DALA ruma ó sente ó hakarak tebes buat ruma ka lae?— * Se nuneʼe, ó hanesan ho ema barak. Maibé diʼak ka lae atu bosok hodi bele hetan buat neʼebé ó hakarak?— Neʼe la diʼak. Ema hanesan neʼe mak kaan-teen. Mai ita haree oinsá mane ida lakon Maromak nia domin tanba nia sai kaan-teen. Mane neʼe mak Maromak Jeová nia profeta Eliseu nia atan. Ninia naran mak Geazi.

Eliseu no Geazi moris iha tempu uluk, maizumenus tinan rihun ida antes Maromak nia Oan-Mane, Jesus, moris iha mundu. Maromak Jeová fó kbiit ba Eliseu atu halo milagre sira. Porezemplu, Bíblia koʼalia kona-ba tropa Síria nia ema-boot naran Naaman neʼebé hetan moras aat ida naran moras-lepra. La iha ema ida neʼebé bele kura ema-boot neʼe nia moras, maibé Eliseu bele no nia halo nuneʼe duni.

Maromak Jeová fó kbiit ba Eliseu atu halo ema moras sai isin-diʼak fali. Maibé Eliseu nunka haruka ema atu selu nia. Ó hatene tanbasá nia la halo ida-neʼe?— Tanba Eliseu hatene katak laʼós nia rasik mak halo milagre sira-neʼe, maibé Maromak Jeová. Kuandu Naaman sai isin-diʼak fali, nia kontente loos no nia hakarak fó prezente sira ba Eliseu. Prezente sira-neʼe inklui osan-mean, osan-mutin no faru neʼebé furak. Eliseu lakohi simu buat ida, maibé Geazi hakarak tebes atu simu prezente sira-neʼe.

Depois Naaman bá tiha, Geazi halai tuir Naaman maibé nia la fó-hatene ba Eliseu. Ó hatene saida mak Geazi hatete kuandu nia toman Naaman?— Nia hatete: ‘Eliseu haruka haʼu atu fó-hatene ba Ita-Boot katak bainaka naʼin-rua foin mai. Eliseu hakarak faru rua hodi nia bele fó ba sira.’

 Maibé tuir loloos, liafuan sira-neʼe bosok. Geazi inventa deʼit istória kona-ba bainaka naʼin-rua neʼe. Nia halo ida-neʼe tanba nia mak hakarak hetan faru neʼebé Naaman hakarak fó ba Eliseu. Maibé Naaman la hatene kona-ba ida-neʼe. Entaun, nia fó prezente sira-neʼe ba Geazi no nia fó barak liu fali buat neʼebé Geazi husu. Ó hatene saida mak akontese tuirmai?—

Kuandu Geazi toʼo fali uma, Eliseu husu nia: ‘Ó mai husi neʼebé?’

Geazi hatán: ‘Haʼu la bá fatin ida.’ Maibé antes neʼe Maromak Jeová fó-hatene ona ba Eliseu buat neʼebé Geazi halo. Entaun Eliseu hatete ba Geazi: ‘Neʼe laʼós tempu atu simu osan no faru sira.’

Geazi foti osan no faru sira neʼebé laʼós ba nia atu hetan. Tan neʼe Maromak halo Naaman nia moras-lepra kona fali Geazi. Tuir ó-nia hanoin, saida mak ita bele aprende husi ida-neʼe?— Buat ida mak ita labele konta istória neʼebé la loos.

Tuir ó-nia hanoin, tanbasá mak Geazi inventa istória ida neʼebé la loos?— Tanba Geazi mak ema kaan-teen. Nia hakarak buat ruma neʼebé laʼós ba nia atu hetan, no nia koko atu hetan buat sira-neʼe hodi koʼalia bosok. Tanba ida-neʼe, nia hetan moras neʼebé aat tebes iha nia moris.

Maibé laʼós neʼe deʼit, Geazi mós hetan rezultadu neʼebé aat liu. Ó hatene saida mak ida-neʼe?— Geazi lakon Maromak nia domin. Entaun, mai ita kuidadu atu la halo buat ruma hodi ita la lakon Maromak nia domin. Mai ita hasees an husi hahalok kaan-teen hodi hatudu laran-diʼak no prontu atu fahe buat neʼebé ita iha.