Akaaôron a Profeti a sha Kwagh u Mesiya Tese Ér Yesu Lu Mesiya?

KUHWA

Mlumun u Bibilo i ne yô

Een. Shighe u Yesu lu shin tar la, akaaôron a profeti kpishi a sha kwagh u “u i shigh Un mkurem, ka Tor je la” man “Oryiman u tar” la yange kure sha a na. (Daniel 9:25; 1 Yohane 4:14) Shi shighe u Yesu kpe kera la kpa, za hemen u kuren akaaôron a profeti agen a yange i tsenga ôron sha kwagh u Mesiya yô.—Pasalmi 110:1; Aerenakaa 2:34-36.

Inja i “Mesiya” ér nyi?

Ishember i ken zwa Heberu i Ma·shiʹach (Mesiya) man i ken zwa Grika i Khri·stos (Kristu) la cii inja na ér “U I Shigh Un Mkurem.” Sha nahan yô, inja i “Yesu Kristu” ér “Yesu U I Shigh Un Mkurem” shin “Yesu u a lu Mesiya” la.

Sha ayange a i ngeren Bibilo la, yange i shighe or mkurem sha u haan nan ma sha ityou u tesen ér i na nan tom u icivirigh shin i ver nan sha ian i utaha. (Levitiku 8:12; 1 Samuel 16:13) Aôndo yange tsua Yesu ér a lu Mesiya. Yange ver un sha ian i vesen shi na un tahav. (Aerenakaa 2:36) Nahan kpa, Aôndo yange haa Yesu mkuren sha ityou u tesen ér un shighe un mkurem ga, kpa gema tsegha un sha icighan jijingi.—Mateu 3:16.

Akaaôron a profeti a yange i tsenga ôron sha kwagh u Mesiya la aa fatyô u kuren sha ior kpishi?

Ei. Akaaôron a profeti a yange i tsenga ôron ken Bibilo sha kwagh u Mesiya la cii va kure sha Mesiya môm shin Kristu. Nahan kpa, Bibilo kaa a vese ér se wa ikyo sha ci u “Ukristu mbaaiev man uprofeti mbaaiev vea due vea er uivande man akaa a kpilighyol, sha u aluer ve fatyô yô, vea tsugh mba i tsough ve la je kpaa” yô.—Mateu 24:24.

Mesiya una va ande ken hemene?

Ei. Bibilo yange i tsenga ôron ér Mesiya una lu wan u Tor Davidi u ken Iserael. (Pasalmi 89:3, 4) Nahan kpa, ngeren mba ve tese kwagh u icombor i Mbayuda i sha ayange a Davidi la cii saa. A shi nan kpa yange i nande ngeren mbara shighe u Mbaroma va tim Yerusalem ken inyom i 70 S.Y. * la. Hii shighe la je taver kpishi u or nan tese ér nan ngu ken tsombortor u Davidi la. Nahan kpa, ngeren mbara lu sha ayange a Yesu la, nahan lu kwagh u mbaihyomov nav kpa vea nyiman ér ngu wan u Davidi ga ze.—Mateu 22:41-46.

Ka akaaôron a profeti a sha kwagh u Mesiya a me a lu ken Bibilo?

A fatyô u fan iyenge i akaaôron a profeti a sha kwagh u Mesiya jighilii ga. Ikyav i tesen yô, gbenda u i ôr akaaôron a profeti sha kwagh u Mesiya la je kpa ashighe agen a taver u fan iyenge i a. Shin er i tese sha ajiir la wang ér ka kwagh u Mesiya i lu ôron nahan kpaa. Yesaia 53:2-7 ôr akaaôron a profeti kpishi sha kwagh u Mesiya. Ior mbagen yô, vea kaa ér avur la cii ôr ka kwaghôron u profeti môm. Kpa mbagen di vea nenge ér ka akaaôron a profeti kposo kposo.

