1. (a) Jeová fó ita esperansa saida? (b) “Tau esperansa ba Jeová” katak sá? (Haree “Esplikasaun ba fraze”.)

 JEOVÁ fó esperansa neʼebé furak ba ema hotu neʼebé hadomi nia. Lakleur tan nia sei halakon moras, triste no mate. (Apok 21:3, 4) Nia sei ajuda “ema laran-maus” sira neʼebé tau esperansa ba nia atu halo mundu neʼe sai paraízu. (Sal 37:9-11) Nia sei ajuda ita ida-idak atu iha relasaun neʼebé diʼak liu ho nia. Neʼe mak esperansa neʼebé furak tebes. Tanbasá ita bele fiar katak Maromak nia promesa sira-neʼe sei sai loos? Jeová sempre kumpre ninia promesa sira. Tan neʼe ita iha razaun neʼebé loos atu “tau esperansa ba Jeová”. * (Sal 27:14) Ita halo ida-neʼe liuhusi hein ho pasiénsia no ksolok ba tempu neʼebé Maromak kumpre ninia promesa sira.​—Isa 55:10, 11.

2. Saida mak Jeová halo ona?

² Jeová hatudu ona katak nia sempre kumpre ninia promesa sira. Hanoin toʼok kona-ba ezemplu ida. Iha livru Apokalipse, Jeová promete katak ohin loron nia sei halibur ema husi nasaun, suku, no língua oioin atu adora nia ho unidade. Sira mak “ema-lubun boot”. (Apok 7:9, 10) Maski ema sira neʼebé sai parte ba grupu neʼe mai husi rasa, língua no situasaun moris neʼebé la hanesan, maibé sira hanesan família ida neʼebé iha unidade no iha dame. (Sal 133:1; João 10:16) Ema-lubun boot mós laran-manas atu haklaken. Sira sempre prontu atu  fahe sira-nia esperansa kona-ba mundu foun ba ema hotu neʼebé hakarak rona. (Mt 28:19, 20; Apok 14:6, 7; 22:17) Se Ita mak parte ba ema-lubun boot, Ita hafolin tebes esperansa kona-ba mundu foun.

3. Saida mak Satanás hakarak?

³ Diabu lakohi Ita atu iha esperansa ba futuru. Nia hakarak Ita atu fiar katak Jeová la hadomi Ita no Jeová sei la kumpre ninia promesa sira. Se Satanás konsege halakon ita-nia esperansa, ita sei lakon aten-brani no karik para atu serbí Jeová. Ita sei aprende kona-ba oinsá Diabu koko atu halakon Job nia esperansa no koko hapara Job atu serbí Jeová.

4. Iha lisaun neʼe, ita sei aprende saida? (Job 1:9-12)

⁴ Iha lisaun neʼe, ita sei aprende kona-ba dalan oioin neʼebé Satanás uza atu koko halakon Job nia laran-metin ba Jeová. (Lee Job 1:9-12.) Ita mós sei aprende buat oioin husi Job nia ezemplu no tanbasá ita presiza hanoin-hetan katak Maromak hadomi ita no sei kumpre ninia promesa sira.

5-6. Saida mak akontese ba Job iha tempu badak nia laran?

⁵ Job iha moris neʼebé diʼak. Nia iha relasaun diʼak ho Jeová. Nia iha família boot neʼebé kontente no nia mós riku tebes. (Job 1:1-5) Maibé iha loron ida deʼit nia laran, Job lakon buat barak. Primeiru, nia lakon ninia rikusoin. (Job 1:13-17) Tuirmai, ninia oan hotu mate. Baibain inan-aman sira sente triste tebes bainhira sira-nia oan ida mate. Entaun imajina toʼok triste neʼebé Job no ninia feen sente bainhira hatene katak sira-nia oan naʼin-sanulu hotu mate. Tan neʼe, Job lees ninia roupa hodi hatudu katak nia triste tebes no nia hakneʼak.​—Job 1:18-20.

