Bantfu lababangani labakhulu bayakhulumisana, kuye ngekutsi timo tabo tibavumela kangakanani, kungaba kunababonana nobe ngelucingo, ngema-e-mail, ngema-video, nobe ngekubhalelana tincwadzi. Ngako-ke kute sisondzelane naNkulunkulu kudzingeka sikhulumisane naye njalo. Kodvwa singakwenta njani loku?

Singakhuluma naNkulunkulu ngemthantazo. Kodvwa-ke, kuthantaza kuNkulunkulu akufani nekucoca lokujwayelekile longakwenta nantsanga yakho. Kufanele sati kutsi nasithantaza sisuke sikhuluma neMdali, Losetikwako Konkhe lokukhona. Loku kufanele kusente sithantaze ngenhlonipho lenkhulu nangekutitfoba. Kute Nkulunkulu ayemukele imithantazo yetfu, kunetintfo lokufanele sitente. Nati letintsatfu tato.

Kwekucala, imithantazo yetfu kufanele siyicondzise kuJehova Nkulunkulu kuphela, hhayi kuJesu, nobe kusanta nobe esitfombeni. (Eksodusi 20:4, 5) LiBhayibheli lisho ngalokucacile litsi: “Kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga.” (Filiphi 4:6) Kwesibili, imithantazo kufanele yentiwe egameni leNdvodzana yaNkulunkulu, lenguJesu Khristu. NaJesu wakuchaza loku, nakatsi: “Kute umuntfu lota kuBabe ngaphandle kwekutsi ete ngami.” (Johane 14:6) Kwesitsatfu, imithantazo yetfu kufanele ihambisane nentsandvo yaNkulunkulu. LiBhayibheli litsi: “Kunobe yini lesiyicela ngekwentsandvo yakhe, uyasiva.” a​—1 Johane 5:14.

Kuyavunywa kutsi bungani ngeke buchubeke sikhatsi lesidze nangabe kungumuntfu munye lokhulumako. Njengobe nebangani bakujabulela kucocisana, natsi kufanele simvumele Nkulunkulu akhulume natsi futsi simlalele naye nakakhuluma natsi. Uyati yini kutsi Nkulunkulu ukhuluma kanjani natsi?

Lamuhla, Jehova Nkulunkulu ukhuluma natsi asebentisa liVi lakhe liBhayibheli. (2 Thimothi 3:16, 17) Yini lesenta sisho njalo? Nasi sibonelo: Asesitsi utfola incwadzi lebuya kumngani wakho lomkhulu. Nasewuyifundzile, ungabatjela labanye ujabulile, utsi: “Umngani wami ucedza kungitjela kutsi . . . !” Loko ungakwenta nanome akubhalele incwadzi, angakakhulumi nawe buso nebuso. Ngendlela lefanako, ngekufundza liBhayibheli, usuke uvumela Jehova kutsi akhulume nawe. Kungako Gina, lokukhulunywe ngaye esihlokweni sekucala, atsi: “Ngicabanga kutsi nangifuna kutsi Nkulunkulu angitsatse njengemngani wakhe, kufanele ngihlolisise incwadzi lasibhalele yona, liBhayibheli.” Naku lokunye lakushoko: “Kufundza liBhayibheli onkhe emalanga kungisondzete edvute naNkulunkulu.” Uyamvumela yini Jehova kutsi akhulume nawe lilanga ngalinye ngekufundza liVi lakhe liBhayibheli onkhe emalanga? Loko kutakusita kutsi utive usondzele kakhudlwana kuNkulunkulu.