Ka Bibeleng, lentsoe “tsoho” le tsoa lentsoeng la Segerike a·naʹsta·sis le bolelang “ho phahama” kapa “ho ema.” Motho ea tsositsoeng bafung o khutlisetsoa bophelong e le motho eo e neng e le eena pele a e-shoa.—1 Bakorinthe 15:12, 13.

Le hoja lentsoe “tsoho” le le sieo ka Mangolong a Seheberu, ao hangata a bitsoang Testamente ea Khale, thuto ena ea hlaha ka mangolong ao. Ka mohlala, ha Molimo a bua le moprofeta Hosea, o ile a re: “Ke tla ba lopolla letsohong la Sheole; ke tla ba lokolla lefung”—Hosea 13:14; Jobo 14:13-15; Esaia 26:19; Daniele 12:2, 13.

Batho ba tla tsosetsoa hokae? Batho ba bang ba tsosetsoa leholimong ’me ba tla busa le Kreste e le marena. (2 Bakorinthe 5:1; Tšenolo 5:9, 10) Ha Bibele e bua ka tsoho ena e re ke ‘tsoho ea pele’ le “tsoho ea pejana” e leng se bontšang hore ho na le tsoho e ’ngoe e tla latela. (Tšenolo 20:6; Bafilipi 3:11) Tsoho ena e tla etsahala lefatšeng, moo batho ba bangata ba tla tsosoa ’me ba phele ba thabile.—Pesaleme ea 37:29.

Batho ba tla tsosoa joang? Molimo o file Jesu matla a ho tsosa bafu. (Johanne 11:25) Jesu o tla tsosa “bohle ba mabitleng a khopotso,” e mong le e mong a e-na le botho ba hae bo mo khethollang a bile a ntse a e-na le mehopolo ea hae. (Johanne 5:28, 29) Ba tsosetsoang leholimong ba amohela ’mele oa moea, athe ba tsosetsoang lefatšeng bona ba tla fumana ’mele oa nama, o phethahetseng.—Esaia 33:24; 35:5, 6; 1 Bakorinthe 15:42-44, 50.

Ke bo-mang ba tla tsosoa? Bibele e re: “ho tla ba le tsoho ea ba lokileng le ba sa lokang.” (Liketso 24:15) Ba lokileng ba akaretsa batho ba tšepahalang ba kang Noe, Sara le Abrahama. (Genese 6:9; Baheberu 11:11; Jakobo 2:21) Ba sa lokang ke batho ba hlōlehileng ho latela melao ea Molimo hobane ba sa ka ba fumana monyetla oa ho ithuta melao eo le ho e latela.

Leha ho le joalo, batho ba khopo hoo ba ke keng ba fetoha ba ke ke ba tsosoa. Ha batho ba joalo ba e-shoa, ho se ho felile ka bona, ha ho na tšepo ea hore ba tla tsosoa.—Matheu 23:33; Baheberu 10:26, 27.

Tsoho e tla etsahala neng? Bibele e ile ea bolela hore tsoho ea leholimo e tla etsahala nakong ea ho ba teng ha Kreste, e qalileng ka 1914. (1 Bakorinthe 15:21-23) Tsoho ea lefatšeng e tla etsahala nakong ea Puso ea Lilemo Tse Sekete ea Jesu Kreste, ha lefatše le tla be le fetoloa paradeise.—Luka 23:43; Tšenolo 20:6, 12, 13.

Ke hobane’ng ha e le ho utloahalang hore re lumele tsohong? Bibele e fana ka litlaleho tse robong tsa batho ba ileng ba tsosoa ’me ho na le batho ba ileng ba li bona ha li etsahala kaofela. (1 Marena 17:17-24; 2 Marena 4:32-37; 13:20, 21; Luka 7:11-17; 8:40-56; Johanne 11:38-44; Liketso 9:36-42; 20:7-12; 1 Bakorinthe 15:3-6) Tsoho e ikhethang ke ea Lazaro, kaha o ne a se a e-na le matsatsi a mane a shoele ’me Jesu o ile a etsa mohlolo oo ka pel’a batho ba bangata. (Johanne 11:39, 42) Esita le bahanyetsi ba Jesu ha baa ka ba latola hore seo se etsahetse, ke kahoo ba ileng ba rera ho bolaea Jesu le Lazaro.—Johanne 11:47, 53; 12:9-11.

Bibele e bontša hore Molimo o na le matla a ho tsosa bafu ebile o labalabela ho etsa seo. Kaha o na le mohopolo o se nang moeli, o lula a bolokile tlaleho ea motho e mong le e mong eo a tla mo tsosa, ka matla a hae a maholo ka ho fetisisa. (Jobo 37:23; Matheu 10:30; Luka 20:37, 38) Molimo o khona ho tsosa bafu ’me o batla ho etsa joalo! Ha Bibele e bua ka hore Molimo o tla tsosa bafu, e re: “U tla hloloheloa mosebetsi oa matsoho a hao.”—Jobo 14:15.

Mashano a mabapi le tsoho

Leshano: Tsoho ke ho kopana ha moea le ’mele.

’Nete: Bibele e ruta hore moea ke motho, eseng ntho e tsoang ho motho ha a e-shoa. (Genese 2:7, Ezekiele 18:4) Motho ea tsosoang ha a kopanngoe le moea oa hae; o bōptjoa hape e le moea o phelang.

Leshano: Batho ba bang ba tla tsosoa ebe ba timetsoa hang-hang ka mor’a moo.

’Nete: Bibele e re, “ba ileng ba tloaela ho etsa lintho tse mpe,” ba tla ea “tsohong ea kahlolo.” (Johanne 5:29) Leha ho le joalo, ba tla ahloloa ho ea ka seo ba se etsang ka mor’a hore ba tsosoe, eseng pele. Jesu o ile a re: “Bafu ba tla utloa lentsoe la Mora oa Molimo ’me ba etseng hloko ba tla phela.” (Johanne 5:25) Batho ba ‘elang hloko’ kapa ba mamelang lintho tseo ba tla ithuta tsona ka mor’a tsoho, mabitso a bona a tla ngoloa ‘moqolong oa bophelo.’—Tšenolo 20:12, 13.

Leshano: Ha motho a tsosoa, o tla tsosoa ka ’mele oo a neng a e-na le oona pele a e-shoa.

’Nete: Ka mor’a hore motho a shoe, ’mele oa hae oa senyeha ’me oa fela.—Moeklesia 3:19, 20.