⁶ Tuirmai Satanás fó moras ba Job no neʼe hamoe Job. (Job 2:6-8; 7:5) Antes neʼe, ema respeitu tebes Job no ema mai atu buka matadalan husi nia. (Job 29:7, 8, 21) Agora sira lakohi liga nia. Ninia família, belun no mós atan sira abandona nia.​—Job 19:13, 14, 16.

7. (a) Job hanoin susar neʼebé nia hasoru mai husi neʼebé, maibé nia lakohi halo saida? (b) Susar saida mak ema Kristaun ida bele hasoru neʼebé atu hanesan ho dezeñu?

⁷ Satanás hakarak Job fiar katak nia hetan susar tanba Jeová hirus ba nia. Porezemplu, Satanás hamosu anin boot hodi sobu uma neʼebé Job nia oan naʼin-sanulu halibur atu han hamutuk. (Job 1:18, 19) Satanás mós hamosu ahi husi lalehan no halakon Job nia animál hakiak sira no mós ninia atan sira neʼebé tau matan ba animál sira-neʼe. (Job 1:16) Tanba anin no ahi mai husi lalehan, Job hanoin katak neʼe mai husi Jeová. Tan neʼe, Job hanoin katak Jeová la kontente ona ho nia. Maski nuneʼe, Job lakohi hatete aat ninia Aman iha lalehan. Job rekoñese katak durante tinan barak, nia simu ona buat diʼak oioin husi Jeová. Tan neʼe, Job hanoin katak se nia kontente atu simu buat neʼebé diʼak, nia mós tenke prontu atu simu buat neʼebé aat. Entaun nia hatete: “Haʼu hein katak Jeová nia naran sei hetan hahiʼi nafatin.” (Job 1:20, 21; 2:10) Maski Job lakon ninia rikusoin, oan sira no saúde neʼebé diʼak, maibé nia nafatin laran-metin ba Jeová. Tuirmai Satanás halo tan buat seluk.

8. Saida mak dalan seluk neʼebé Satanás uza atu koko Job?

 ⁸ Satanás uza dalan seluk tan atu koko Job. Nia book Job nia belun falsu naʼin-tolu atu halo Job sente folin-laek. Mane sira-neʼe dehan katak Job hetan susar tanba nia halo ona sala oioin. (Job 22:5-9) Sira mós koko atu halo nia fiar katak maski nia halo buat diʼak oioin, maibé Maromak la hafolin ninia hakaʼas an. (Job 4:18; 22:2, 3; 25:4) Sira koko atu halo Job hanoin katak Maromak la hadomi nia, Maromak sei la tau matan ba nia no saugati deʼit atu adora Maromak. Sira-nia liafuan bele halo Job sente katak nia la iha ona esperansa.

9. Saida mak ajuda Job atu hatudu aten-brani no fiar metin?

⁹ Imajina toʼok Job neʼebé tuur hela iha ahi-kadesan laran no sente moras tebes. (Job 2:8) Ninia belun sira kontinua hatún nia no koko atu estraga ninia naran diʼak. Nia sente katak ninia susar sira mak todan tebes no iha tempu hanesan nia mós triste tanba ninia oan sira mate. Foufoun, Job nonook deʼit. (Job 2:13–3:1) Maibé se mane sira-neʼe hanoin katak Job sei fila kotuk ba Jeová, sira sala boot. Job hiʼit ninia ulun, hateke ba ninia kolega sira no hatete: “Toʼo haʼu mate, haʼu sei nunka husik haʼu-nia laran-metin!” (Job 27:5) Saida mak ajuda Job atu hatudu aten-brani no fiar metin maski hasoru susar? Maski nia sente laran-kraik tebes, maibé nia nunka lakon esperansa katak ikusmai Maromak sei halakon ninia susar. Nia hatene katak maski nia mate, Jeová sei fó moris-hiʼas ba nia.​—Job 14:13-15.

