Tintfo letibalulekile letinjengelikhaya nobe imoto kufanele tinakekelwe kahle. Kuyintfo lefanako nangebuhlobo bakho naNkulunkulu. Yini lotayenta kuze uhlale unebuhlobo lobuhle naNkulunkulu ngemuva kwekubhajatiswa?

Kulesihloko

•  Chubeka udadisha liVi laNkulunkulu

•  Chubeka uthantaza kuJehova

•  Chubeka ucocela labanye ngalokukholelwako

•  Chubeka uya emihlanganweni yebuKhristu

 Umbhalo loyinhloko: Chubekani “nitsela titselo kuyo yonkhe imisebenti lemihle, futsi nikhula elwatini lolungulonalona ngaNkulunkulu.”​—KubaseKholose 1:10.

 Lokukushoko: Ngemuva kwekubhajatiswa kutawudzingeka uchubeke ufundza liBhayibheli futsi uzindle ngaloko lokufundzako.​—Tihlabelelo 25:4; 119:97.

 Yini longayilindzela: Ngaletinye tikhatsi ungativa ungakhanuki kufundza liBhayibheli. Kungenteka ucabange kutsi loku kusho kutsi “awusuye umuntfu lotsandza kufundza.”

 Longakwenta: Fundza ujule ngetihloko teliBhayibheli lotitsandzako. Takhele luhlelo lwakho lwekudadisha liBhayibheli​—lolungeke lukwekhame. Umgomo wakho kukhulisa indlela lomtsandza ngayo Jehova kanye neliVi lakhe. Lendlela yekudadisha itakuzuzisa futsi utayijabulela.​—Tihlabelelo 16:11.

 Naka: Kuze uzuze kakhulu nawudadisha, yetama kutfola indzawo lethulile nalete tiphazamiso.

 Lokunye lokungakusita

•   Fundza:

   “Lingangisita Njani LiBhayibheli?​—Incenye 2: Yenta Kufundza Kwakho LiBhayibheli Kujabulise”

   “Yini Engingayenza Ukuze Ngikwazi Ukugxilisa Ingqondo?” lesitfolakala ngesiZulu.

•   Bukela:

   Loko Lokushiwo Bontsanga Yakho​—Kufundza LiBhayibheli

•   Titsatsele:

   “Izinhlelo Zokufunda IBhayibheli” lesitfolakala ngesiZulu.

 Umbhalo loyinhloko: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga.”​—KubaseFiliphi 4:6.

 Lokukushoko: Kukhuluma naNkulunkulu kusho kumlalela nawufundza liBhayibheli, kanye nekukhuluma naye nawuthantaza. Nawuthantaza ungacela Nkulunkulu akusite, kantsi futsi ungambonga nangetibusiso lakuphe tona.

 Yini longayilindzela: Ngaletinye tikhatsi ungeva shengatsi imithantazo yakho ayitfutfuki. Ungaze ungabate kutsi Jehova uyakulalela.​—Tihlabelelo 10:1.

 Longakwenta: Njengobe lilanga lisachubeka cabanga ngetintfo longathantaza ngato. Nangabe timo tingavumi kutsi uthantaze umthantazo lomudze ngaleso sikhatsi, kubhale phansi loko lofuna kukuthantazela kuze uthantaze ngako timo nasetivuma. Ngetulu kwekutithantazela wena, thantazela nalabanye bantfu.​—KubaseFiliphi 2:4.

 Naka: Nangabe uva shengatsi imithantazo yakho ayitfutfuki tjela Jehova ngaloko. Ufuna kuva ngako konkhe lokukukhatsatako, ngisho naloko lokukukhatsatako ngemithantazo yakho.​—1 Johane 5:14.

 Lokunye lokungakusita

•   Fundza:

   “Kungani Kufanele Ngithantaze?”

•   Titsatsele:

   “Indlela Yokuthuthukisa Imithandazo Yakho” lesitfolakala ngesiZulu.

 Umbhalo loyinhloko: “Hlale utinaka wena, unake naloko lokufundzisako. . . . nawenta njalo utawutisindzisa wena kanye nalabo labakulalelako.”​—1 KuThimothi 4:16.

 Lokukushoko: Kukholwa kwakho kuyacina nawucocela labanye ngaloko lokukholelwako. Nawenta njalo utawusindzisa kuphila kwakho kanye nekwalabo labakulalelako.

 Yini longayilindzela: Ngaletinye tikhatsi ungahle utive ungakhanuki kucocela labanye ngaloko lokukholelwako. Ungahle wesabe kucocela labanye, ikakhulukati esikolweni.

 Longakwenta: Tsatsa sincumo sekutsi angeke uvume kuncotjwa yimiva yekwesaba. Umphostoli Pawula watsi: “Nangabe ngingatimemeteli letindzaba letimnandzi . . . ngisho nobe . . . ngingatsandzi, kufanele [ngikwente] ngobe ngiphatsisiwe.”​—1 KubaseKhorinte 9:16, 17.

 Naka: Ngemvume yebatali bakho, tfola umuntfu longaba sibonelo lesihle kuwe kodvwa kube ngumuntfu lokhutsele emsebentini wekushumayela.​—Taga 27:17.

 Lokunye lokungakusita

•   Fundza:

   “Kungani Ngesaba Ukukhuluma Ngokholo Lwami?” lesitfolakala ngesiZulu.

 Umbhalo loyinhloko: “Asinakaneni kuze sikhutsatane elutsandvweni nasemisebentini lemihle, singakuyekeli kuhlangana kwetfu ndzawonye.”​—KumaHebheru 10:24, 25.

 Lokukushoko: Sizatfu lesibalulekile sekuya emihlanganweni kuyokhonta Jehova. Kuya emihlanganweni kuphindze kube naletinye tinzuzo letimbilli. Yekucala, wena ukhutsatwa bazalwane bakho. Kwesibilli, Nawe ukhutsata bazalwane bakho nawuya emihlanganweni futsi uphendvula.​—KubaseRoma 1:11, 12.

 Yini longayilindzela: Ngaletinye tikhatsi, ingcondvo yakho ingahle izule, lokungakwenta ulahlekelwe tifundvo letibalulekile. Ungaphindze ulingeke kutsi ungayi njalo emihlanganweni ngenca yemsebenti wesikolwa nobe letinye tintfo.

 Longakwenta: Timisele kuya njalo emihlanganweni futsi uzuze kakhulu kuyo, kodvwa ngesikhatsi lesifanako uwunake nemsebenti wakho wesikolwa. Niketa timphendvulo nawusemhlanganweni. Ngemuva kwemhlangano, bonga umuntfu munye nobe lababilli ngetimphendvulo tabo.

 Naka: Lungiselela kusengaphambili. Faka i-JW Library® app elucingweni lwakho futsi usebentise incenye letsi “Meetings” kuze ubone kutsi kutawube kucocwa ngani emhlanganweni.

 Lokunye lokungakusita

•   Fundza:

   “Kungani Kufanele Uye Emihlanganweni YobuKristu?” lesitfolakala ngesiZulu.