Nampianare i Abrahama ho tea i Jehovah naho hatoky ze raha ampitamae i Jehovah iaby ty Isaka. Faie naho fa nifeno 25 taogne ty Isaka, le nampanoe i Jehovah raha sarotse ty Abrahama. Inogne zay?

Hoe ty Jehovah tamy i Abrahama: ‘Ento ajafady o ana-dahi’o bakotokagneo, le anò sorogne ho ahy amy ty vohy i Moria agne.’ Tsy fanta i Abrahama ty anto’e nahavy i Jehovah nangatake aze hanao izay, faie le nankatò avao reke.

Mbe maraindraim-bey i androy, le nente i Abrahama ty Isaka naho ty mpanompo’e roe handeha a Moria agne. Telo andro tafara izay, le nahatalake i vohitsey iareo. Nirehafe’e i mpanompo’e rey mba handigne teo amparake ty hahavità i sorogney. Nampindese i Abrahama hatae ty Isaka, le i reke ninday mesa. Nagnontenea Isaka reke tie: ‘Aia baba ty biby hataontika sorogne?’ Hoe ty navale’e: ‘Mbe homey i Jehovah anake.’

Namboatse alitara iareo naho fa niavy tam-bohitsey. Finehe i Abrahama ty tagna Isaka naho ty tombo’e, le natao’e ambone i alitaray eo reke.

Ie nagnonjogne i mesay ty Abrahama, le nisy anjely i Jehovah nitoka aze tihoe: ‘O Abrahama! Ko vonoegne o lahio! Fa fantako hinane zao tie mino i Jehovah rehe  kanao nahafoe o ana’ò hatao sorogne.’ Nahatrea agnondry lahy nazỳ ty vahe ty tsifa’e tagnate ala ao ty Abrahama. Nagnaha Isaka malaky reke, le i agnondrỳ ty nasolo’e aze.

Nanomboke tamy izay ty nanoa i Jehovah i Abrahama tihoe ragne’e. Hai’o vao ty anto’e? Nanao ze raha teà i Jehovah hatao ty Abrahama ndra tie tsy fanta’e ty anto’e nangatahe i Jehovah aze hanao izay.

Nahere i Jehovah indraike i fampitamà’e tamy i Abrahamay tie: ‘Hitahy azo raho, le hataoko maro ty tarana’o.’ Ty dika izay, le hotahie i Jehovah amy ty alala ty tarana i Abrahama ze hene ndaty soa fagnahy iaby.