YOSEF e tanapu na ini en dyari te son e dongo. Kande a e luku den dadel-bon, den froktu bon, nanga den bromki di e gro na ini watra. Leti baka a skotu, a kan si na oso fu a kownu fu Egepte. Kande Yosef e yere fa sma e lafu na ini en oso. Manase, a boi fu en e meki en pikin brada, Efrayim lafu. Yosef kan si kaba fa en frow di de na inisei e lafu te a e luku fa den boi e prei nanga makandra. Iya, Yosef e firi koloku, fu di a sabi taki Gado blesi en.

Yosef kari en fosi manpikin Manase, san wani taki frigiti yu broko-ede (Genesis 41:51). A no de fu taki dati den blesi di Gado gi Yosef na ini den yari di pasa, e yepi en fu no sari tumusi te a e prakseri den brada fu en nanga en papa di de bun fara. Fu di den brada fu en ben e teige en, meki en libi kon kenki. Den ben fon en, den ben wani kiri en, èn te fu kaba den seri en leki srafu gi bisnisman. Sensi a ten dati, a pasa omeni bigi problema na ini en libi. Sowan twarfu yari langa a ben de wan srafu, èn fu wan pisi ten a ben de na strafu-oso na ini isri bui. Ma now a tron a moro makti man baka a kownu fu Egepte! *

Wan tu yari kaba, Yosef si taki sani e waka soleki fa Yehovah ben taki na fesi. Na wan tu yari kaba, nyanyan ben lai na ini Egepte, èn Yosef ben sorgu taki a nyanyan di ben tan abra ben poti na ini maksin. Na ini a pisi ten dati, en nanga en frow Asenat kisi tu boi. Toku ten na ten a e prakseri en famiri di e tan hondrohondro kilometer fu en, spesrutu en pikin brada Benyamin nanga en lobi papa Yakob. Kande Yosef e aksi ensrefi efu sani e go bun nanga den. Kande a e prakseri tu efu den bigi brada fu en kenki den takru maniri fu den, noso efu wan ten o kon te en nanga en famiri o de makandra baka.

Efu yu nanga yu famiri kon prati fu di dyarusu de na ini a famiri, fu di sma e lei gi makandra, noso fu di den e teige makandra, dan na a srefi sani di ben miti Yosef e miti yu. San yu kan leri fu a bribi fu Yosef te yu e luku fa a sorgu gi en famiri?

Yosef ben abi furu wroko fu du èn den yari ben e pasa esi-esi. Ma sani kenki baka den seibi yari di nyanyan ben lai, neleki fa Yehovah ben meki Kownu si na ini en dren. A gron no ben e gi nyanyan moro! Te fu kaba angriten ben de na ini ala den kondre krosibei fu Egepte. Ma Bijbel e taki dati „na ini a heri kondre Egepte nyanyan ben de” (Genesis 41:54). A no de fu taki dati den sani di Yehovah ben meki Yosef kon sabi, èn a fasi fa Yosef ben orga sani bun, ben tyari wini kon gi den Egeptesma.

A no de fu taki dati den Egeptesma ben de nanga tangi gi san Yosef ben du, èn den ben prèise en gi dati. Ma Yosef ben sabi taki a no en ben musu kisi a grani, ma na Yehovah, a Gado fu en.  Te wi e gebroiki den koni di wi abi fu wroko gi wi Gado, dan a kan meki wi du sani di noiti wi ben prakseri taki wi ben o man du.

Ma te fu kaba den Egeptesma srefi bigin firi na angriten. Di den go na Kownu fu suku yepi, dan a taigi den: „Un go na Yosef. Ala san a e taigi unu, na dati un musu du.” Na so Yosef bigin opo den aleisimaksin èn den sma ben kan bai a nyanyan di den ben abi fanowdu.—Genesis 41:55, 56.

Ma den sma na ini den kondre lontu Egepte, no ben abi nyanyan na ini den kondre. Yosef famiri di ben e libi na ini Kanan di ben de hondrohondro kilometer moro fara, ben e pina fu angri. Di Yakob kon yere taki aleisi de na ini Egepte, dan a taigi den manpikin fu en fu go bai aleisi drape.—Genesis 42:1, 2.

Yakob seni den tin manpikin fu en go, ma a no seni Benyamin, a moro yonguwan. Kande Yakob ben e memre a ten di a ben seni en lobi manpikin Yosef fu go luku fa a ben de nanga den bigi brada fu en. Dati ben de a lasti leisi di Yakob ben si a manpikin fu en. Den bigi brada fu en ben drai kon na oso nanga a moi langa krosi di Yakob ben meki gi Yosef fu di a ben lobi en. A krosi ben pritipriti èn a ben lai brudu. Ne den fruteri a pôti papa fu den taki wan ogri meti ben nyan Yosef.—Genesis 37:31-35.