10. Ita bele aprende saida husi Job nia istória?

¹⁰ Istória kona-ba Job hanorin ita katak Satanás labele obriga ita atu fila kotuk  ba Jeová no Jeová hatene situasaun hotu. Job nia esperiénsia mós bele ajuda ita komprende katak susar neʼebé ita hasoru liga ho asuntu importante ida. Hanoin toʼok buat balu neʼebé ita bele aprende husi Job.

11. Se ita kontinua tau fiar ba Jeová, ita bele fiar saida? (Tiago 4:7)

¹¹ Job nia esperiénsia hatudu katak se ita kontinua tau fiar ba Jeová, ita bele tahan hasoru susar hotu no hetan susesu atu kontra hasoru Satanás. Rezultadu mak saida? Bíblia hatete katak Diabu sei halai husi ita.​—Lee Tiago 4:7.

12. Oinsá mak esperansa kona-ba moris-hiʼas hametin Job?

¹² Ita tenke kaer metin ba esperansa kona-ba moris-hiʼas. Hanesan temi iha lisaun antes neʼe, dala barak Satanás uza sentimentu taʼuk mate atu halo ita la laran-metin ba Jeová. Iha Job nia situasaun, Satanás duun katak Job sei halo buat naran deʼit, inklui mós para serbí Jeová atu bele salva ninia moris. Satanás sala boot. Maski Job hanoin nia atu mate ona, maibé nia nafatin laran-metin ba Jeová. Job bele tahan tanba nia iha konfiansa kona-ba Jeová nia hahalok diʼak no nia iha esperansa neʼebé metin katak ikusmai Jeová sei hadiʼa ninia situasaun. Job fiar katak maski Jeová la hadiʼa ninia situasaun kuandu nia sei moris, maibé Jeová sei ajuda nia hodi fó moris-hiʼas ba nia iha futuru. Job kaer metin ba esperansa kona-ba moris-hiʼas. Se ita mós kaer metin ba esperansa neʼe, ita sei la husik ita-nia laran-metin maski ita-nia moris iha perigu laran.

13. Tanbasá ita presiza tau atensaun ba buat oioin neʼebé Satanás uza atu koko Job?

¹³ Ita presiza tau atensaun ba buat oioin neʼebé Satanás uza atu koko Job tanba Satanás mós uza buat sira-neʼe atu koko ita ohin loron. Satanás hatete: “Ema ida [laʼós deʼit Job] . . . sei fó buat hotu neʼebé nia iha atu salva nia moris.” (Job 2:4, 5) Satanás duun katak ita la hadomi Jeová ho laran tomak no ita sei fila kotuk ba Jeová atu bele salva ita-nia moris. Satanás mós hatete katak Maromak la hadomi ita no la hafolin ita-nia hakaʼas an atu serbí nia. Se ita tau esperansa ba Jeová, ita sei la tau fiar ba Satanás nia lia-bosok tanba ita hatene buat neʼebé Satanás koko atu halo.

14. Susar sira neʼebé ita hasoru bele ajuda ita hatene saida?

¹⁴ Ita presiza haree susar sira nuʼudar oportunidade atu koñese ita-nia an diʼak liután. Susar sira neʼebé Job hasoru, ajuda nia atu hatene no hadiʼa ninia fraku sira. Porezemplu, nia aprende katak nia presiza haburas liután hahalok haraik an. (Job 42:3) Ita mós bele aprende buat barak kona-ba ita-nia an bainhira ita hasoru susar. Ema hatama irmaun Nikolay * ba komarka maski nia moras todan. Nia hatete: “Bainhira tama komarka, neʼe ajuda haʼu hatene hahalok sira neʼebé haʼu presiza hadiʼa.” Bainhira ita hatene ita-nia fraku sira, ita bele hakaʼas an hadiʼa ida-neʼe.

