Mikhayeli, letinye tinkholo letimbita ngekutsi “nguSaint Michael,” kubonakala kuligama lelalinikwa Jesu ngaphambi nangemuva kwekutsi ete emhlabeni. a Mikhayeli waphikisana naDeveli ngesidvumbu saMosi waphindze wasita ingilosi yamikisa umlayeto waNkulunkulu kumphrofethi Danyela. (Danyela 10:13, 21; Juda 9) Mikhayeli uphila ngekuvumelana neligama lakhe, lelisho kutsi “Ngubani LonjengaNkulunkulu?”, ngobe ulwela bukhosi baNkulunkulu nangekulwa netitsa taNkulunkulu.​—Danyela 12:1; Sembulo 12:7.

 Cabanga kutsi kungani kunengcondvo kuphetsa ngekutsi nguJesu Mikhayeli ingilosi lenkhulu.

•   Mikhayeli ‘yingilosi lenkhulu.’ (Juda 9) Sicu lesitsi “ingilosi lenkhulu,” lesisho “sikhulu setingilosi” sivela emavesini lamabili kuphela eBhayibhelini. Kuwo omabili lamavesi, leligama lisebunyeni, lokukhombisa kutsi yinye lengilosi lenalesicu. Linye lalamavesi lisitjela kutsi iNkhosi levusiwe Jesu “itawehla ivela ezulwini ikhipha ticondziso ngelivi lengilosi lenkhulu.” (1 KubaseThesalonika 4:16) Jesu ‘unelivi lengilosi lenkhulu’ ngobe nguye lengilosi lenkhulu, Mikhayeli.

•   Mikhayeli uhola libutfo letingilosi. “Mikhayeli netingilosi takhe balwa nadrago,” Sathane. (Sembulo 12:7) Mikhayeli uneligunya lelikhulu endzaweni yemoya, ngobe ubitwa ngekutsi ‘ungulesinye setikhulu letihamba embili’ nangekutsi ‘usikhulu lesikhulu.’ (Danyela 10:13, 21; 12:1) David E. Aune losati seLitestamente Lelisha utsi leticu tiveta Mikhayeli “njengemholi wemabutfo etingilosi.”

   LiBhayibheli liphindze likhulume ngalomunye umuntfu loneligunya etikwelibutfo letingilosi. Lichaza ‘kwembulwa kweNkhosi Jesu ivela ezulwini, ikanye netingilosi tayo letinemandla emlilweni lovutsa emalangabi, njengobe kutawube kuyimphindziselo.’ (2 KubaseThesalonika 1:7, 8; Matewu 16:27) Jesu “waya ezulwini, futsi tingilosi, emagunya kanye nemandla kwabekwa ngephansi kwakhe.” (1 Phetro 3:21, 22) Bekungeke kube kuhlakanipha ngaNkulunkulu kutsi ente Jesu naMikhayeli babe baholi betingilosi letingcwele, kodvwa babe batitsa. Ngako, kukuhlakanipha kuphetsa ngekutsi lamagama lamabili, Jesu naMikhayeli, asho umuntfu munye.

•   Mikhayeli ‘utawuvela’ ‘ngesikhatsi sekucindzeteleka’ lesingazange sesibe khona. (Danyela 12:1) Encwadzini yaDanyela, emavi latsi ‘vela’ avamise kusetjentiswa nakukhulunywa ngenkhosi lesukumako kuze itsatse sinyatselo lesikhetsekile. (Danyela 11:2-4, 21) Jesu Khristu lokutsiwa “nguLivi waNkulunkulu” utawutsatsa sinyatselo lesikhetsekile ‘njengeNkhosi yemakhosi’ kuze abhubhise tonkhe titsa taNkulunkulu futsi avikele nebantfu baNkulunkulu. (Sembulo 19:11-16) Utawutsatsa lesinyatselo ngesikhatsi ‘sekuhlupheka lokukhulu lokungazange sekube khona kusukela kwaba khona umhlaba.’​—Matewu 24:21, 42