Den manpikin fu Yakob ben de bun langa na pasa, èn te fu kaba den doro Egepte. Di den aksi pe den kan bai aleisi, sma seni den go na wan hei tiriman fu Egepte di ben nen Safnat-Paneyak (Genesis 41:45). Den ben sabi taki na Yosef? Nôno. Gi den a ben de wan makti tiriman di ben kan yepi den. Dati meki den „boigi gi en nanga den fesi go na gron”, fu sori lespeki leki fa a gwenti ben de.—Genesis 42:5, 6.

Ma Yosef ben sabi taki na den brada fu en? Iya, a ben sabi. Ma a no dati wawan, di a si taki den ben e boigi gi en, dan wantewante a prakseri wan sani di ben pasa bun langa kaba. Bijbel e taki dati „wantewante Yosef memre den sani di a ben dren” di a ben de wan yongu boi. Yehovah ben meki a dren taki den brada fu en ben o boigi gi en, èn na dati ben e pasa now (Genesis 37:2, 5-9; 42:7, 9). San Yosef ben o du? A ben o gi den pardon, noso a ben o pai ogri fu ogri?

Yosef ben sabi taki a no ben kan teki wan bosroiti esi-esi. A ben frustan taki na Yehovah ben e meki sani waka so, fu man du san a ben abi na prakseri. Yehovah ben pramisi taki a ben o meki den bakapikin fu Yakob kon furu (Genesis 35:11, 12). Efu den brada fu Yosef ben abi ogri-ati ete, noso efu den ben e denki densrefi nomo, dan a sani dati ben kan tyari takru bakapisi kon gi a famiri. Boiti dati, efu Yosef ben teki wan bosroiti esi-esi, dan kande a ben kan meki ogri miti den sma na oso. Kande den brada fu en ben o du ogri nanga en papa nanga Benyamin. A no ben sabi srefi efu den ben de na libi ete. Yosef  bosroiti fu no taigi den brada fu en suma na en, fu di a ben wani luku efu den ben kenki. Na so a ben o sabi san Yehovah ben wani taki a ben musu du.

Kande noiti yu o de na ini so wan situwâsi. Toku na ini a grontapu disi furu osofamiri e prati fu di den e strei nanga makandra. Te wi de na ini so wan problema, dan kande wi ben o du san a sondu skin fu wi wani. Ma a moro bun fu teki na eksempre fu Yosef èn fu pruberi fu si san Yehovah wani taki wi du (Odo 14:12). No frigiti taki aladi a prenspari fu meki freide nanga yu famiriman, toku a de moro prenspari fu abi freide nanga Yehovah èn nanga en Manpikin.—Mateyus 10:37.

Yosef du wan tu sani fu kon sabi fa den brada fu en ben de now. A bigin taki grofu nanga den, èn a taigi den taki na luku den ben kon luku a kondre na wan kibri fasi. Ma a ben taki na ini Egeptetongo èn a ben meki wan sma vertaal gi den. Ne den taigi en taki den no kon luku a kondre, èn den bigin fruteri en fu den famiri. Den fruteri en srefi taki den ben abi wan pikin brada na oso ete. Yosef pruberi fu no sori den fa a ben e firi. A ben breiti taki en pikin brada ben de na libi ete. Now a ben sabi san a ben musu du. A taigi den taki a ’wani luku efu den no e lei’, ne a taki dati a wani si a pikin brada fu den. Te fu kaba, a taki dati a o ben o seni den go na oso fu teki den pikin brada tyari kon, ma wan fu den ben musu tan na baka.—Genesis 42:9-20.

Den brada fu Yosef e taki fu a tori, ma den no ben sabi taki Yosef man frustan den. Den ben e krutu nanga makandra fu na ogri di den ben du 20 yari pasa. Den taki: „A musu de taki wi e kisi strafu now gi den sani di wi du nanga a brada fu wi. Wi si a nowtu fu en di a ben e begi wi fu abi sari-ati nanga en, ma wi no ben arki. Na fu dati ede nowtu kon miti wi now.” Fu di Yosef ben frustan san den ben e taki, meki a drai en fesi so taki den no si taki a ben e krei (Genesis 42:21-24). Ma a ben sabi taki a no te wan sma e sari fu di a e firi den takru bakapisi fu wan ogri di a du, dan dati wani taki dati a abi trutru berow. Dati meki a go doro fu luku efu den kenki trutru.

A seni den go na oso, ma a hori Simeon na strafu-oso. Boiti dati, a kibri moni na ini den saka pe den ben poti aleisi fu tyari go na oso. Den brada go na oso èn nanga bun furu muiti den kisi Yakob fu meki Benyamin go nanga den na Egepte. Di den doro Egepte den fruteri a man di ben e wroko gi Yosef, taki den ben feni moni na ini den saka fu den, èn den ben wani pai en ala a moni baka. A moi taki den ben wani du dati, ma dati no ben sari ete gi Yosef fu sabi fa den de trutru. Dati meki a sreka furu nyanyan gi den, ma a du muiti fu hori ensrefi di a si Benyamin. Baka dati a seni den go na oso nanga furu aleisi, ma disi leisi a ben meki sma kibri wan solfru kan na ini Benyamin saka.—Genesis 42:26–44:2.

