Hanmaor u nan nôngo ér nana gbidye anji a wua yô, nan fa er ka i lu ican kpishi yô. Ka ve gema fese er ka inyiar nahan, maa ve palegh or u nan lu nôngon ér nana zua a ve la.

 Mbasainsi tôv sha kwagh u iji, nahan ve mase kaven ér anji ugen ngu, un shon u i yer ér fruit fly la, ngu a fatyô u geman vough er agirgi a purugh a i nôngon ityav a mi la nahan; kpa ngu a er kwagh ne kpase je i yina sekônd. Profesôr ugen mba yer iti na ér Michael Dickinson, a kaa ér, shighe u i tsev anjiin mba ikyagh la je kpa, “ka ve kôrcio u purugh er or u nan fe u purugh a agirgi tsema tsema nahan. Ka inja er i mar anikyundan forototo nahan maa i tôô nan i za penda shin igirgi i uitya ér nana naha, maa nan fa u nahan i tsembelee nahan.”

 Mbatôvon sha akaa kura kwagh u anjiin mban ken tser, nahan ve mase kaven ér ka vea purugh a geman la, ve jingir ingyur ken sekônd môm tseegh i kuma kwa 200; man kwa môm u ve jingir ingyur ve la tseegh kpa ka i kuma u vea gema a ver ishigh vegher ugen ape vea palegh kwagh u ma a tser ve la yô.

 Gema di sha gbaa u ka ve er kwagh fese la di ye? Mbatôvon sha akaa mase kaven nahan ér zum u kwagh a anger anjiin mban yô, ka ve er kwagh fele fele i hemba er orumace nan pelegh ishe la kwa 50. Dickinson pase nahan ér: “Iji ka i er ayenge tsung ken atô anshighe kpuaa sha er ia fa ape kwaghbo a lu la kua vegher u ia purugh a yem ve ia war a zayol shio la cii.”

 Er i hii ve mhirinim ma anji u a lu kpuaa man ka ma kôrcio u eren imbakwagh ne la yô, or ngu a fa ga, mbatôvon sha kwagh mba nôngon a nongo ér vea fa.

 We u nenge nena? U nenge wer kwagh u anji ne ka a purugh a geman fele fele ne yange gba duen abu tsôô? Shin i gba un a gbaa?