LiBhayibheli alikhulumi ngalokucondzile ngema-dinosaurs. LiBhayibheli litsi nguNkulunkulu ‘lowadala tonkhe tintfo,’ ngako kuyacaca kutsi nawo abe sekhatsi kwetintfo letadalwa nguye. a (Sembulo 4:11) Ngisho nobe liBhayibheli lingakhulumi ngalokucondzile ngema-dinosaurs, liyakhuluma ngemacembu etilwane lokungenteka tifaka ekhatsi nawo.

•   “Tilwane letikhulu taselwandle.”—Genesisi 1:21.

•   ‘Netilwane letihamba ngesisu.’—Genesisi 1:25.

•   ‘Tilo tesiganga.’—Genesisi 1:25.

Ema-dinosaurs evela kuletinye tilwane ngekutigucukela kwemvelo yini?

 Kunekutsi avele kancane kancane kungatsi aba khona ngekutigucukela kwemvelo, ngokwalelicwango lelentiwa kuletinsalela tematsambo, ema-dinosaurs aba khona sikhatsi lesifishane. Loku kuhambisa naloko lokushiwo liBhayibheli nalitsi nguNkulunkulu lowadala tonkhe tilwane. Nasi sibonelo, Tihlabelelo 146:6 tichaza Nkulunkulu ngekutsi “unguMdali wako konkhe: Wadala lizulu, nemhlaba, nelwandle, nako konkhe lokukuko.”

Ema-dinosaurs aphila ngasiphi sikhatsi?

 LiBhayibheli lichaza kutsi tilwane taselwandle netasemhlabeni tadalwa ngelilanga lesihlanu kanye nelesitfupha, ngemalanga ekudala. b (Genesisi 1:20-25, 31) Ngako liBhayibheli liyavuma kutsi ema-dinosaurs aba khona futsi aphila sikhatsi lesidze.

BoBhehemothi naLeviyathani bebangema-dinosaurs yini?

 Bebangasiwo. Ngisho nobe letilwane lokukhulunywa ngato encwadzini yaJobe singaciniseki kahle ngato, Bhehemothi uvame kusho imvubu kantsi Leviyathani uvame kusho ingwenya. Lokuchazwa kwato ngalendlela kuhambisana nendlela imiBhalo lebachaza ngayo. (Jobe 40:15-23; 41:1, 14-17, 31) Kunoba ngukuphi, ligama lelitsi “Bhehemothi” nalelitsi “Leviyathani” angeke lisho i-dinosaurs. Nkulunkulu watjela Jobe kutsi atibonele yena letilwane futsi Jobe waphila sekuphele sikhatsi lesidze ema-dinosaurs sekaphela.—Jobe 40:16; 41:8.

Kwentekani kuma-dinosaurs?

 LiBhayibheli alisho lutfo ngekunyamalala kwema-dinosaurs. Noma kunjalo, liyasho kutsi tonkhe tintfo tadalwa ‘ngentsandvo yakhe [Nkulunkulu],’ ngako Nkulunkulu bekanenjongo letsite nakadala ema-dinosaurs. (Sembulo 4:11) Ngesikhatsi leyonjongo seyifezekile, Nkulunkulu wakuvumela kutsi ema-dinosaurs ashabalale.