Ohin loron, labarik barak mak iha ona telemovel rasik, a no sira barak mak uza sira-nia telemovel atu asesu internét bainhira sira mesamesak iha sira-nia kuartu. Se Ita-nia oan iha telemovel, neʼe bele lori perigu saida deʼit ba sira? Neʼe bele lori benefísiu saida deʼit? Saida mak bele akontese se Ita-nia oan uza tempu barak demais atu uza telemovel?

•  Buat neʼebé Ita presiza hatete

•  Buat neʼebé Ita presiza hanoin

•  Nuʼudar inan-aman, Ita prontu ona ka lae?

 Benefísiu sira

•   Inan-aman sente kalma tanba oan sira seguru liu. Bethany iha oan joven naʼin-rua no nia hatete: “Ohin loron, mundu mak perigozu tebes. Tan neʼe importante tebes atu oan sira bele kontaktu inan-aman bainhira buat ruma akontese.”

   Inan ida naran Catherine hatete: “Ita bele uza aplikasaun balu neʼebé bele liga ita-nia telemovel ba ita-nia oan nian hodi nuneʼe ita bele buka-hatene ita-nia oan iha neʼebé. Kuandu nia lori daudaun karreta, ita mós bele hatene karreta nia velosidade.”

•   Ajuda atu halo TPC. Inan ida naran Marie hatete: “Mestre sira haruka TPC ba labarik sira liuhusi e-mail ka mensajen, no labarik sira bele koʼalia ho sira-nia mestre sira liuhusi dalan sira-neʼe.”

 Perigu sira

•   Gasta tempu barak liu atu hateke ba telemovel. Baibain joven sira uza sira-nia telemovel ba oras balu loroloron. No inan-aman balu mós halo buat neʼebé hanesan. Tuir loloos, oras neʼebé inan-aman sira uza atu halimar ho telemovel mak maizumenus barak hanesan ho tempu neʼebé sira uza atu koʼalia ho sira-nia oan. Matenek-naʼin ida esplika katak família balu mak hanesan ho ema neʼebé la koñese malu maibé tuur hamutuk no labele para atu hateke ba sira ida-idak nia telemovel. b

•   Pornografia. Peskiza ida fó sai katak fulan-fulan porsentu 50 husi joven sira mak buka pornografia. Ita la hakfodak ho ida-neʼe tanba fasil deʼit atu buka-hetan pornografia liuhusi telemovel. Aman ida naran William neʼebé iha oan joven naʼin-rua hatete: “Bainhira inan-aman fó lisensa ba sira-nia oan atu iha telemovel, sira la ho neon fó ba oan sira dalan atu asesu pornografia iha fatin naran deʼit.”

•   Labele husik telemovel. Ema barak sente susar atu husik sira-nia telemovel no neʼe fó impaktu ba sira-nia emosaun. Porezemplu, se sira lakon sira-nia telemovel, sira sente pániku, la hatene atu halo saida no mós sai moras. Inan-aman balu hatete katak sira-nia oan la hatudu respeitu ba sira bainhira uza telemovel. Carmen hatete: “Dala ruma bainhira haʼu hakarak koʼalia ho haʼu-nia oan-mane, nia hatudu oin-boot ba haʼu ka hatete buat ruma neʼebé la hatudu respeitu tanba nia sente haʼu atrapalla nia.”

•   Perigu seluk tan. Bainhira ita-nia oan iha telemovel neʼe mós bele loke dalan ba ema atu haterus sira liuhusi internét no sira bele simu ka haruka mensajen sira neʼebé la morál. Sira mós bele hetan problema saúde tanba tuur ho postura neʼebé la loos ka hadeer iha kalan. Laʼós neʼe deʼit, joven balu mós uza aplikasaun ida neʼebé haree hanesan baibain deʼit, maibé loloos subar informasaun neʼebé sira lakohi sira-nia inan-aman atu haree.

   Aman ida naran Daniel neʼebé iha oan-feto ida neʼebé joven, hatete: “Telemovel mak dalan ida ba ita-nia oan atu haree buat hotu iha internét, buat neʼebé diʼak no aat.”

•   ‘Haʼu-nia oan presiza telemovel ka lae?’

   Bíblia hatete: “Ema neʼebé matenek hanoin didiʼak kona-ba ninia hakat ida-idak.” (Provérbios 14:15) Hanoin kona-ba neʼe no husu ba Ita-nia an:

   ‘Matenek ka lae atu fó telemovel ba haʼu-nia oan hodi halo nia seguru ka razaun seluk? Haʼu hanoin ona kona-ba benefísiu no mós perigu sira ka lae? Duké fó telemovel neʼebé bele asesu internét, haʼu bele sosa ba haʼu-nia oan telemovel neʼebé baibain deʼit ka lae?’

   Aman ida naran Todd hatete: “Ema nafatin faʼan telemovel sira neʼebé labele asesu ba internét. Ita bele uza telemovel sira-neʼe atu kontaktu ita-nia oan liuhusi mensajen no telefone. No telemovel sira-neʼe mak baratu deʼit.”

•   ‘Haʼu-nia oan sei uza telemovel neʼe ho matenek ka lae?’

   Bíblia hatete: “Ema matenek nia laran lori nia atu laʼo iha dalan loos.” (Eclesiastes 10:2) Hanoin kona-ba neʼe no husu ba Ita-nia an:

   ‘Saida mak hatudu katak haʼu bele tau fiar ba haʼu-nia oan? Haʼu-nia oan toman atu koʼalia nakloke ba haʼu ka lae? Haʼu-nia oan toman atu bosok mai haʼu ka lae, porezemplu bosok kona-ba nia habelun ho sé? Nia hatene ona oinsá atu kontrola an bainhira uza teknolojia seluk hanesan televizaun, tablet ka laptop ka lae?’ Inan ida naran Serena hatete: “Telemovel bele ajuda tebes ita, maibé telemovel mós bele lori perigu oioin. Tan neʼe, kaer telemovel mak responsabilidade boot. Entaun, hanoin uluk antes fó telemovel ba ita-nia oan neʼebé seidauk iha esperiénsia barak.”

•   ‘Haʼu prontu kuandu haʼu-nia oan iha telemovel ka lae?’

   Bíblia hatete: “Hanorin labarik atu laʼo iha dalan neʼebé diʼak ba nia.” (Provérbios 22:6) Hanoin kona-ba neʼe no husu ba Ita-nia an:

   ‘Haʼu hatene didiʼak oinsá atu uza telemovel neʼe atu nuneʼe haʼu bele ajuda haʼu-nia oan sira komprende no hasees an husi perigu ka lae? Haʼu hatene oinsá atu halo ativu pengaturan Kontrol orang tua ka lae? Oinsá haʼu bele ajuda haʼu-nia oan atu halo desizaun diʼak bainhira uza telemovel?’ Aman ida naran Daniel neʼebé temi ohin hatete: “Triste mak inan-aman barak fó telemovel ba sira-nia oan no la preokupa atu cek oinsá sira-nia oan uza telemovel neʼe.”

 Buat neʼebé importante: Oan sira presiza hetan treinu kona-ba oinsá atu uza telemovel ho matenek. Livru ida (Indistractable) hatete katak labarik barak labele tahan tentasaun atu gasta tempu barak hodi uza sira-nia telemovel, liuliu se sira-nia inan-aman la buka-hatene buat neʼebé sira halo no la fó treinu ba sira.