SIHLOKO LESINGUMGOGODLA | TIMPHI TIYAMJABULISA YINI NKULUNKULU?
Betimjabulisa Yini Nkulunkulu Yimphi Ngelikhulu Lekucala leminyaka?
EmaJuda bekacindzetelekile. Njengabokhokho bawo, emaJuda angelikhulu lekucala leminyaka athantaza kuJehova acela kutsi awasite. Titsa talabantfu baNkulunkulu besekungumbuso wemaRoma lonesihluku. EmaJuda lamanyenti besekavile ngaJesu, bekunguye yini loMesiya lebekukhulunywe ngaye? Asingabati kutsi labanyenti ‘besebetsemba kutsi nguye lobekatawukhulula ema-Israyeli’ kulamaRoma labekabagcilata. (Lukha 24:21) Kodvwa akazange awakhulule. Esikhundleni saloko nga-70 C.E., libutfo lemaRoma labhubhisa liJerusalema nelithempeli.
Bese kwentekeni? Nkulunkulu bekangasawalekeleli ngani emaJuda ngendlela bekenta ngayo kubokhokho bawo? Bekangawavumeli ngani-ke kutsi alwe netitsa tawo kuze atokhululeka? Nkulunkulu besekashintjile yini? Cha. Kodvwa emaJuda ngiwo lebesekashintjile. Akazange emukele kutsi Jesu nguMesiya. (Imisebenti 2:36) Ngako alahlekelwa buhlobo bawo naNkulunkulu.—Matewu 23:37, 38.
Sive semaJuda nelive lawo bekungakavikelwa nguNkulunkulu ngako bekangeke asawasita nakaya etimphini. Njengobe Jesu abeshito tibusiso taNkulunkulu besetisusiwe ku-Israyeli wenyama tanikwa lesinye sive lesibitwa ngekutsi ‘ngu-Israyeli waNkulunkulu.’ (Galathiya 6:16; Matewu 21:43) EmaKhristu lagcotjiwe angelikhulu lekucala leminyaka ngiwo lebesekakha Israyeli waNkulunkulu. Kungako atjelwa kutsi: “Nyalo senibantfu baNkulunkulu.”—1 Phetro 2:9, 10.
Nkulunkulu wawalwela yini emaKhristu angelikhulu lekucala lebesekutsiwa ‘abantfu baNkulunkulu,’ kute akhululeke etitseni tawo? Wawavumela yini kutsi ayokulwa nato? Cha akazange. Leni? Njengobe sifundzile esihlokweni lesendlulile, nangabe imphi beyigunyatwe nguNkulunkulu, nguye lobekancuma kutsi bobani labatakulwa futsi balwe nini. Nkulunkulu akazange awalwele emaKhristu angelikhulu lekucala futsi akazange awavumele kutsi alwe. Kuyabonakala kutsi likhulu lekucala leminyaka bekungasiso sikhatsi saNkulunkulu sekucedza bubi nekucindzeteleka.
EmaKhristu angelikhulu lekucala bekufanele abeketele, amele sikhatsi Jehova lakhetse kucedza ngaso kuhlupheka kwawo. Nasisengakafiki leso sikhatsi bekangakavunyelwa kutsi alwe netitsa tawo. Jesu wakucacisa loku nakafundzisa. Akazange akhutsate balandzeli bakhe kutsi balwe, esikhundleni saloko watsi: “Chubekani nitsandza titsa tenu futsi nithantazele labo labaniphatsa kabi.” (Matewu 5:44) Ngesikhatsi Jesu atjela bafundzi bakhe kutsi liJerusalema litawuhlaselwa libutfo lemaRoma, akazange abatjele kutsi balwe nalo, kunaloko watsi babobaleka futsi bamlalela.—Lukha 21:20, 21.
Nemphostoli Pawula waphefumulelwa kutsi abhale: “Ningatiphindziseleli, . . . Jehova utsi: ‘Kuphindzisela kwami, ngimi lengitawuphindzisela.’” (Roma 12:19) Lamavi lawasho Pawula wawatsatsa encwadzini yaLevithikhusi 19:18 kanye neyaDutheronomi 32:35, besekuphele emakhulu eminyaka abhaliwe. Njengobe sifundzile esihlokweni lesendlulile, imphi ngulenye indlela Nkulunkulu lebekatiphindziselela ngayo etitseni takhe. Lamavi lashiwo nguPawula akhombisa kutsi imphi bekusolo kuyindlela Nkulunkulu lacedza ngayo kuhlupheka. Ngisho nangelikhulu lekucala abesengayisebentisa kuze acedze konkhe kuhlupheka kwebantfu bakhe. Kodvwa-ke njengakadzeni nguNkulunkulu lobekancuma kutsi ngubani lotakulwa futsi nini.
Sesibonile kutsi ngelikhulu lekucala leminyaka Nkulunkulu akazange awavumele emaKhristu kutsi alwe timphi. Lamuhla-ke, uyabavumela yini Nkulunkulu bantfu kutsi balwe timphi? Sesifikile yini sikhatsi sekutsi Nkulunkulu alwele bantfu labamkhontako? Utsini Nkulunkulu ngetimphi lamuhla? Sihloko lesilandzelako sitayiphendvula lemibuto.
