Ishima i Legh Legh Ka Gbenda u Kwaghfan
Anmgbian u Kwase Toñi, u a eren tom u nengen sha mbabeenyol, shi a fe u tsema tsema yô, za kema uwegh sha hunda, maa kwase ugen bugh hunda. Kwase ne maa gba lahan Toñi sha ishimavihin, kaan ér hii nan ve a ve faa sha er una va nenge sha ngô u kwase ne u a bee iyol la ga? Er Toñi va tom faa nahan kpa, a zamber a kwase ne sha ishima i legh legh ér a ya un anyi.
TOÑI yaren kwa ugen yô, kwase la shi gba zôhôn a na. Nahan Toñi er nena? A kaa ér: “Kwagh ne yange taver u wan ishima a mi kpishi, sha ci u kwase la lu zôhôn a mo a ityôkyaa shio.” Nahan cii kpa, Toñi shi zamber a kwase la ér a ya un anyi, un kav ican i a lu yan la.
Wea lu Toñi nahan, u nenge wer yange ma u er nena? Yange ma u fatyô u wan ishima kpa? Shin ma i taver we u kôron iyol tsaha? Sha mimi yô, alaghga ma taver we u wan ishima a imba mlu u i ter sha heen ne. Ka a lu u ken ishima hang shin or a hii u yô, i lu ican kpishi u tesen wer u ngu ishima legh legh.
Nahan kpa, Bibilo taver Mbakristu ishima ér ve lu ishima legh legh. Jighilii yô, Mkaanem ma Aôndo kaa ér ieren ne ka kwaghfan. Yakobu yange pine ér: “Ka an ken a ven nan lu or u fan kwagh man or u kaven kwagha? Yô, nana̱ pase ase aeren a nan a sha ishima i legh legh i i lu a kwaghfan la sha zende u nan u dedoo.” (Yak. 3:13) Ka sha nyi gbenda nahan ishima i legh legh i lu kwaghfan u a dugh sha? Man ka nyi ia fatyô u wasen se u lun a aeren a Aôndo laa?
KWAGHFAN U A DUGH KEN ISHIMA I LEGH LEGH LA
Ishima i legh legh ka i bunde ayôôso. “Imo i legh legh ngi bundu ishima i nyoon, kpa kwaghôron u sha ipila yô, kenden a iyugh sha.”—Anz. 15:1.
Kwagh u eren sha ishimavihin la, ka a seer van a ayôôso, sha ci u ka i kende atôndo. (Anz. 26:21) Kpa ishima i legh legh yô, ashighe kpishi ka i va a bem. Ka i na or u nan vihi tu je kpa, nan gba shimi.
Toñi yange tagher ishigh a kwagh ne. Kwase u laha Toñi ne nengen er Toñi lu ishima legh legh yô, mliam haa un ashe. Kwase ne pase Toñi er yange un lu tagher a mbamzeyol nav kua mba hen tsombor na yô. Nahan kpa, ishima i legh legh man ieren i kundu kundu i Toñi la na yô, pase kwase ne kwagh kôr inya shi hii u henen Bibilo a na kpaa.
Ishima i legh legh ia fatyô u nan se msaanyol. “Saan mba ve lu a ishima i legh legh la iyol, gadia tar ua lu dyako ve je.”—Mat. 5:5.
Ka i saan mba ve lu ishima legh legh la iyol sha ci u nyi? Mbakpishiv mba yange ve vihi tu kpa, saan ve iyol hegen sha ci u ve haa ishima i legh legh iyol. Uma ve seer doon, nahan ve fa je ér mlu u dedoo ngu keghen ve ken hemen. (Kol. 3:12) Adolfo ortamen ugen ken Ishpania, umbur ér cii man un va ken mimi yô, uma na lu a inja ga.
Adolfo kaa ér, “uma wam yange lu a inja ga. Sha ci u ishima yange i vihim i za kar ikyaa inya, nahan azende am agen cian mo, sha ci u m wa ihyagh shi m eren kwagh sha ipila. Ken masejime yô, kwagh kôr gema. Shighe ugen la, m lu nôngon num, nahan i kumam kwagh ajiir ataratar m gba awambe je, m nôngo u kpen.”
Kpa hegen yô, Adolfo ngu tesen ior u lun ishima legh legh sha mkaan man sha ieren kpaa. Ieren na i kundu kundu la na yô, ior kpishi soo kwagh na. Adolfo kaa ér, un gema inja nahan doo un kpen kpen. Shi a wuese Yehova er a wase un u lun a ishima i legh legh yô.
Ishima i legh legh ka i na i saan Yehova iyol. “Wan wam, lu orfankwagh, na i saan mo iyol, sha er me gema me kaa imo a or u a laham yô.”—Anz. 27:11.
Orihyom u Yehova u vesen Diabolo ngu lahan un. Aôndo ngu a ityôkyaa i vihin ishima sha ilyahan i i lu lahan un sha apera ne, nahan kpa Bibilo kaa ér Yehova “wan ishima.” (Eks. 34:6) Ka sea nôngon sea waan ishima shi sea lu ishima legh legh er Aôndo nahan yô, se tese ser se mba keren kwaghfan, nahan kwagh la a doo Yehova kpishi je.—Ef. 5:1.
Ashighe kpishi, tar u ainge ne, ka u na i taver se u eren kwagh u dedoo. Sha ci u se mba tagher a ior “mbahagher sha akaa man mbagengese iyol man mbaôron kwagh dang dang, . . . man mbaerenangereke man mbakôron ayol a ve tsaha ga man anomaior a bo.” (2 Tim. 3:2, 3) Nahan kpa, kwagh la una fatyô u yangen Orkristu u lun ishima legh legh ga. Mkaanem ma Aôndo umbur ser ér: ‘Kwaghfan u a dugh Sha yô, ka u bem man u norom ikyaa ga.’ (Yak. 3:17) Ka sea keren bem shi sea norom ikyaa ga yô, se tese ser se mba a kwaghfan u a dugh sha la. Imba kwaghfan la, ka i na se ôr kwagh sha ishima i legh legh shighe u or hii se yô, man kwagh ne ka a wase se se kporom hen un u a lu Imbor i kwaghfan u been mayange ga la, ka Yehova je la.