Akaaôron a profeti agen a sha kwagh u Mesiya a yange kure sha Yesu yô

Kwaghôron u profeti	Ape a dugh yô	Mkur na
Una va ken tsombor u Aberaham	Genese 22:17, 18	Mateu 1:1
Una lu wan u Isaka, wan u Aberaham	Genese 17:19	Mateu 1:2
A mar un ken Iserael ken ipyaven i Yuda	Genese 49:10	Mateu 1:1, 3
Una va ken tsombortor u Tor Davidi	Yesaia 9:7	Mateu 1:1
Iniunkwase ia mar un	Yesaia 7:14	Mateu 1:18, 22, 23
A mar un ken Betelehem	Mika 5:2	Mateu 2:1, 5, 6
A yila un ér Imanuel *	Yesaia 7:14	Mateu 1:21-23
Una lu a kwagh ave ga	Yesaia 53:2	Luka 2:7
A wua mbayev mba kiriki shighe u a mar un la	Yeremia 31:15	Mateu 2:16-18
A yila un ken Igipiti	Hosea 11:1	Mateu 2:13-15
A yila un ér Ornasareti *	Yesaia 11:1	Mateu 2:23
Ortyom, nana sôr un gbenda	Malaki 3:1	Mateu 11:7-10
A shighe un mkuren una hingir Mesiya ken inyom i 29 S.Y. *	Daniel 9:25	Mateu 3:13-17
Aôndo una pase ér ngu Wan Na	Pasalmi 2:7	Aerenakaa 13:33, 34
Kwagh u iyou i Aôndo ia gba un ishima	Pasalmi 69:9	Yohane 2:13-17
Una pase loho u dedoo	Yesaia 61:1	Luka 4:16-21
Una pase kwagh ken Galilia sha u tan iwanger i vesen	Yesaia 9:1, 2	Mateu 4:13-16
Una er uivande er Mose nahan	Duteronomi 18:15	Aerenakaa 2:22
Una ôr akaaôron a Aôndo er Mose nahan	Duteronomi 18:18, 19	Yohane 12:49
Una bee ior kpishi iangev	Yesaia 53:4	Mateu 8:16, 17
Una ker ér ior ve fa un ga	Yesaia 42:2	Mateu 12:17, 19
Mhôônom ma a kôr un a mbaatsanev	Yesaia 42:3	Mateu 12:9-20; Marku 6:34
Una ôr ijir sha mimi er Aôndo nahan	Yesaia 42:1, 4	Mateu 12:17-20
Una lu Orwasenmhen u Kpilighyol	Yesaia 9:6, 7	Yohane 6:68
Una pase iti i Yehova	Pasalmi 22:22	Yohane 17:6
Una ôr kwagh sha anzaakaa	Pasalmi 78:2	Mateu 13:34, 35
Una lu Tor	Daniel 9:25	Mateu 23:10
Ior kpishi na un jighjigh ga	Yesaia 53:1	Yohane 12:37, 38
Una lu iwen i nôngon gbeev sha mi	Yesaia 8:14, 15	Mateu 21:42-44
Uumace vea venda un	Pasalmi 118:22, 23	Aerenakaa 4:10, 11
Ior vea kôr un ihyom a ityôkyaa shio	Pasalmi 69:4	Yohane 15:24, 25
Una henda jaki una nyôr ken Yerusalem sha inja i tor	Sekaria 9:9	Mateu 21:4-9
Mbayev mba kiriki vea wuese un	Pasalmi 8:2	Mateu 21:15, 16
Una va ken iti i Yehova	Pasalmi 118:26	Yohane 12:12, 13
Ijende na i a ne i jighjigh yô ia nenge un mker	Pasalmi 41:9	Yohane 13:18
A tee un sha agbenger a azurfa 30 *	Sekaria 11:12, 13	Mateu 26:14-16; 27:3-10
Azende a na aa undu un	Sekaria 13:7	Mateu 26:31, 56
Mbashiada mbaaiev vea er shiada sha kwagh na	Pasalmi 35:11	Mateu 26:59-61
Una bugh zwa a mba ve lu wan un kwagh iyol la ga	Yesaia 53:7	Mateu 27:12-14
A haa un azer iyol	Yesaia 50:6	Mateu 26:67; 27:27, 30
A gbidye un gbough sha ityou	Mika 5:1	Marku 15:19
A gbidye un	Yesaia 50:6	Yohane 19:1
Una nôngo kwagh a mba vea gbidye un la ga	Yesaia 50:6	Yohane 18:22, 23
Mbahemenev mba gomoti vea zua zwa sha a na	Pasalmi 2:2	Luka 23:10-12
A mande un ave man angahar sha kon	Pasalmi 22:16	Mateu 27:35; Yohane 20:25
Ior vea er ishor (a gbidye do) a riga na	Pasalmi 22:18	Yohane 19:23, 24
A wa un ken mbaasorabo imôngo	Yesaia 53:12	Mateu 27:38
A naha un tar shi a tuhwa un	Pasalmi 22:7, 8	Mateu 27:39-43
Una ya ican sha ci u mbaasorabo	Yesaia 53:5, 6	1 Peteru 2:23-25
A lu inja er Aôndo undu un nahan	Pasalmi 22:1	Marku 15:34
A na un viniger man kwagh u yuan ér a ma	Pasalmi 69:21	Mateu 27:34
Imura a kôr un cii ve una mase kpen ye	Pasalmi 22:15	Yohane 19:28, 29
Una na Aôndo uma na	Pasalmi 31:5	Luka 23:46
Una kpe	Yesaia 53:12	Marku 15:37
Una na uma na u paan ior sha ikyev i isholibo	Yesaia 53:12	Mateu 20:28
A sombo un akuhe ga	Pasalmi 34:20	Yohane 19:31-33, 36
A kuma un	Sekaria 12:10	Yohane 19:33-35, 37
A ii un a mbanyarev imôngo	Yesaia 53:9	Mateu 27:57-60
A nder un shin ku	Pasalmi 16:10	Aerenakaa 2:29-31
A ver orgen sha ityough ki or u nana nenge un mker la	Pasalmi 109:8	Aerenakaa 1:15-20
Una tema ken uwegh ku yanegh ku Aôndo	Pasalmi 110:1	Aerenakaa 2:34-36

