Tena niambake i havoriambey vondrom-paritse 2020 igne. Vaho tamy igne o havoriambey vondrom-paritseo ro nalaegne feo naho video, le nalefa amy Internet ao! Faie ty ta Malawi naho ty ta Mozambike agne, tsy nagnente havoriambey ndra nitsanogne tamy Internet ao o rahalahio naho o rahavaveo. Akore ty natao iareo?

 Neké ty Komity ty Mpandrindra naho ty Komity ty Fampianaragne vaho ty Filan-keve-pitantanagne ty handefasagne i havoriambeỳ tamy ty tele vaho tamy ty radio ta Malawi vaho ta Mozambike agne. Nagnino ro tena nilaegne ze raha zay? Ty anto’e, maro ty Vavolombelo i Jehovah tsy managne fahafahagne hampiasa Internet a Malawi agne satria lafo ty manjilike data agne. Nagnazava ty rahalahy William Chumbi, agnisa ty Komity Sampagne a Malawi agne fa mora andrambesa ty mpiara-manompo amy iareo agne hanegne ara-pagnahy o teleo naho o radiò. Hoe izao ka ty nirehafe i rahalahy Luka agnisa ty Komity Sampagne a Malawi agne: “Tsy nagnarake i havoriambeỳ tamy ty tele naho ty radio zahay satria tsy ampe avao ty mpiara-manompo ama’ay atoy nahavita havoriambey.” Ta Mozambike agne ka tsy ampe avao ty nanagne fitaovagne elektronike mete ampiasagne Internet.

 Noho i COVID-19, le fa nisy fivoriagne nalefa ty amy ty tele naho ty radio ila’e. a Nanao fangatahagne o rahalahio mba hampitomboagne ty lera handefasagne i havoriambey vondrom-paritsey.

 Nifanojo tamo o fandaharagne iohoe o rahalahy a Malawi agne reo. Lera raike avao hoe tasa i mpandefa azey ty andefasagne raha miomba ty fivavahagne, amy izay o ndaty mpitsanogne radiò tsy entsake. Faie nagnazava i rahalahy rey tie tena magnampe o fiaraha-monegneo io. Tena mipay talily soa naho fampaherezagne boake amy Baiboly ao o ndatio amy ty figobognagne toy. Magnampe o ndatio hilamin-tsaigne naho hanagne tokatragno sambatse io. Naho fa naharey izay iareo, le neké iareo fa hatao lavalava i fandaharagney.

 Nalefa tamy ty tele naho ty radio i havoriambeỳ tie ta Malawi agne. Ndaty an-tapetrisa’e ty nitsanogne aze naho nagnente aze. Nalefa tamy ty tele naho ty radio 85 ka i havoriambeỳ tie ta Mozambike agne.

 Tamo o tane roe rehoe, le nisy 28 227 dolara b ty vola nilany nandefasagne i havoriambeỳ tamy ty tele, le 20 000 dolara eo ho eo tamy ty radio. Tamy i radio madinedineke rey eo amy ty 15 dolara eo fa i radio nasionaly rey 2 777 dolara.

 Tena niasa mafe o rahalahintikagne reo nampiasa o vola fagnomezagneo amy ty fomba soa. Nialy varotse o rahalahy ta Malawi agne reo, le nihegne 30 isan-jato ty nilany. Nahazoagne tombo’e 1 711 dolara zay tie ta Mozambike agne. Nanhe iareo ty vili’e satria malaza ho manao ty maregne tikagne sady tsy mikatramo.

 Tena nankasitrake i havoriambey nalefa tamy ty tele naho ty radio igne o rahalahio iaby. Misy androanavi-pagnahy boake a Malawi agne atao tihoe Patrick zay nirehake tie: “Tena mankasitrake o rahalahy agnisa ty Filan-keve-pitantanagneo raho nanao ty fandaharagne miambake toy satria tena teà iareo zahay.” Hoe ka ty Isaac boake a Malawi agne avao: “Tena mankasitrake i fandaharagne boake amy ty fandamina i Jehovah tamy ty tele naho ty radio igne zahay satria tsy managne raha azo’ay anoagne havoriambey. Nanjare nahavita havoriambey vondrom-paritse zahay keleian-draike. Trea’ay tamy igne fa tena tea anay ty Jehovah.”

 Misy mpitory raike a Mozambike agne zay vaho samba’e nagnatreke havoriambey vondrom-paritse tamy 2020 igne. Hoe reke: “Ty fanoagne i havoriambeỳ tamy ty tele igne ty nahatsapako fa tena Andrianagnahare Fara’e Mahery ty Jehovah. Tsy mahakalagne aze tsy hagnomey antikagne hanegne ara-pagnahy i aretegne manjamagney. Treako ka fa tena mifankatea vata’e ty vahoa i Jehovah. Tena rese lahatse raho fa io ro fivavahagne maregne.”

 Hoe ze androanavi-pagnahy raike atao tihoe Wyson zay: “Misaotse i Mpanompo Mahihitse Naho Mahimbagney raho noho ty fikarakarà iareo antikagne tagnate i aretegne manjamagney. Tena nagnampe ndaty maro i havoriambey nalefa tamy ty tele naho ty radio igne satria ty ama’ay atoy ro agnisa ty tane tena mahantra magneran-tane. Faie nahazo i fandaharagney avao zahay sady nahazo tombotsoa boake ama’e.”

 Nirehake ty Komity ty Mpandrindra naho ty Komity ty Fampianaragne fa va’e halefa amy ty tele naho ty radio indraike tie amy ty tane ila’e ty havoriambey 2021. Boake aia ty vola ahavitantikagne magnatanterake i raha rezay? Boake amo o fagnomezagne ataontikagne hoahy ty asa magneran-taneo. Maro amantikagne ty manao o fagnomezagne iohoe amy donate.mt711.com ao. Tena mankasitrake anareo amy ty fatariha’areo.