Nagnino ro Tsy Mitovy amy ty Ahy o Fivavahagne Hafao ty Fomba Ankalazà o Vavolombelo i Jehovah-o i Mahakama Hariva i Tompoy?

MANDEFA

Atao tihoe “Fanasan’ny Fompo” ndra Fahatsiarovagne ty nimateza i Jesosy i Mahakama Hariva i Tompoy. (1 Korintianina 11:20; Fandikan-drehake Protestanta) Ze rehafe ty Baiboly avao ro orihe’ay Vavolombelo i Jehovah naho fa mankalaza io zahay. Tsy boake amy Baiboly ao ty raha ila’e atao ty fivavahagne hafa agnate o fankalazagne iohoe naho ty raha inoa’e miomba io.

Nagnino tikagne ro toko’e hankalaza i Mahakama Hariva i Tompoy?

Natao mba hahatsiarovagne i Jesosy i Mahakama Hariva i Tompoy. Toko’e hankasitrake aze tikagne satria nanao sorogne ty fiai’e ho antikagne reke. (Matio 20:28; 1 Korintianina 11:24) Faie tsy sakramenta o Mahakama Hariva i Tompo iohoe, ty dika izay tsy tihoe fombafomba atao mba hahazoagne fahasoavagne boake aman’Andrianagnahare ndra famelan-keloke. a Rehafe ty Baiboly fa ze ndaty mino i Jesosy ro ho voavela heloke, fa tsy ze manao fombafomba.—Romanina 3:25; 1 Jaona 2:1, 2.

Impire ro toko’e hankalazaegne i Mahakama Hariva i Tompoy?

Nandily o mpiana’eo mba hankalaza ty Mahakama Hariva i Tompo ty Jesosy, faie tsy nirehake reke tie isake inogne iareo ro toko’e hanao izay. (Lioka 22:19) Misy ty mihevetse tie toko’e ho isam-bolagne io ro hankalazaegne. Ty ila’e ka mirehake tie isan-keregnandro ndra isan’andro. Misy avao ka ty mirehake tie atao mateteke isan’andro ndra atao mateteke arake ze azo atao. Impire areke ty toko’e ho ie? Dineho zao:

Tamy ty date nankalazagne ty Pasake Jiosy ty Jesosy ro nanao ty Mahakama Hariva i Tompo voaloha’e, sady tamo o andro io reke ro nivonoegne. (Matio 26:1, 2) Tsy tihoe kisendrasendra avao zay. Mirehake ty Soratse Masigne fa mitovy amy i Jesosy natao sorogney i anak’agnondry nivonoegne tamy i Pasakeỳ. (1 Korintianina 5:7, 8) Indraike isan-taogne ty nankalazagne i Pasakey. (Eksodosy 12:1-6; Levitikosy 23:5) Izay ty norihe o Kristiana voaloha’e reo, le indraike isan-taogne iareo ro nankalaza i Fahatsiarovagne ty nimateza i Jesosỳ. b Mbe izay avao ty orihe ty Vavolombelo i Jehovah hatrake amy izao.

A manao akore ty date naho ty fotoagne ankalazagne aze?

Azo fantaregne ka vao ty date naho ty fotoagne anoagne i fankalazagney, naho fa henteagne ty raha natao i Jesosy? Tamy 14 Nisana taogne 33, tafara ty nitsofora i masoandroy ty Jesosy ro nankalaza i Mahakama Hariva i Tompoy, naho fa henteagne ty kalandrie fampiasae o Jiosio tamy izay. (Matio 26:18-20, 26) Isake 14 Nisana ka areke zahay ro mankalaza io. Izay ty fanoe o Kristiana voaloha’eo, le izay ka ty orihe’ay. c

Maregne fa Joma i 14 Nisana taogne 33 igne, faie tsy voatere ho Joma avao i 14 Nisanay isan-taogne fa va’e ho andro hafa ka. Akore areke ty ahafantara’ay tie inogne ty date mifanandrife amy i 14 Nisanay? Tsy mampiasa i kalandrie jiosy moderinay zahay, fa mampiasa i kalandrie fampiasa tamy ty andro i Jesosỳ. d

Ino ty mofo naho divay ampiasaegne ama’e?

Amby i mofo tsy misy levira naho divay mena tamy i Pasakeỳ ty nampiasae i Jesosy. (Matio 26:26-28) Mofo tsy nasiagne levira ndra misy fangaro’e hafa areke ty ampiasae’ay. Mampiasa divay mena tsotra ka zahay fa tsy ranom-boaloboke ndra divay nasiagne siramamy ndra raha magnitse ndra nafangaro amy ty toake.

Misy fivavahagne magnisy levira amy i mofoy. Faie mateteke i leviray, midika tihoe ota ndra haratiagne tie amy Baiboly ao. (Lioka 12:1; 1 Korintianina 5:6-8; Galatianina 5:7-9) Tsy toko’e hasiagne levira ndra afangaro amy ty raha hafa i mofoy, satria manjare tsy mitovy amy i vata i Kristy tsy misy otay. (1 Petera 2:22) Ranom-boaloboke ka ty ampiasae ty fivavahagne ila’e fa tsy divay. Mihevetse iareo fa tsy azo atao ty minogne raha misy toake. Faie diso zay naho henteagne ty Baiboly.—1 Timoty 5:23.

Miova ho vata i Kristy vao i mofoy, le i divaỳ miova ho lio’e?