^ Ikyum. 5 Takeda u McClintock and Strong’s Cyclopedia kaa ér: “Kwagh u i kaa ér yange i nande ityakeda i tesen uipyaven man icombor i Mbayuda shighe u i tim Yerusalem la ka aie ga cii, lu cii man shighe ne ga.”

^ Ikyum. 40 Iti i ken zwa Heberu i Imanuel la, inja na ér “Aôndo Ngu a Vese,” man i pase tom u Yesu u Mesiya la vough. Shighe u va shin tar la, kua ityom na cii tese ér Aôndo ngu a mbacivir Un.—Luka 2:27-32; 7:12-16.

^ Ikyum. 52 Ishember i “Ornasareti” la ikyav tese ér i zua a i ken i ishember i ken zwa Heberu i yer ér neʹtser la, man inja na ér “amise.”

^ Ikyum. 58 Wea soo u seer fan er akaaôron a Bibilo a tese ér Mesiya yange va ken inyom i 29 S.Y. la yô, nenge ngeren u a lu a itinekwagh ér “Gbenda u Kwaghôron u Profeti u Daniel Tsengaôron Mve u Mesiya La.”

^ Ikyum. 127 Er kwaghôron u profeti ne a lu ken takeda u Sekaria nahan kpa, orngeren Bibilo Mateu yange kaa ér ka kwagh “u i ôr sha ikyev i profeti Yeremia” yô. (Mateu 27:9) Ikyav tese ér ashighe agen yange i ver takeda u Yeremia hiihii ken vegher u Ruamabera u ityakeda “i Uprofeti” la. (Luka 24:44) Nahan a shi nan kpa, Mateu ôr kwagh u “Yeremia” u tesen ér ka avegher a ityakeda la cii kua takeda u Sekaria kpaa.

MBAMPIN MBA BIBILO I NE MLUMUN SHA MI LA