Ne Yosef seni sma go na den baka fu grabu den fu di den ben feni taki den fufuru a kan. Di sma feni a kan na ini Benyamin saka, dan den tyari den alamala go na Yosef. Now Yosef ben o man si efu den brada fu en ben kenki trutru. Yuda bigin taki gi den. A begi Yosef fu gi den pardon, èn a taki srefi taki den alamala o tron srafu nanga Benyamin. Ma Yosef ben feni taki na Benyamin wawan musu tan leki srafu na ini Egepte, ma taki den trawan musu gowe.—Genesis 44:2-17.

Ne Yuda bigin begi en. A taki: „En na a wan-enkri pikin fu en mama di de ete èn en papa lobi en.” A musu de so taki den wortu disi naki Yosef ati, fu di a ben de a moro owru manpikin fu Rakel, a lobi wefi fu Yakob, di ben dede di a ben de fu kisi Benyamin. A de krin taki neleki en papa, Yosef ben e prakseri Rakel furu. Kande na fu di en nanga Benyamin ben abi wan mama meki a ben lobi en so.—Genesis 35:18-20; 44:20.

Yuda tan begi Yosef fu no hori Benyamin leki srafu. A taki srefi dati en ben wani tron srafu na presi fu Benyamin. Te fu kaba a taki: „Fa mi kan go na mi papa efu a boi no de nanga mi? Mi no  o man tyari en efu a bigi ogri disi miti mi papa”! (Genesis 44:18-34) Now a ben de krin taki Yuda ben kenki. A no sori nomo taki a ben abi berow, ma a ben de krin fu si taki a ben e firi gi trawan, taki a no ben prakseri ensrefi nomo, èn taki a ben abi sari-ati.

Yosef no ben man hori ensrefi moro. A ben abi fu bari krei now. A seni ala den futuboi fu en gowe, ne a bari krei so tranga taki den yere en te na a oso fu Kownu. Baka dati a taigi den brada fu en suma na en: „Mi na Yosef, un brada.” A brasa den brada fu en di ben skreki èn a taigi den na wan switifasi taki a gi den pardon fu ala den sani di den ben du nanga en (Genesis 45:1-15). Na so Yosef sori taki a de klariklari fu gi trawan pardon, neleki fa Yehovah e du dati (Psalm 86:5). Wi e du dati tu?

Di Kownu kon sabi san ben de a babari di a ben e yere na Yosef oso, dan a taigi Yosef fu meki en papa nanga en heri famiri kon na Egepte. Syatu baka dati, Yosef ben de makandra baka nanga en lobi papa. Yakob krei èn a taki: „Now fosi mi kan dede. Mi si yu fesi èn mi sabi taki yu de na libi ete.”—Genesis 45:16-28; 46:29, 30.

Ma Yakob libi ete 17 yari na ini Egepte fosi a dede. A libi langa nofo fu man blesi den 12 manpikin fu en. A gi Yosef, a di fu 11 manpikin fu en, a grani di nofo tron na a fosi manpikin ben e kisi. Tu fu den lo fu Israel ben o komoto fu Yosef. San a ben taki fu Yuda a di fu fo manpikin fu en, di ben sori so furu berow? Yuda kisi wan bigi blesi: A Mesias ben o komoto fu a lo fu en!—Genesis, kapitel 48, 49.

Yakob dede di a ben abi 147 yari. Now den brada fu Yosef ben frede taki a brada fu den di ben abi furu makti ben o du ogri nanga den. Ma Yosef trowstu den. A taigi den taki den no musu tan firi sari fu san ben pasa, fu di na Yehovah ben seti sani so, taki a famiri ben kan kon na Egepte. Ne a aksi den a sani disi: „Mi na Gado?” (Genesis 15:13; 45:7, 8; 50:15-21) Yosef ben e si Yehovah leki a moro bigi Krutuman. A ben sabi taki a no abi a reti fu strafu sma di Yehovah ben gi pardon.—Hebrewsma 10:30.

Yu e feni en muilek fu gi trawan pardon? A kan muilek fu du dati, spesrutu efu wan sma du wan hati sani fu espresi nanga yu. Ma te wi e gi sma di sori trutru berow, pardon nanga wi heri ati, dan wi e yepi den fu no sari moro, èn wisrefi o firi bun. Na so wi e sori taki wi abi bribi neleki Yosef, èn wi e teki na eksempre fu Yehovah, wi Tata di abi furu sari-ati.