Oinsá mak haʼu bele sai Testemuña ba Jeová?

LOKE

Mateus 28:19, 20 ajuda ita komprende hakat saida deʼit mak ita presiza halo atu bele sai Testemuña ba Jeová. Iha eskritura neʼe, Jesus Kristu koʼalia kona-ba buat neʼebé ema presiza halo hodi bele sai ninia dixípulu, neʼe inklui fó sasin kona-ba Jeová.

Hakat 1: Buka-hatene Bíblia nia hanorin. Jesus fó mandamentu atu ajuda ema sai ninia “dixípulu” hodi “hanorin sira”. (Mateus 28:19, 20) Liafuan “dixípulu” signifika “estudante ida”. Iha Bíblia laran, liuliu parte kona-ba Jesus nia hanorin, ita bele hetan informasaun neʼebé ajuda ita atu iha moris neʼebé kontente no iha objetivu. (2 Timóteo 3:16, 17) Ami kontente atu ajuda Ita aprende Bíblia nia hanorin liuhusi ami-nia kursu Bíblia gratuitu.—Mateus 10:7, 8; 1 Tesalónika 2:13.

Hakat 2: Aplika buat neʼebé Ita aprende. Jesus hatete katak ema neʼebé aprende tenkesér mós ‘halo tuir mandamentu hotu neʼebé nia fó ona’. (Mateus 28:20) Neʼe katak bainhira estuda Bíblia, Ita-nia objetivu mak laʼós buka matenek deʼit, maibé atu halo mudansa ba Ita-nia hanoin no hahalok. (Apóstolu 10:42; Éfeso 4:22-29; Ebreu 10:24, 25) Kuandu ema ida halo tuir Jesus nia mandamentu, neʼe book nia atu sai Jesus nia dixípulu hodi dedika ninia moris ba Maromak Jeová.—Mateus 16:24.

Hakat 3: Hetan batizmu. (Mateus 28:19) Iha Bíblia laran, liafuan batizmu kompara hanesan hakoi. (Kompara ho Roma 6:2-4.) Neʼe katak ema neʼebé hetan batizmu mate ona iha moris uluk nian no hahú fali moris foun. Liuhusi batizmu mak Ita fó-hatene ba ema seluk katak Ita kumpre ona hakat rua primeiru neʼebé Jesus temi, no agora husu Maromak atu bele iha konxiénsia neʼebé moos.—Ebreu 9:14; 1 Pedro 3:21.

Oinsá mak haʼu hatene haʼu prontu ona atu hetan batizmu ka seidauk?

Koʼalia ba katuas kongregasaun. Sira sei koʼalia ho Ita atu hatene Ita komprende duni kona-ba Ita-nia desizaun ka lae, Ita aplika duni buat neʼebé Ita aprende husi Bíblia ka lae, no Ita dedika an ona ba Maromak ho hakarak rasik ka lae.—Apóstolu 20:28; 1 Pedro 5:1-3.

Testemuña nia oan sira mós presiza halo tuir hakat sira-neʼe ka lae?

Presiza. Ami haboot ami-nia oan tuir buat neʼebé Bíblia haruka, neʼe mak “ho dixiplina no ho hanorin neʼebé tuir Jeová nia hakarak”. (Éfeso 6:4) Maibé bainhira sira boot ona, sira rasik mak tenke estuda, simu, no aplika buat neʼebé Bíblia hanorin hodi bele kumpre kritéria atu hetan batizmu. (Roma 12:2) Ikusmai, ema ida-idak mak tenke halo desizaun rasik kona-ba adorasaun.—Roma 14:12; Galásia 6:5.