. Ma wi kan tan sori sakafasi, awansi wi e kisi tesi. Reti-ati anbegiman fu Gado na ini owruten, sosrefi sakafasi brada nanga sisa na ini a ten disi, sori taki a sani dati kan. O moro wi e waka nanga Yehovah, o moro wi musu sori sakafasi (Odo 8:13). Awansi fa Gado e gebroiki wi now na ini na anbegi fu en, a moro bigi grani di wi kan abi, na taki wi e waka nanga Yehovah. Warderi a grani dati èn tan meki muiti fu sori sakafasi aladi yu e waka nanga Yehovah fu ala ten.