Iha 7 Agostu 1993, iha sidade Kyiv, Ukránia, irmaun-irmán naʼin-7.402 mak hetan batizmu iha Testemuña ba Jeová nia reuniaun boot internasionál ho tema “Hanorin husi Maromak”. Iha tempu modernu, neʼe mak reuniaun neʼebé ema barak liu mak hetan batizmu atu sai Testemuña ba Jeová. Sira neʼebé hetan batizmu nafatin hanoin-hetan loron espesiál neʼe.

Ema neʼebé hetan batizmu iha tempu neʼebá inklui irmaun Volodymyr no ninia feen Alla. Neʼe mak dala primeiru neʼebé sira tuir reuniaun boot. Iha tempu neʼebá, maizumenus ema naʼin-65.000 husi rai 16 mak tuir reuniaun boot neʼe. Volodymyr no Alla dehan: “Reuniaun boot neʼe hatudu mai ami katak relasaun entre irmaun-irmán sira iha mundu tomak mak hanesan família rasik. Neʼe mak realidade, laʼós istória neʼebé ita lee iha livru sira. Agora, tanba tuir reuniaun boot ba tinan barak ona, ami hasoru irmaun-irmán barak neʼebé fó ezemplu kapás kona-ba serbí Jeová no sai kontente.”

Irmaun Oleksandr husi Kyiv mós hetan batizmu iha reuniaun boot neʼe hamutuk ho irmaun-irmán naʼin-50 liu iha ninia kongregasaun. Nia konta: “Domin no unidade neʼebé irmaun-irmán hatudu book tebes haʼu-nia laran toʼo haʼu tanis. Neʼe hametin haʼu-nia fiar katak haʼu mak parte husi família espirituál ida neʼebé hadomi malu. Toʼo agora, haʼu nafatin sente hanesan neʼe bainhira haʼu tuir reuniaun boot.”

Bainhira irmán Liudmyla hanoin fali ninia loron batizmu no reuniaun boot neʼe, nia hatete: “Programa ho tema ‘Hanorin husi Maromak’ ajuda haʼu atu tau fokus ba haʼu-nia planu espirituál. Haʼu halo planu atu serbí Jeová tempu-tomak. Haʼu konsege kumpre planu neʼe, no toʼo agora haʼu serbí Jeová tempu-tomak ba tinan 28 ona. Durante tinan barak neʼe Jeová sempre apoia haʼu.”

Reuniaun boot internasionál ho tema “Hanorin husi Maromak” neʼebé halaʼo iha Kyiv iha tinan 1993 mak espesiál tebes. Husi tempu neʼebá toʼo agora, haklaken-naʼin iha rai-Ukránia aumenta besik dala tolu. Jeová kontinua haraik bensaun ba irmaun-irmán sira iha Ukránia neʼebé deside atu serbí nia ho aten-brani, dedika an no hetan batizmu.—Éxodo 32:26.