Nampitovize i Jesosy tamy i mofoy ty vata’e, le tamy i divaỳ ty lio’e. Nampiasae’e mba hanoagne fampitoviagne avao i mofoy naho i divaỳ. Tsy maregne areke i tihoey tie miova ho tena vata’e i mofoy le i divaỳ miova ho tena lio’e, naho i tihoey manjare mifangaro amy i vata’ey i lio’ey. Ino ty anto’e? Iretoa misy porofo boake amy Baiboly ao:

Raràn’Andrianagnahare ty mihinagne lio. Sahala hoe mandrisike ze mpiana’e handika izay ty Jesosy, naho mandily iareo hinogne ty lio’e. (Genesisy 9:4; Asan’ny Apostoly 15:28, 29) Fanta i Jesosy fa masigne o liò. Tsy ireke areke ro handrisike o ndatio handika ty lalàn’Andrianagnahare miomba ty lio.—Jaona 8:28, 29.
Naho fa boake ninome i Apostoly i Jesosy rey tamy i Mahakama Hariva i Tompoy ka i lio’ey, le tsy ho nirehake reke tie mbe “hategne” i lio’ey, ty dika izay mbe vaho hategne ho sorogne afara kede izay.—Matio 26:28.
“Indraike avao” ka ty Jesosy ro nanao sorogne ty fiai’e. (Hebreo 9:25, 26) Manjare hoe aherenkeregne avao areke i sorogne natao’ey naho miova ho tena vata’e i mofoy, le tena lio’e i divaỳ, isake tie Mahakama Hariva i Tompo.
Nirehake ka ty Jesosy tie: “Anò avao zao ho fahatsiarovagne ahy”, fa tsy tihoe “ho fanoagne sorogne ahy.”—1 Korintianina 11:24.

Nagnino ro misy mino tie tena miova ho vata i Jesosy vata’e i mofoy le lio’e vata’e i divaỳ? Ty rehake ampiasae ty Baiboly ila’e ro mahavy izay. Maro ohatse, ty Baiboly mandika hoe izao i reha i Jesosy miomba i divaỳ: “Intoy ty lioko.” Faie azo adika hoe izao ka io: “Midika ho lioko toy.” (Matio 26:28, fagnamarehagne ambane peje) e Nampiasa rehake agn’ohatse ty Jesosy teo manahake ty fanoe’e.—Matio 13:34, 35.

Ia ty toko’e hihinagne amy i mofoy naho hinogne amy i divaỳ?

Tsy ampe avao ty mihinagne amy i mofoy naho minogne amy i divaỳ naho fa mankalaza i Mahakama Hariva i Tompoy o Vavolombelo i Jehovah-o. Ino ty anto’e?

Nanjare nisy tihoe “fifagnekeagne vaovao”, noho ty lio i Jesosy. O fifagnekeagne iohoe ty solo i fifagnekeagne nifanoa i Jehovah Andrianagnahare naho ty firene o Israely talohaoy. (Hebreo 8:10-13) Ze tafilitse amo o fifagnekeagne vaovao io avao ro mahazo mihinagne amy i mofoy naho minogne amy i divaỳ naho amy i Mahakama Hariva i Tompoy. Tsy ty Kristiana iaby zay, fa ze tinokan’Andrianagnahare ho an-dagnitse agne avao. (Hebreo 9:15; Lioka 22:20) Hiarake manjaka amy i Kristy agne iareo. Rehafe ty Baiboly tie 144 000 avao ty ndaty mahazo o fitahiagne iohoe.—Lioka 22:28-30; Apokalypsy 5:9, 10; 14:1, 3.

Atao tihoe “agnondry tsy ampe” o ndaty hiarake manjaka amy i Kristy an-dagnitse agne reo. Atao tihoe “vahoake maro” ka ze ndaty mitamà hiaigne nainai’e an-tane etoa. Mitamà hiaigne nainai’e eto ty ankamaroa’ay. (Lioka 12:32; Apokalypsy 7:9, 10) Mankalaza i Mahakama Hariva i Tompoy miarake amo o “agnondry tsy ampeo” i “vahoake maroy” ndra tie tsy mihinagne amy i mofoy naho minogne amy i divaỳ aza. Ty anto’e, te hankasitrake an’Andrianagnahare iareo noho ireke nagnomey i Jesosy ho sorogne ho antikagne.—1 Jaona 2:2.

a Hoe ty Cyclopedia nanoe i McClintock naho i Strong, amy ty boke IX, peje 212 ao: “Tsy trea amy ty T[estamenta] V[aovao] ao ty rehake tihoe sakramenta. Tsy midika tihoe badisa ndra fanasà i Tompo ndra fankalazagne hafa ka ty rehake grike tihoe μυστήριον [my·steʹri·on].”

b Henteo ty The New Schaff-Herzog Encyclopedia of Religious Knowledge, Boke IV, peje 43-44, naho ty Cyclopedia nanoe i McClintock naho i Strong, Boke VIII, peje 836.

c Henteo ty The New Cambridge History of the Bible, Boke 1, peje 841.

d Naho ty kalandrie jiosy moderina ro henteagne, le manomboke ty volagne Nisana naho fa manomboke trea ty astronoma i volagney peakey. Naho ty kalandrie jiosy tamy ty taonjato voaloha’e ka ro henteagne, le manomboke i volagne Nisanay naho fa manomboke trea a Jerosalema agne i volagne peakey, ty dika izay andro raike ndra mahery afara i fotoagne ahatreava ty astronoma i volagne peakey. Ty kalandrie ty jiosy taloha ro orihe’ay Vavolombelo i Jehovah, le mateteke ro tsy mitovy amy ty date ankalazà o jiosy amy izaò Pasake ty date ankalazà’ay ty Mahakama Hariva i Tompo.

e Henteo ty A New Translation of the Bible, nanoe i James Moffatt; The New Testament—A Translation in the Language of the People, nanoe i Charles B. Williams; naho ty The Original New Testament, nanoe i Hugh J. Schonfield.