Durante tinan serbisu nian 2021, a ema kontinua hasoru susar oioin tanba pandemia COVID-19. Hanesan esplika ona iha informasaun ho títulu “Fó ajuda iha mundu tomak durante pandemia”, ita gasta ona dolar millaun ba millaun b atu fó ajuda iha tempu pandemia no mós forma Komisaun ba dezastre hamutuk 950 liu.

 Durante tempu pandemia neʼe, ema mós hasoru susar oioin tanba dezastre naturais ka krize no buat sira-neʼe mós afeta irmaun-irmán sira iha mundu tomak. Atu bele fó ajuda durante situasaun no dezastre sira hamutuk 200 liu, Komisaun Koordenadór husi Grupu Administradór aprova osan hamutuk dolar millaun 8 atu fó ajuda durante tempu pandemia COVID-19. Mai ita haree oinsá kontribuisaun neʼebé Ita fó, ajuda ona vítima sira husi dezastre rua neʼebé foin daudaun akontese.

 Iha 22 Maiu 2021, Foho Nyiragongo iha Repúblika Demokrátika Kongu komesa rabenta. Foho neʼe muta sai tahu manas neʼebé estraga uma, eskola no mós fatin neʼebé rai bee moos. Maibé iha tan buat seluk neʼebé perigu. Durante loron barak depois foho neʼe rabenta, ahi-kadesan neʼebé venenu husi foho taka sidade Goma no mosu rai-nakdoko kiʼik barak. Porsentu 50 husi sidade nia populasaun presiza evakua ba fatin seluk neʼebé seguru. Ema rihun ba rihun halai sai ba rai-Ruanda liuhusi fronteira.

 Husi ema sira-neʼe, iha Testemuña ba Jeová maizumenus naʼin-5.000. Sira balu nia uma sai aat tanba dezastre neʼe. Sira seluk fali lakon sira-nia sasán hotu tanba ema hadau tiha kuandu sira halai. Komisaun ba dezastre iha rai-Ruanda no Repúblika Demokrátika Kongu organiza serbisu atu fó ajuda ba ita-nia irmaun-irmán sira. Relatóriu husi sukursál Kongu (Kinxasa) kona-ba komisaun ba dezastre ida hatete: “Maski situasaun iha sidade laran mak runguranga tebes no seidauk iha matadalan atu halo evakuasaun, maibé komisaun ba dezastre komesa ona fahe hahán, bee moos, toba-fatin no mós roupa.” Iha knua ida, iha ita-nia irmaun-irmán naʼin-2.000 liu neʼebé halibur hamutuk. Komisaun ba dezastre monta tenda sira, fahe masker, no esplika oinsá atu bele hamenus risku atu kona COVID-19 no kólera.

 Fulan tolu liutiha, ita-nia organizasaun fahe ona foos tonelada neen liu, batar-uut tonelada neen liu, mina teʼin nian litru 8.000 liu, no bee moos litru 8.000 liu. Atu bele uza didiʼak osan kontribuisaun, sukursál halo arranju atu sosa produtu lokál no sosa barak dala ida duké sosa produtu husi rai liʼur neʼebé karun liu.

 Irmán ida neʼebé ninia uma foun sai aat tanba dezastre hatete: “Ami sente laran-kraik no triste tebes.” Maibé tuirmai ninia família hetan ajuda iha dalan fíziku no mós espirituál. Agora nia hatete: “Ho Jeová nia ajuda, ami nafatin iha buat neʼebé ami presiza ba moris loroloron nian. Ami bele haree katak Jeová apoia ami no ajuda ami atu tahan.”

 Akontese krize ekonomia ba tinan barak iha rai-Venezuela. Ita-nia irmaun-irmán sira neʼebé hela iha neʼebá presiza tahan situasaun neʼebé susar, hahán menus, no mós krime neʼebé aumenta barak. Maibé Jeová nia organizasaun la fila kotuk ba sira.

 Durante tinan serbisu nian 2021, organizasaun gasta osan hamutuk dolar millaun 1,5 atu sosa hahán no sabaun no mós haruka buat sira-neʼe ba família sira neʼebé presiza ajuda. Relatóriu husi sukursál Venezuela hatete: “La fasil atu lori hahán hamutuk tonelada 130 liu ba irmaun-irmán sira iha rai-Venezuela tomak fulan-fulan no atu haree katak hahán sira-neʼe toʼo duni ba irmaun-irmán sira neʼebé presiza.” Atu hahán sira-neʼe la sai aat, baibain irmaun sira haruka hahán sira neʼebé bele dura ba tempu kleur. Sukursál mós hatutan: “Ami koko atu sosa hahán barak kedas no sosa ai-fuan no modo tuir tempu atu nuneʼe folin baratu liu. Tuirmai ami haruka ba fatin oioin hodi uza transporte neʼebé baratu.”

 Irmaun Leonel mak membru husi Komisaun ba dezastre ida iha rai-Venezuela no nia gosta tebes ninia knaar. Nia hatete: “Serbisu atu fó ajuda ba ema mak espesiál. Serbisu neʼe hametin duni haʼu husi tempu neʼebé haʼu-nia feen mate tanba COVID-19. Haʼu sai okupadu atu ajuda ema no haʼu sente kontente tanba bele ajuda irmaun-irmán sira neʼebé presiza ajuda. Haʼu rasik haree ona oinsá Jeová kontinua kumpre ninia promesa atu la fila kotuk ba ninia povu.”

 Irmaun ida neʼebé uluk serbí nuʼudar membru ba Komisaun ba dezastre ida mós hetan ajuda. Nia hatete: “Agora mak haʼu-nia tempu atu simu fali ajuda. Ami laʼós deʼit simu ajuda iha dalan fíziku. Irmaun-irmán sira mós ajuda haʼu no haʼu-nia feen atu kontinua kalma. Sira tau matan ami, fó kmaan ba ami, no mós hametin ami.”

 Dezastre balu akontese derrepente deʼit. Maski nuneʼe, baibain Jeová nia organizasaun bele hetan no haruka sasán no hahán sira ho lalais tanba kontribuisaun neʼebé imi fó ba serbisu iha mundu tomak. Dalan atu fó kontribuisaun hakerek iha website donate.mt711.com. Ami hafolin tebes imi-nia laran-luak.