Tsapa ze ndaty nijera laletse fa sarotse ty mijera aze. Mahiratse loatse iareo, le lomay malaky naho fa misy magnaly hitsepake aze.

 Trea o mpahay siansao fa misy karazan-daletse raike zay, afake mitsile tampoke manahake o rapolany mpialio, ie amy izaò agnate ty segondra tsy ampe avao ty anoa’e izay. Tsy inogne io fa o laletse mpihinagne voan-kataeo. Naho vaho foy iareo, le fa “mahay mitiligne”, hoe ty Profesora Michael Dickinson. Mirehake ty Dickinson fa le “hoe raha misy ajaja vaho naterake ty agnate o rapolany mpialio ao sady le avy le hai’e ty minday aze.”

 Nisy mpikaroke nangalake video laletse mitiligne sady nahatrea fa akopa’e in-200 isan-tsegondra i ela’ey. Faie ndra tie mikopake indraike avao aza i ela’ey, le fa afake mitsile i vata’ey sady afake lomay reke.

 A manao akore ka ty fahirata ty betro’e? Trea o mpikarokeo fa malaky bey ty fiasa ty betro’e satria mihoatse 50 amy ty falaky ty fipie o masò. Hoe ty Dickinson: “Mahavita manao kajy tena sarotse agnate ty fotoagne fohe o laletseo mba hahafaha’e mamantatse tie aia ty misy i lozay sady toko’e hitsile aia reke mba hiala’e amy izay.”

 Akore ty ahafaha i betro o laletse mpihinagne voan-kataeoy manao izay, ie amy izaò i betro’ey kedekede? Mbe agnate ty mikaroke ty vale izay o manam-pahaiagneo hatrake amy izao.

 Akore ty heve’o? Vokatse ty evolisiona (ndra fiovagne erike) vao ty fahaia o laletse mpihinagne voan-kataeo mitiligne, sa nisy namorogne?