15. Ita presiza rona ba sé no tanbasá?

¹⁵ Ita presiza rona ba Jeová, laʼós ba ita-nia inimigu sira. Job tau atensaun didiʼak bainhira Jeová koʼalia ba nia. Jeová ajuda Job atu hanoin kleʼan hodi husu pergunta hanesan: ‘Ó haree ona buat neʼebé haʼu kria ka? Haʼu hatene buat hotu neʼebé akontese ona ba ó. Ó hanoin  haʼu labele tau matan ba ó ka?’ Job hatán ho haraik an no hafolin Jeová nia hahalok diʼak sira. Job hatete: “Uluk haʼu-nia tilun rona ona kona-ba Ita, maibé agora haʼu-nia matan rasik haree Ita.” (Job 42:5) Bainhira Job hatete liafuan sira-neʼe, karik nia tuur daudaun iha ahi-kadesan laran, ninia isin-lolon nakonu ho fisur no ninia oan sira mate ona. Maski nuneʼe, Jeová fó sai katak nia hadomi Job no kontente ho Job.​—Job 42:7, 8.

16. Tuir Isaias 49:15, 16, ita presiza hanoin-hetan saida bainhira hasoru susar?

¹⁶ Ohin loron karik ema la hafolin ita no mós trata aat ita. Sira koko atu estraga ita-nia naran diʼak ka organizasaun nia naran diʼak, no sira “koʼalia liafuan aat oioin hodi bosok kona-ba” ita. (Mt 5:11) Ita aprende saida husi Job nia istória? Jeová fiar katak ita sei laran-metin ba nia maski iha susar laran. Jeová hadomi ita no nia sei nunka husik ema sira neʼebé tau esperansa ba nia. (Lee Isaias 49:15, 16.) Keta rona ba lia-bosok husi Maromak nia inimigu sira. Irmaun James iha rai-Turkia hetan terus hamutuk ho ninia família. Nia hatete: “Ami rekoñese katak rona ba lia-bosok kona-ba Maromak nia povu halo ami laran-kraik. Tan neʼe, ami tau fokus ba ami-nia esperansa no kontinua halo atividade oioin atu serbí Jeová ho badinas. Rezultadu mak ami nafatin sente ksolok.” Hanesan Job, ita rona ba Jeová. Lia-bosok husi ita-nia inimigu labele halakon ita-nia esperansa.

17. Saida mak ita bele aprende husi fiar-naʼin sira neʼebé temi iha Ebreu kapítulu 11?

¹⁷ Iha mós Jeová nia atan sira seluk neʼebé kontinua hatudu aten-brani no fiar metin bainhira hasoru susar. Iha apóstolu Paulo nia karta ba ema Ebreu, nia temi kona-ba Maromak nia atan barak no bolu sira nuʼudar “testemuña barak hanesan kalohan neʼebé haleʼu ita”. (Ebr 12:1) Sira hotu hasoru susar boot. Maibé sira nafatin laran-metin ba Jeová. (Ebr 11:36-40) Sira-nia hakaʼas an atu tahan susar mak saugati deʼit ka lae? Klaru katak lae. Maski sira la haree Maromak kumpre ninia promesa hotu durante sira-nia moris, maibé sira kontinua tau esperansa ba Jeová. Sira iha konfiansa katak sira sei haree Jeová nia promesa sira sai loos tanba sira fiar metin katak Jeová kontente ho sira. (Ebr 11:4, 5) Sira-nia ezemplu hametin ita atu kontinua tau esperansa ba Jeová.

18. Ita deside metin atu halo saida? (Ebreu 11:6)

¹⁸ Ohin loron, mundu nia situasaun sai aat liután. (2 Tim 3:13) Satanás nafatin koko Maromak nia povu. Maski hasoru susar naran deʼit, mai ita deside metin atu serbí Jeová no fiar metin katak “ita tau ona ita-nia esperansa ba Maromak neʼebé moris”. (1 Tim 4:10) Bensaun neʼebé Maromak haraik ba Job hatudu katak “Jeová iha domin neʼebé boot tebes no laran-sadiʼa”. (Tgo 5:11) Mai ita mós nafatin laran-metin ba Jeová no fiar metin katak nia sei “fó kolen ba sira neʼebé buka nia ho laran”.​—Lee Ebreu 11:6.