Ho ea ka buka ea ho qetela ka Bibeleng, letšoao la 666 ke palo, kapa lebitso la sebata se neng se na le lihlooho tse supileng le manaka a leshome se tsoang ka leoatleng. (Tšenolo 13:​1, 17, 18) Sebata sena se tšoantšetsa mekhatlo ea lipolotiki ea lefatše lohle, e busang “moloko o mong le o mong le batho ba bang le ba bang le leleme le leng le le leng le sechaba se seng le se seng.” (Tšenolo 13:7) Lebitso 666 le tšoaea mekhatlo ea lipolotiki e hlolehileng ka ho feletseng mahlong a Molimo. Joang?

Hase letšoao feela. Mabitso a tsoang ho Molimo a na le moelelo. Ka mohlala, Molimo o ile a reha motho eo lebitso la hae e neng e le Abrame, e bolelang “Ntate ea Phahameng (ea Tlotlisoang),” hore e be Abrahama, e bolelang “Ntate oa Bongata (oa letšoele),” ha Molimo a ne a tšepisa hore O tla etsa Abrahama hore e be “ntat’a lichaba tse ngata.” (Genese 17:5, mongolo o botlaaseng ba leqephe) Ka ho tšoanang, Molimo o ile a reha sebata 666 e le letšoao le hlalosang seo se ka se etsang.

Palo tšelela e emela ho se phethahale. Hangata lipalo li sebelisoa ho tšoantšetsa ntho e itseng ka Bibeleng. Ka ho tšoanang, palo supa e emela ho fella kapa phetheho. Kaha palo tšelela e haella ka ’ngoe feela hore e etse supa, e ka emela ntho e sa fellang kapa e nang le sekoli mahlong a Molimo ’me e ka amahanngoa le lira tsa Molimo.​—1 Likronike 20:6; Daniele 3:1.

E phetoa hararo bakeng sa khatiso. Ka linako tse ling Bibele e hatisa taba ka ho e pheta ka makhetlo a mararo. (Tšenolo 4:8; 8:​13) Kahoo lebitso 666 le hatisa ka matla ntlha ea hore Molimo o nka mekhatlo ea batho ea lipolotiki e hlolehile ka ho feletseng. E hlolehile ho tlisa khotso le tšireletseho​—e leng lintho tse tla tlisoa ke ’Muso oa Molimo feela.

Letšoao la sebata

Bibele e re batho ba fumana “letšoao la sebata” hobane ba le latela “ka ho hlolloa,” ho isa boholeng ba ho le rapela. (Tšenolo 13:​3, 4; 16:2) Ba etsa sena ka ho rapela le ho rorisa linaha tsa habo bona, matšoao a tsona kapa matla a sesole. The Encyclopedia of Religion e re: “Bochaba bo se bo fetohile mofuta o ka sehloohong oa bolumeli mehleng ena.” *

Letšoao la sebata le behoa joang letsohong le letona kapa phatleng ea motho? (Tšenolo 13:16) Mabapi le litaelo tsa hae ho sechaba sa Iseraele, Molimo o ile a re: “Le a tlame e le pontšo matsohong a lōna, ’me e tla ba lebanta le roaloang phatleng pakeng tsa mahlo a lōna.” (Deuteronoma 11:18) Sena se ne se sa bolele hore, Baiseraele ba lokela ho tšoaea matsoho le liphatla tsa bona ka tsela ea sebele, empa se ne se bolela hore mantsoe a Molimo a ne a tla tataisa lintho tsohle tseo ba li etsang le tseo ba li nahanang. Ka ho tšoanang, ho e-na le ho ba ntho ea sebele e kang thatho ea 666, letšoao la sebata le ne le emela batho ba neng ba lumella mekhatlo ea lipolotiki hore e laole bophelo ba bona. Batho ba nang le letšoao la sebata ba ipeha ka lehlakoreng la bahanyetsi ba Molimo.​—Tšenolo 14:​9, 10; 19:19-​21.