YU E skreki te sma e aksi yu: Gado abi ogri-ati? Son sma e skreki, ma wan lo sma na ini a ten disi e aksi densrefi efu Gado abi ogri-ati, noso kande den e denki so fu en. Fu san ede?

Son sma di tan na libi baka di wan rampu pasa e aksi densrefi: „Fu san ede Gado e gi pasi taki den sani disi e pasa? Na broko a no e broko en ede nanga sma? Noso na ogri-ati a abi?”

Tra sma e broko den ede nanga den sortu sani dati tu te den e leisi Bijbel. Te den e leisi tori soleki a wan fu Noa nanga a Frudu, dan den e aksi densrefi: ’Fu san ede wan lobi-ati Gado ben o kiri ala den sma dati? Na ogri-ati a abi?’

Yu e aksi yusrefi den sani dati son leisi? Noso yu feni taki yu no sabi fa fu piki den sma di e aksi densrefi efu Gado abi ogri-ati. We, luku wan aksi di kan yepi yu.

Wi no lobi te sma e du ogri-ati sani, fu di wi sabi san bun èn san ogri. Te a abi fu du nanga a tori disi, dan wi de heri tra fasi leki meti. Wi Mekiman meki wi „leki fa ensrefi de” (Genesis 1:27). San dati wani taki? A meki wi na so wan fasi taki wi man sori den fasi fu en, èn taki neleki en wi man sabi san bun èn san ogri. Denki a tori disi: Efu Gado meki wi na so wan fasi taki wi man sabi san bun èn san ogri, èn efu wi no lobi te sma e du ogri-ati sani, dan dati e sori taki Gado no lobi den sani dati tu, a no so?

Bijbel e sori taki a sani disi tru, fu di a e gi wi a dyaranti disi: „Den pasi fu mi hei moro den pasi fu unu èn den prakseri fu mi hei moro den prakseri fu unu” (Yesaya 55:9). Efu wi ben o taki dati Gado abi ogri-ati, dan wi ben o taki wan heri tra sani, a no so? Te yu luku en bun, dan wi ben o taki dati den pasi fu wi hei moro den pasi fu en. Dati meki a bun fu kon sabi sani moro fini, fosi wi e kisi a denki dati. A sani di wi musu aksi wisrefi, a no efu Gado abi ogri-ati, ma fu san ede a gersi leki a e du ogri-ati sani. Fu man kisi piki tapu na aksi dati, dan meki wi go luku san a wortu „ogri-ati” wani taki trutru.

Te wi e taki dati wan sma abi ogri-ati, dan wi e taki dati den abi takru prakseri. Wan ogri-ati sma lobi fu si fa tra sma e pina, èn a no e broko en ede nanga den. Sobun, wan papa di e wipi a boi fu en soso fu di a lobi tanteri en, na wan ogri-ati papa. Ma te wan papa e strafu a boi fu en fu di a wani leri en wan sani noso fu di a wani kibri en gi ogri, dan a papa dati na wan bun papa. Fu di wi no sabi ala ten fu san ede sma e du son sani, meki makriki wi kan denki takru fu den. Yu sa sabi dati, efu oiti wan sma ben denki takru fu yu.

Meki wi luku tu reide fu san ede son sma e denki taki Gado abi ogri-ati. Wán fu den na den rampu di e pasa na ini a ten disi, èn a trawan na den strafu di Gado gi sma, soleki fa wi e leisi na ini Bijbel. Den sani dati e sori taki Gado abi ogri-ati?