Kulandzisa KwaMatewu 22:1-46
22 Jesu waphindze wakhuluma nabo asebentisa imifanekiso watsi:
2 “UMbuso wemazulu ungafananiswa nenkhosi leyentela indvodzana yayo lidzili lemshado.+
3 Yatfuma tisebenti tayo kutsi tiyobita lebebamenyiwe, kodvwa bala kuta.+
4 Yaphindze yatfumela letinye tisebenti yatsi: ‘Tjelani labo labamenyiwe kutsi abete edzilini ngobe selilungile, futsi sengivele ngitihlabile tinkhabi netinkhomo tami letikhuluphele, konkhe sekume ngemumo.’
5 Kodvwa letimenywa atibanga nendzaba ngaloko futsi tesuka tahamba, letinye taya emasimini ato, kantsi letinye taya emabhizinisini ato;+
6 letinye tabamba letisebenti tatishaya futsi tatibulala.
7 “Lenkhosi yatfukutsela kakhulu, futsi yakhipha emasotja ayo ayewubulala lalababulele letisebenti tayo, ashisa nelidolobha labo.+
8 Yase itsi etisebentini tayo: ‘Lidzili selilungile, kodvwa labo lebebamenyiwe bebangakufaneli kuba khona.+
9 Ngako-ke hambani niye emigwacweni nimeme wonkhe umuntfu lenimtfola khona kutsi ete edzilini.’+
10 Letisebenti taphuma taya emigwacweni tagcogca bonkhe letatihlangana nabo, labalungile nalabangakalungi; futsi lendlu lokwakunalelidzili kuyo yagcwala.
11 “Inkhosi nayifika itewuhlola letimenywa, yabona indvodza lebeyingakagcoki timphahla tasemshadweni.
12 Ngako yatsi kulendvodza: ‘Wakitsi, ungene njani lapha ungakagcoki timphahla tasemshadweni?’ Lendvodza yavele yabindza.
13 Lenkhosi yase itsi etisebentini tayo: ‘Mbopheni tandla netinyawo, nimlahlele ngephandle ebumnyameni. Kulapho atawufikelwa khona kukhala nekugedletela kwematinyo.’
14 “Ngobe banyenti labamenyiwe, kodvwa bambalwa labakhetsiwe.”
15 Ngako baFarisi besuka bayewukwakha lisu lekugiba Jesu ngaloko lakushoko.+
16 Batfuma bafundzi babo nemalunga elicembu laHerodi,+ bafike batsi kuye: “Mfundzisi, siyati kutsi ukhuluma liciniso futsi ufundzisa indlela yaNkulunkulu ngeliciniso, nekutsi awutsengi emehlo emuntfu, ngobe awubuki loko umuntfu langiko ngephandle.
17 Sitjele-ke: Ucabangani? Kuvumelekile* yini kutsi sikhiphe umtselo kuKhesari?”
18 Ngenca yekutsi Jesu abekwati lokubi lebebakuhlosile, watsi: “Batentisi, ningilingelani?
19 Ngikhombiseni luhlavu lwemali lenitsela ngayo.” Ngako bamnika denariyo.*
20 Watsi kubo: “Sabani lesitfombe nalelibito lelilapha?”
21 Batsi kuye: “KwaKhesari.” Jesu watsi kubo: “Ngako nikani Khesari lokukwakhe, kodvwa ninike Nkulunkulu lokukwakhe.”+
22 Nabeva loko, bamangala futsi bamshiya babese bayahamba.
23 Ngalelolanga kweta baSadusi, bona lebebatsi labafile ngeke bavuswe,+ bambuta batsi:+
24 “Mfundzisi, Mosi watsi: ‘Nangabe indvodza ifa ibe ite bantfwana, umnakabo kufanele angene umfati wayo, kuze atewutalela umufi bantfwana.’+
25 Manje-ke bekunetelamani letingu-7, futsi lowekucala watsatsa umfati wase uyafa ete bantfwana, umnakabo wamngena lomfati.
26 Kwenteka lokufanako nakuwesibili newesitsatfu bate baphela bonkhe bongu-7.
27 Ekugcineni lomfati naye wafa.
28 Ngako-ke nasekuvuswa labafile, lomfati utawuba wabani kuletelamani letingu-7, ngobe ube ngumfati wabo bonkhe?”
29 Jesu wabaphendvula watsi: “Nidukile ngobe aniyati imiBhalo kanye nemandla aNkulunkulu.+
30 Nasekuvuswa labafile, labadvuna ngeke batsatse bafati nalabasikati ngeke bashade, kodvwa batawufana netingilosi tasezulwini.+
31 Mayelana nekuvuswa kwalabafile, anikufundzanga yini loko Nkulunkulu lanitjela kona nakatsi:
32 ‘Mine nginguNkulunkulu wa-Abrahama, wa-Isaka newaJakobe’?+ Yena unguNkulunkulu walabaphilako, hhayi walabafile.”+
33 Sicumbi sebantfu satsi nasiva loku, samangala ngenca yaletintfo labetifundzisa.+
34 BaFarisi batsi nabeva kutsi baSadusi behlulekile kuphendvula Jesu, base babutsana ndzawonye.
35 Lomunye wabo labewati kahle uMtsetfo wamlinga ngekumbuta atsi:
36 “Mfundzisi, ngumuphi umtsetfo lomkhulu kunayo yonkhe eMtsetfweni waMosi?”+
37 Jesu watsi kuye: “‘Kufanele utsandze Jehova* Nkulunkulu wakho ngayo yonkhe inhlitiyo yakho, nangawo wonkhe umphefumulo* wakho, nangayo yonkhe ingcondvo yakho.’+
38 Lona ngiwo umtsetfo wekucala futsi lomkhulu kunayo yonkhe.
39 Wesibili lofana nawo utsi: ‘Kufanele utsandze makhelwane wakho njengobe utitsandza wena.’+
40 Wonkhe uMtsetfo waMosi kanye nalokwashiwo baPhrofethi kusekelwe kulemitsetfo lemibili.”+
41 Ngesikhatsi baFarisi basabutsene, Jesu wababuta watsi:+
42 “Nicabanga kutsi Khristu uyindvodzana yabani?” Bona batsi: “Uyindvodzana yaDavide.”+
43 Yena watsi kubo: “Kungani-ke ngesikhatsi Davide achutjwa ngumoya longcwele,+ ambita ngekutsi yiNkhosi, nakatsi:
44 ‘Jehova* watsi eNkhosini yami: “Hlala ngesekudla sami kuze kube ngulapho titsa takho ngitibeka ngephansi kwetinyawo takho”’?+
45 Nangabe Davide ambita ngekutsi yiNkhosi, kungenteka njani-ke kutsi abe yindvodzana yakhe?”+
46 Kute lowakhona kumphendvula, futsi kusukela ngalelolanga kuchubeke, kute lowaba nesibindzi sekumbuta.
Imibhalo lengentansi
^ Nobe “Kukahle.”
^ Fundza Sandzisanchazo B14.
^ Fundza Sandzisanchazo A5.
^ Fundza Tinchazelo Temagama.
^ Fundza Sandzisanchazo A5.